ᐊᑭᑦᑐᕆᐊᕐᓂᖓ ᓇᓗᓇᖅᓯᔾᔪᑕᐅᕗᖅ ᓄᓇᕗᒻᒥ ᐱᓕᕆᖃᑎᒌᒍᑎᓄ ᐊᑐᖅᑕᐅᔪᒪᔪᖅ

ᐊᑭᑦᑐᕆᐊᕐᓂᖓ ᓇᓗᓇᖅᓯᔾᔪᑕᐅᕗᖅ ᓄᓇᕗᒻᒥ ᐱᓕᕆᖃᑎᒌᒍᑎᓄ ᐊᑐᖅᑕᐅᔪᒪᔪᖅ Published 5:20 am Sunday, July 19, 2026 ᐊᐃᕕᓕᒃ MLA Hᐊᓇ ᐊᖑᑎᐊᓗᒃ ᕿᓂᖅᑐᖅ ᑭᐅᔾᔪᑎᒥᒃ ᑕᐃᒃᑯᓇᙵ GN−ᑯᓐᓂ ᑕᐃᑲᓂ ᑲᑎᒪᕕᖕᒥ ᐱᔾᔪᑎᖃᖅᑐᒧ ᐸᕐᓇᒃᑕᐅᓯᒪᔪᖅ ᓴᖅᑭᑦᑎᓂᖅ ᐱᓕᕆᖃᑎᒌᒍᑎ ᖃᕋᓴᐅᔭᒃᑰᕈᑎᒧ ᑕᐃᑲᓂ ᓴᓪᓕᕐᒥ ᑕᐃᑰᓇ ᑭᕙᓪᓕᖅ−ᕿᑭᖅᑖᓗᒃ ᖃᕋᓴᐅᔭᒃᑰᕈᑎᒧ ᐱᓕᕆᐊᒃᓴᖅ. ᐊᖑᑎᐊᓗᒃ ᐅᖃᖅᖢᓂ ᒐᕙᒪᓕᕆᔨᑐᖃᒃᑯᑦ ᐊᖏᓚᐅᖅᓯᒪᔪᑦ ᐅᖓᑖᓄ $270 ᒥᓕᐊᓐ ᐱᓕᕆᐊᒃᓴᒧ, ᐊᑐᕋᔭᖅᖢᑎᒃ ᓴᓇᔾᔪᑎᐊᓄ 1,300 ᑭᓚᒦᑕ ᐅᐊᔭ ᐊᒃᑐᐊᓗᓂ ᐃᖃᓗᖕᓄ, ᑭᒻᒥᕈᑦ, ᑭᙵᐃᑦ ᐊᒻᒪᓗ ᓴᓪᓕᖅ. ᓇᓗᓇᐃᓚᐅᖅᑐᖅ ᒐᕙᒪᓕᕆᔨᑐᖃᒃᑯᑦ ᑎᑎᖃᖏ ᐅᖃᖅᓯᒪᓪᓗᓂ ᑕᐃᖕᓇ ᐱᓕᕆᐊᒃᓴᖅ ᑐᕌᖓᓪᓗᐊᕋᒥ ᐋᕿᒋᐊᑦᑎᐊᕐᓗᒍ ᖃᕋᓴᐅᔭᒃᑰᕈᑎ ᐊᒃᑐᐊᔪᑦ ᐅᖓᑖᓄ 80 ᐃᖅᑲᓇᐃᔭᕐᕕᑦ, ᐃᓚᖃᖅᑐᖅ ᐃᓕᓐᓂᐊᕐᕕᑦ, ᕿᒥᕐᕈᐊᒐᖃᕐᕕᑦ, ᐋᓐᓂᐊᕐᕕᑦ ᐊᒻᒪᓗ ᓯᓚᑦᑐᖅᓴᕐᕕᓄ ᑕᐃᒃᑯᐊ ᐊᒃᑐᐊᕌᓂᒃᑐᑦ GN-ᒧ. “ᐱᒻᒪᕆᐅᓂᖃᖅᑐᖅ ᐱᔨᑦᑎᕋᖅᑎᒃᑯᑦ ᓴᓪᓕᕐᒥ ᐊᒻᒪᓗ ᐊᓯᖏ ᑎᒥᐅᔪᑦ ᐃᓚᒋᔭᐅᒃᐸᑕ ᑕᒪᑐᒪᙵ ᐱᓕᕆᐊᒃᓴᕐᒧᑦ,” ᐊᖑᑎᐊᓗᒃ ᐅᖃᖅᐳᖅ, ᐊᐱᕆᓪᓗᓂ ᖃᓄᖅ ᑎᑎᕋᕐᕕᐊ ᐅᓯᑲᖅᑕᐃᔨᓕᕆᔨᒃᑯᑦ ᐱᓕᕆᖃᑎᖃᕐᒪᖔᑕ ᐱᓕᑦᑎᕋᖅᑎᓂ ᑕᒪᑐᒧᖓ ᐊᑐᖅᑕᐅᔪᒪᔪᒧ. ᐅᓯᑲᖅᑕᐅᑎᓕᕆᔩ ᒥᓂᔅᑕ ᔪᐊᔾᔨ Hᐃᒃᔅ ᐅᖃᖅᑐᖅ ᐅᖃᐅᓯᒃᓴᓂ ᖃᕋᓴᐅᔭᒃᑰᕈᑎᓄ ᐱᓕᕆᐊᒃᓴ ᓇᓗᓇᕐᒪ ᓱᓕ. “ᕿᒥᕐᕈᓕᕌᖓᑦᑕ ᖃᕋᓴᐅᔭᒃᑰᕈᑎᓄ ᐱᓕᕆᐊᒃᓴᓂ, ᓇᓗᓇᐃᓚᐅᕋᒪ ᑭᐅᓵᖅᓯᒪᔭᓐᓄ ᑕᒪᑐᒧᖓ ᐊᐱᖅᑯᑎᓂᒃ, ᐱᓕᕆᕈᓘᔭᖅᑐᑦ ᐊᒻᒪᓗ ᓇᓗᓇᖅᑐᖅᓯᐅᖅᑐ ᐃᓚᖏᓐᓄ ᐅᖃᐅᓯᒃᓴᓄ ᐅᖃᐅᓯᐅᔪᖅ ᓱᓕ,” Hᐃᒃᔅ ᐅᖃᖅᐳᖅ. “ᑲᔪᓯᔪᒍ ᐅᖃᖃᑎᖃᐃᓐᓇᖅᖢᑕ ᕿᑭᖅᑖᓗᖕᒥᐅ ᓄᓇᓕᖏᓐᓂ, ᐊᒻᒪᓗ ᓇᓗᓇᐃᖅᑕᐃᓐᓇᕆᓪᓗᑎᒍᓪᓘᓐᓃᑦ ᓄᓇᓕᑦ ᐊᒃᑐᐃᓂᖅᑕᖃᕐᒪᖔᑦ ᑕᐃᒃᑯᓄᖓ ᓄᓇᓕᖕᓄ.” Hᐃᒃᔅ ᐅᖃᖅᖢᓂ ᓇᓗᓇᐃᖅᓯᒪᔪᓂ ᐱᖁᔨᕗᖔᖅᑐᓂ ᑕᐃᒃᓇᙵ ᓴᓪᓕᖅ hᐊᒻᒪᓚᖓᓂ ᑭᓯᐊᓂᓕ ᐅᖃᖅᖢᓂ ᑎᑎᕋᕐᕕ ᐃᖅᑲᓇᐃᔭᖅᑎᖏ ᓇᓗᓇᐃᖅᓯᓇᔭᖅᑐᑦ ᐃᓱᒫᓘᑎ ᓴᖅᑭᑕᐅᔪᓂ ᓄᓇᓕᖕᒥᐅᓄ. ᐊᖑᑎᐊᓗᒃ ᐊᐱᕆᒋᓪᓗᓂ ᑐᑭᓯᓇᑦᑎᐊᖅᑐᒥ ᐱᔪᒪᓪᓗᓂ ᓴᓇᔭᐅᓂᐊᖅᑐᒧ ᖃᕋᓴᐅᔭᒃᑰᕈᑎᒧ ᓴᓪᓕᕐᒧ. Hᐃᒃᔅ ᑭᐅᓪᓗᓂ ᐅᖃᖅᖢᓂ ᒐᕙᒪᒃᑯᒡᒎᖅ ᖃᐅᔨᓴᒃᑲᓐᓂᕋᒥᒃ ᖃᕋᓴᐅᔭᒃᑰᕈᑎᒧ ᐱᓕᕆᐊᒃᓴᒥ ᓲᖃᐃᒻᒪ ᐃᑲᔫᓯᐊᖅ ᐊᑭᐊ ᑕᐃᒃᑯᐊ ᐊᖏᖅᑕᐅᓯᒫᓂᒃᑐᑦ ᐊᑐᒐᒃᓴᐅᔪᓐᓃᕋᒥ ᖁᑦᑎᒃᓯᕙᓪᓕᐊᓂᖏᓐᓄ ᐊᑭᑦ. “ᐃᓚᖏ ᐃᑲᔫᑎ ᑮᓇᐅᔭᑦ ᑐᓂᔭᐅᓚᐅᖅᑐᑦ ᐃᓚᖏᓐᓄ ᖃᕋᓴᐅᔭᒃᑰᕈᑎᒧ ᐱᓕᕆᐊᒃᓴᓄ ᑎᑎᖃᑎᒎᖅᑕᐅᖅᑐ ᑭᓯᐊᓂᓕ ᒫᓐᓇᐅᔪᖅ ᐊᑐᒐᒃᓴᐅᔪᓐᓃᖅᑐᑦ, ᐱᔾᔪᑕᐅᓪᓗᓂ ᐅᓪᓗᑦ ᐊᒻᒪᓗ ᖁᑦᑎᒃᓯᕙᓪᓕᐊᓂᖓᓄ ᐊᑭᑦ,” ᐅᖃᖅᐳᖅ. ᐅᖃᖅᖢᓂ ᒐᕙᒪᒃᑯᑦ ᕿᒥᕐᕈᔪᑦ ᐱᓕᕆᐊᒃᓴᒧ ᑐᔪᕈᑕᐅᓯᒪᔪᑦ ᓇᓪᓕᐅᒃᑯᒫᑦ ᒪᓕᒃᑲᓗᐊᕐᒪᖔᑕ ᐃᓚᒋᔭᐅᔪᓄ ᓄᓇᓕᖕᓄ ᐊᒻᒪᓗ ᓄᓇᕗᒻᒥᐅᓄ. “ᑕᐃᒪᐃᑎᓪᓗᒍ, ᐱᓯᒪᖏᑦᑐᖓ ᑐᑭᓯᓇᖅᑐᒥ, ᓇᓗᓇᐃᖅᓯᒪᔪᒧ ᐊᑐᖅᑕᐅᓂᑯᓄ ᑐᓂᔭᐅᔪᓐᓇᖅᑐ ᐃᓚᖏᔭᐅᔪᓄ,” Hᐃᒃᔅ ᐅᖃᖅᐳᖅ. ᐊᖑᑎᐊᓗᒃ ᐅᐊᑦᑎᐊᕈᒃᑲᓐᓂᖅ ᐱᐱᕆᕗᖅ ᐱᔾᔪᑎᖃᖅᑐᒧ ᑎᑎᕋᕐᕕᐅᑉ ᐸᕐᓇᐅᑎᐊᓄ, ᓇᓗᓇᐃᖅᓯᒪᔪᖅ ᐱᐊᓂᒃᑕᐅᓯᒪᔪᖅ ᑕᐃᒃᓱᒧᖓ ᓄᓇᕗᑦ ᖃᕋᓴᐅᔭᒃᑰᕈᑎᓄ ᓇᓗᓇᐃᖅᓯᒪᔪ ᑕᐃᑯᖓ ᐱᖓᓐᓇᖔᖓᑕ ᑕᓯᐅᔭᕐᔪᐊᖅ ᖃᕋᓴᐅᔭᒃᑰᕈᑎ ᑲᒪᒋᔭᐅᖄᕐᓗᓂ. ᐅᖃᖅᖢᓂ ᐱᓕᕆᐊᒃᓴᖅ ᐃᓚᖃᖅᑐᖅ ᐊᕐᕕᐊᑦ, ᑲᖏᖅᖠᓂᖅ ᐊᒻᒪᓗ ᓴᓪᓕᖅ ᐊᒻᒪᓗ ᐊᐱᕆᓪᓗᓂ ᖃᓄᖅ ᑖᒃᑯᐊ ᓄᓇᓕᑦ ᓂᕈᐊᖅᑕᐅᓚᐅᕐᒪᖔᑕ ᐊᒻᒪᓗ ᐸᒃᓇᐃᓯᒪᖕᒪᖔᑕ ᐊᖏᒡᓕᐊᕐᓗᒍ ᖃᕋᓴᐅᔭᒃᑰᕈᑎᓅᕈᑎ ᐊᓯᖏᓐᓄ ᓄᓇᓕᖕᓄ ᑭᕙᓪᓕᕐᒥ, ᐃᓚᐅᓗᓂ ᓇᐅᔮᑦ. Hᐃᒃᔅ ᐅᖃᖅᖢᓂ ᒐᕙᒪᒃᑯ ᖃᐅᔨᓴᕋᒥ ᑐᑖᑦ ᑐᔫᑕᐅᓚᐅᖅᑐᑦ ᖃᕋᓴᐅᔭᒃᑰᕈᑎᒧ ᑐᒃᓯᕋᐅᑎᑦ ᓲᖃᐃᒻᒪ ᐱᓕᕆᐊᒃᓴᑦ ᐊᑭᖏ ᖁᑦᑎᒃᓯᒋᐊᖅᓯᒪᒐᒥ ᐅᖓᑖᓄᓗᐊ ᓇᐃᓴᐅᑎᐅᓚᐅᖅᓯᒪᔪᒧ. “ᖃᐅᔨᓴᖅᑕᐃᓐᓇᕆᔭᕗ ᑕᒪᐃᓐᓄ ᑖᒃᑯᐊ ᑐᒃᓯᕋᐅᑎᑦ ᑐᔪᖅᑕᐅᓵᖅᓯᒪᔪᑦ, ᐊᒻᒪᓗ ᑕᑯᓪᓗᒍ ᐊᑭ ᐊᒻᒪᓗ ᓇᐃᓴᐅᑎᑦ ᐊᑐᖅᑕᐅᔪᑦ ᑖᒃᑯᓄᖓ ᑐᒃᓯᕋᐅᑎᓄ ᐊᒻᒪᓗ ᐸᕕᒃᑕᐅᓯᒪᔪ ᐃᑲᔫᑎᑦᓄ ᑐᓴᖅᑕᐅᔾᔪᑎ ᐊᑐᒐᒃᓴᐅᔪᓐᓃᖅᑐᑦ ᐱᐊᓂᒡᓗᒋ ᐱᓕᕆᐊᒃᓴᑦ ᑕᒪᑐᒨᓇ ᑎᑎᖃᒃᑯᑦ ᐱᔪᓐᓇᓚᐅᖅᓯᒪᒐᓗᐊᖅᖢᑎᒃ ᓯᕗᓪᓕᕐᒥ ᑕᒪᓐᓇ ᐱᐊᓂᒐᓱᒡᓗᒍ,” ᐅᖃᖅᐳᖅ. Hᐃᒃᔅ ᐅᖃᖅᖢᓂ ᒐᕙᒪᒃᑯ ᕿᒥᕐᕈᖕᒪᑕ ᓇᐅᒃᑯᑭᐊᖅ ᑖᒃᓱᒧᖓ ᐃᖃᔫᑕᐅᔪᓐᓇᖅᑐᓂ ᑕᓯᐅᖅᑕᖓᒍ, ᐃᓚᖃᖅᑐᒧ ᓄᓇᓕᕆᓂᖅ ᐊᒻᒪᓗ ᑕᕆᐅᓕᕆᔩ ᐊᖅᑯᑖᒍ, ᐊᒻᒪᓗ ᖃᐅᔨᔭᕆᐊᖃᕐᓂᐊᖅᑐ ᓇᓕᐊᒃ ᓄᓇᓕ ᐃᓚᐅᓂᐊᕐᒪᖔᑕ ᓯᕗᓂᑦᑎᓐᓂ ᐱᓕᕆᐊᒃᓴᓄ. ᓇᓕᐊᒃ ᓄᓇᓕ ᑲᔪᓯᓂᐊᕐᒪᖔᑕ ᐃᓚᒋᔭᐅᓗᑎᒃ ᑕᒪᑐᒨᓇ ᐃᓕᕆᐊᒃᓴᑦᑎᒍ ᑲᔪᓯᓂᐊᖅᑐᑦ,” ᐅᖃᖅᐳᖅ. “ᑕᐃᒪᐃᑎᓪᓗᒍ ᐱᖃᖏᓚᖓ ᓇᓗᓇᐃᖅᓯᒪᔪᒥ ᑭᐅᔪᓐᓇᖅᑕᓐᓂ ᑐᓂᔪᓐᓇᖅᑕᓐᓂ ᐃᓚᖏᔭᐅᔪᓄ, ᑲᒪᒋᔭᐅᖏᓐᓇᖅᑎᓪᓗᒍ ᖃᐅᔨᓴᖅᑕᐅᔾᔪᑎ ᒫᓐᓇᐅᔪᖅ.”