ᐊᖑᑎ ᑲᑎᒪᔩ ᐃᓕᓐᓂᐊᖅᑎᑦᑎᔪ ᐱᖅᑯᓯᑐᖃᕐᓂ ᒪᒃᑯᒃᑐᓄ

ᐊᖑᑎ ᑲᑎᒪᔩ ᐃᓕᓐᓂᐊᖅᑎᑦᑎᔪ ᐱᖅᑯᓯᑐᖃᕐᓂ ᒪᒃᑯᒃᑐᓄ Published 3:17 pm Friday, December 12, 2025 ᐊᖑᑎ ᑲᑎᒪᔨᖏ ᑲᖏᖅᖠᓂᕐᒥ ᓴᖅᑭᑦᑎᓯᒪᔪ ᐊᔾᔨᒌᖏᕈᓘᔭᖅᑐᓂ ᐱᓕᕆᐊᒃᓴᓂ ᓄᓇᓕᖕᒧ, ᐃᓚᖃᖅᖢᓂ ᐱᓕᕆᑎᑦᑎᓪᓗᑎᒃ ᒪᒃᑯᒃᑐᓂ ᐃᓕᑦᑎᔭᒃᓴᑦᑎᐊᕙᑦ ᐱᖅᑯᓯᑐᖃᑦ. ᐱᓕᕆᐊᒃᓴᓄ ᐋᕿᒃᓱᐃᔨ ᓄᕆᐅ ᖃᓗᔾᔭᖅ ᐅᖃᖅᖢᓂ ᑲᑎᒪᔨᑦ ᑕᐃᒪᙵᓂ ᐃᖏᕐᕋᒐᒥ ᐊᕐᕌᒍ ᐱᖓᓱᑦ ᐊᒻᒪᓗ, ᐅᑭᐊᒃᓵᒥ, ᐱᔪᒪᓕᓚᐅᕋᒥ ᑐᒃᓯᕋᕐᓗᑎᒃ ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᑯᓐᓄ ᐃᑲᔫᓯᐊᕐᒥᒃ ᐱᓕᕆᑎᑦᑎᓗᑎᒃ ᐊᐅᓪᓛᓂᕐᒧ ᐱᓕᕆᐊᒃᓴᓂ. ᖃᓗᔾᔭᖅ ᐅᖃᕆᓪᓗᓂ ᑲᑎᒪᔨᑦ ᐃᓕᓐᓂᐊᖅᑎᑦᑎᔪᒪᖕᒥᒐᒥ ᖃᓄᖅ ᒪᑦᑎᑦᑕᐅᑎᓂ ᐊᑐᑦᑎᐊᕐᓂᖅ. ᐅᖃᖅᖢᓂ Hᐅᓕ ᐃᑎᓐᓄᐊᖅ, ᓴᓂ ᐃᑎᓐᓄᐊᖅ ᐊᒻᒪᓗ ᕋᑭ ᐊᐃᕈᑦ ᐃᖅᑲᓇᐃᔮᖅᑖᖅᑎᑕᐅᓯᒪᔪᑦ ᑲᒪᔨᐅᓗᑎᒃ ᐊᒻᒪᓗ ᐃᓕᓴᐃᔨᐅᓗᑎᒃ. “ᐊᑐᖅᑐᐊᖅᓯᒪᓵᓴᖅᑐᒍᑦ ᑎᓴᒪᓂᒃ ᖃᒧᑕᐅᔭᓂᒃ ᐱᓕᒻᒪᒃᓴᐃᔭᖅᑐᖅᖢᑕ ᑎᓴᒪᓂᒃ ᐊᒻᒪᓗ ᐱᖓᓱᓂᒃ ᐃᓕᓴᐃᔨᑕᖃᖅᖢᓂ ᑕᐃᑯᙵᐅᑎᓪᖢᑎᒍ ᑕᐃᔭᓐ ᒪᐃᒃ.” ᐅᖃᖅᐳᖅ ᖃᓗᔾᔭᖅ. “ᑖᒃᑯᐊ ᐱᓕᒻᒪᒃᓴᖅᑕᐅᓵᖅᑐᑦ ᐃᓕᓐᓂᐊᖅᑎᑕᐅᓪᓗᑎᒃ ᖃᓄᖅ ᐊᐅᓪᓛᑦᑎᐊᕐᓂᖅ, ᐊᑦᑕᕐᓇᖏᑦᑐᒃᑰᕐᓂᖅ, ᓇᓂᓯᓂᖅ ᑕᓯᕐᒥ ᐃᖃᓗᓕᖕᓂ ᐊᒻᒪᓗ ᓇᓂᓯᓂᖅ ᐊᑲᐅᓂᖅᐹᒥ ᒪᑦᑎᑦᑕᕐᕕᖕᒥᑦ.” “ᖃᐅᔨᒪᓕᕐᓂᐊᖅᑐᑦ ᖃᓄᖅ ᒪᑦᑎᑦᑕᐅᑎᓂ ᓯᑰ ᐊᑖᓄᐊᖅᓯᔭᕆᐊᒃᓴᖅ, ᐋᕿᑦᑎᐊᕐᓗᒍ ᒪᑦᑎᑦᑕᐅᑎ ᐊᒻᒪᓗ ᖃᐅᔨᓴᐃᓐᓇᑲᑕᒡᓗᒍ ᒪᑦᑎᑦᑕᐅᑎ ᓯᑰ ᐊᑖᓂᑦᑐᖅ ᐊᔪᖅᓯᖏᒃᑲᓗᐊᕐᒪᖔᑦ. ᖃᐅᔨᒪᓕᕐᓂᐊᖅᑐᑦ ᖃᓄᖅ ᐊᒧᑦᑎᐊᕆᐊᒃᓴᖅ ᒪᑦᑎᑦᑕᐅᑎ ᓯᑰ ᐊᑖᒍᑦ ᑕᓯᒃᑯ ᐃᓕᓯᒪᔪᖅ. ᐃᓕᑦᑎᕈᓘᔭᕐᓂᐊᖅᑐᖅ ᖃᓄᑐᐃᓐᓇᖅ ᐃᖃᓗᒐᓱᖕᓂᐅᑉ ᒥᒃᓵᓄᑦ ᓯᑯᒃᑯᑦ. “ᐅᖃᖅᑕᐃᓐᓚᕆᓗᕆ, ᖃᐅᔨᒪᓕᕐᓂᐊᖅᑐᑦ ᓂᕿᖃᖅᑎᑦᑎᓂᖅ (ᐃᖃᓗᒃ) ᐃᓚᒥᓄ ᐊᒻᒪᓗ ᐃᓐᓇᑐᖃᓄ ᐊᒻᒪᓗ ᑐᓂᓯᕙᒡᓗᓂ.” ᖃᓗᔾᔭᖅ ᐅᖃᕆᓪᓗᓂ ᓄᑲᑉᐱᐊᑦ ᐃᓕᓐᓂᐊᖅᑎᑕᐅᓂᐊᕐᒥᒐᒥ ᖃᓄᖅ ᕿᐅᓕᖅᑕᐃᓕᒪᓂᖅ, ᐃᑭᑦᑎᔪᓐᓇᖅᓯᓗᑎᒃ ᓱᐴᔫᒥᒃ ᐊᒻᒪᓗ ᓂᖅᖠᐅᕐᓂᖅ. ᐅᖃᖅᖢᓂ ᑕᒪᒃᑯᐊᓕᒫ ᐊᓐᓇᐅᒪᔾᔪᑕᐃᓐᓇᐅᖕᒪᑕ ᐊᑦᑕᕐᓇᖏᑐᒃᑯ ᐊᒻᒪᓗ ᐱᓕᕆᕈᓘᔭᕐᓇᖅᖢᑎᒃ ᐊᐅᓪᓛᒥ. “ᕿᒪᒃᑳᖓᕕᐅᒃ ᓄᓇᓕᒃ, ᐃᖢᐊᖅᓯᑲᐅᑎᒋᕙᒃᐳᑎᑦ. ᑲᑎᑦᑐᑎ ᓄᓇᒧ, ᓯᓚᒧ ᐊᒻᒪᓗ ᓂᕐᔪᑎᓄ ᐊᒻᒪᓗ, ᐃᓅᓪᓗᑎ, ᐱᔪᒪᓐᓇᕐᒪ ᓄᓇᐃᓐᓇᕐᒨᕐᓗᑎ ᐊᒻᒪᓗ ᐊᖑᓪᓗᑎᑦ ᑭᓱᒥᒃᑭᐊᖅ ᐃᑲᔫᑕᐅᓂᐊᖅᑐᒥ ᐃᓚᖕᓄ. “ᓄᓇᐃᓐᓇᕐᒦᑎᓪᓗᑎ ᐃᖢᐊᖅᑐᒥᒃ ᐃᒃᐱᒋᔪᓐᓇᕋᕕᑦ ᐊᒻᒪᓗ ᑕᐃᒪᓐᓇ ᐃᒃᐱᒋᔭᕆᐊᖃᖅᑐᐃᓐᓇᐅᓪᓗᑕ ᐅᕙᒃᑯ ᓇᖕᒥᓂᖅ. ᓯᓚᓐᓇᕐᒦᓕᕌᖓᕕᑦ, ᖃᓂᐅᒪᕗᑎ ᓄᓇᒧ. ᓄᓇᒦᐳᑎᑦ ᐊᒻᒪᓗ ᑕᑯᓪᓗᒍ ᓄᓇ. ᑕᑯᓪᓗᒍ ᕿᓚᒃ ᐊᒻᒪᓗ ᐊᓂᖅᓵᕐᕕᖃᑦᑎᐊᖅᖢᑎᑦ; ᑲᑎᑎᑦᑎᐊᖅᓯᓐᓇᖅᑐᖅ ᐃᓕᖕᓂᑦ ᓄᓇᒧᑦ.”