ᐋᕿᒃᓯᕙᓪᓕᐊᔪᖅ ᐊᑐᕈᒪᓯᒪᔮᓂ ᐊᕐᕕᐊᓂ

ᐋᕿᒃᓯᕙᓪᓕᐊᔪᖅ ᐊᑐᕈᒪᓯᒪᔮᓂ ᐊᕐᕕᐊᓂ Published 9:41 am Saturday, October 17, 2026 ᖃᒧᑕᐅᔭᒃᑯᑦ ᓱᒃᑲᓴᐅᔾᔪᐊᖃᑕᐅᖃᑦᑕᕈᕕ ᑭᕙᓪᓕᕐᒥ, ᖃᐅᔨᒪᔪᑎ ᐃᖏᕐᕋᔾᔪᑏ ᐋᕿᒋᐊᖅᑕᐅᔭᕆᐊᖃᖃᑦᑕᖅᑐᖅ ᐊᑐᕈᓐᓇᖁᓪᓗᒍ ᐃᑮᓇᒻᒪᕆᒃᑐᒃᑯ ᐅᑭᐅᖅᑕᖅᑐᒥ ᓯᓚᖓ ᐱᔾᔪᑕᐅᓪᓗᓂ. ᐊᕐᕕᐊᕐᒥᐅᑕᖅ ᐸᓐ ᒪᓐᓂᒃ, ᖃᒧᑕᐅᔭᓂ ᐋᕿᒋᐊᖅᓯᒪᓪᓗᒍ ᐊᒻᒪᓗ ᐱᕙᒌᖅᓯᒪᓪᓗᒍ ᓱᒃᑲᓴᐅᑎᖃᑕᐅᓂᕐᒧ ᐊᑐᕈᒪᕙᒃᑖ ᑭᖑᓪᓕᐅᑎᓪᓗᓂᐅᒃ ᓇᖕᒥᓂᖃᖅᑎᐅᑎᓪᓗᒍ ᐊᒻᒪᓗ ᐃᖏᕐᕋᑎᑦᑎᔨᐅᓪᓗᓂ ᐅᑭᐅᖅᑕᖅᑐᒥ ᐱᔨᑦᑎᕋᕐᕕᖕᒥ. “ᐱᒃᑯᒋᓂᖅᐹᕆᔭᕋ ᓴᓇᓪᓗᒍ,” ᐅᖃᖅᐳᖅ. “ᖃᒧᑕᐅᔭᒃᑯ ᓱᒃᑲᓴᐅᔾᔪᐊᖃᑕᐅᕙᒃᑐᖓ… ᐱᒃᑯᒋᓂᖅᐹᕆᔭᕋ ᖃᒧᑕᐅᔭᑦ, ᐊᒻᒪᓗ ᐊᓯᔾᔩᓪᓗᓂ ᐊᖅᑯᑖᑕ ᓱᒃᑲᓂᖅᑐᕐᕕᐅᑉ ᐊᒻᒪᓗ ᐋᕿᒋᐊᖅᖢᒍ, ᑕᐃᒪᓐᓇᐸᓗᒃ.” ᑭᐊᓂᓕ ᓴᓇᓪᓗᓂ ᖃᒧᑕᐅᔭᒥᓂ ᐃᓚᒋᔮ ᒪᓐᓂᐅᑉ ᐊᑐᖅᑕᖓᒍ ᓇᖕᒥᓂᖃᕐᓂᖅ. ᐅᑭᐅᖅᑕᖅᑐᒥ ᐱᔨᑦᑎᕋᕐᕕᒃ ᓇᐅᒃᑯᑐᐃᓐᓇᖅ−ᐱᔨᑦᑎᕐᓂᖅ ᓇᖕᒥᓂᖅ ᐱᔨᑦᑎᕋᖅᐸᒃᑐᖅ ᓴᙱᔪᓄ ᐱᙳᐊᕈᑎ, ᐋᕿᒋᐊᖅᓯᓂᖅ ᐊᒻᒪᓗ ᐱᔨᑦᑎᕐᓂᖅ ᐃᖏᕐᕋᔾᔪᑎᓂ, ᖃᒧᑕᐅᔭᓂ, ᐊᒻᒪᓗ ᑎᓴᒪᓕᒡᔪᐊᓂ. ᒪᓐᓂᒃ ᓂᐅᕈᑎᖃᖅᐸᖕᒥᔪᖅ ᑭᓂᖅᑐᕈᑎᓂ ᐊᒻᒪᓗ ᐳᐊᕆᔭᐃᕙᒃᖢᓂ. ᐱᓚᐅᖅᓯᒪᔪᖅ ᓇᖕᒥᓂᒥᓂ 2022-ᒥ ᐊᒻᒪᓗ ᓱᓕ ᓇᖕᒥᓂᖃᖅᑎᐅᓪᓗᓂ ᐊᒻᒪᓗ ᐃᖏᕐᕋᑎᑦᑎᔨᐅᓪᓗᓂ. “ᐊᑖᑕᑦᑎᐊᕋ ᓇᖕᒥᓂᖃᓚᐅᖅᓯᒪᔪᖅ ᐊᑯᓂᐊᓗᒃ, ᐊᒻᒪᓗ ᐊᔾᔨᒧᒋᓚᐅᖅᓯᒪᓪᓗᒍ ᓇᖕᒥᓂᖃᕐᓂᖅ,” ᒪᓐᓂᒃ ᐅᖃᖅᐳᖅ. ᑕᓪᓕᒪ ᐊᕐᕌᒍ ᐊᓂᒍᖅᑐᖅ, ᐱᓕᕆᐊᓂ ᐊᑑᑎᖃᓕᖅᖢᓂ ᓄᓇᓕᖕᒧ ᑕᐃᑲᓂ ᖃᒧᑕᐅᔭᑦ ᐊᒻᒪᓗ ᐊᓯᖏ ᐃᖏᕐᕋᔾᔪᑏ ᐊᑐᖅᑐᒻᒪᕆᐅᒐᒥ ᐃᖏᕐᕋᔾᔪᑕᐅᓪᓗᑎᒃ ᐊᖑᓇᓱᒃᑎᓄ, ᐃᖃᓪᓕᐊᖅᑎᓄ ᐊᒻᒪᓗ ᐱᙳᐊᖅᑎᓄ. ᐅᑭᐅᒃᑯᑦ, ᐱᔨᑦᑎᖅᑕᐅᔪᒪᔪ ᐊᔾᔭᖅᓯᔪᓐᓇᖅᖢᑎᒃ ᐃᖏᕐᕋᔾᔪᑎᒥᓂᒃ ᐊᐅᒃᓰᔭᖅᑐᕐᓗᑎᒃ ᐊᒻᒪᓗ ᐊᑲᐅᖏᓕᐅᕈᑎᐋᕿᒋᐊᕐᓗᑎᒃ, ᒪᓐᓂᒃ ᐅᖃᖅᐳᖅ. ᐃᖏᕐᕋᑎᑦᑎᓂᖅ ᐋᕿᒋᐊᖅᓯᓂᖅ ᓇᖕᒥᓂᒃᑯ ᓄᓇᓕᕋᓛᓂ ᐅᑭᐅᖅᑕᖅᑐᒥ, ᑕᐃᒪᐃᑎᓪᓗᒍ, ᐊᔪᕐᓇᕈᑎᑕᖃᖅᐸᒃᑐᖅ ᐊᑐᖅᑕᐅᕙᖏᑎᓪᓗᒍ ᓄᓇᓕᐸᐅᔭᓂ ᓇᖕᒥᓂᖃᖅᑎᓂ, ᐅᖃᖅᐳᖅ. ᐃᓚᒃᓴᑦ ᐊᔪᕐᓇᖅᐸᒃᖢᓂ ᐱᓇᓱᒋᐊᒃᓴᖅ ᓄᓇᓕᖕᒧ, ᑎᑭᓴᖅᑕᐅᔭᕆᐊᖃᖅᖢᑎᒃ ᓄᓇᓕ ᓯᓚᑖᓂᖔᖅᑐᒥ. ᓂᐅᕕᕐᕕᑦ ᐱᓯᒻᒥᖔᖅᕈᓐᓇᖅᖢᑎᒃ ᐃᓚᒃᓴᓂ, ᒪᓐᓂᒃ ᐅᖃᖅᐳᖅ, ᐃᓚᖏᓪᓗ ᓇᒃᓯᐅᔾᔭᐅᔭᕆᐊᖃᖅᖢᑎᒃ ᐅᑭᐅᖅᑕᖅᑐᒧ, ᐊᒻᒪᓗ ᑎᑭᓐᓂᕆᔭ ᒪᓕᒃᐸᒃᖢᓂ ᓯᓚ ᒪᓕᒃᖢᒍ. ᑕᒪᐃᒃᑲᓗᐊᖅᑎᓪᓗᒍ ᐊᔪᕈᑎᑦ, ᒪᓐᓂᒃ ᐅᖃᖅᐳᖅ ᒪᕐᕉᒃ ᓇᖏᕈᑕᐅᕗ ᓇᖕᒥᓂᐊᓄ ᓇᖕᒥᓂᖅ: ᓇᖕᒥᓂᖅ ᐊᒻᒪᓗ ᐱᔪᓐᓇᖅᑎᑦᑎᓪᓗᓂ ᐃᑲᔪᕐᓗᓂ ᐊᓯᒥᓂ. “ᐃᓱᒪᖅᓱᕐᓂᖅ ᐊᒻᒪᓗ ᐊᓯᒥ ᐃᑲᔪᕐᓂᖅ, ᐊᒻᒪᓗ ᓄᓇᓕᖕᒥᐅᓂ ᐃᑲᔪᖅᖢᓂ,” ᐅᖃᖅᐳᖅ. ᑕᒪᐃᒃᑲᓗᐊᖅᑎᓪᓗᒍ ᐃᑲᕐᕋᓕᐅᕐᓂᓂ ᑲᒪᒋᓪᓗᓂᐅᒃ, ᐱᔨᑦᑎᖁᔭᐅᒐᔪᒃᑐᖅ. “ᑭᓱ ᐊᐃ, ᐃᖏᕐᕋᑎᑦᑎᓪᓗᓂ ᓇᖕᒥᓂᒥ, ᐃᓱᒪᖅᓱᖏᓚᑎᑦ. ᐱᓕᕆᐊᒃᓴᖃᐃᓐᓇᐅᔭᖅᓂᐊᖅᐳᑎᑦ ᖃᐅᑕᒫ, 7 ᐅᓪᓗᓄ ᐱᓇᓱᐊᕈᓯᓕᒫᖅ.” ᒪᓐᓂᒃ ᐃᓚᐅᓵᓚᐅᖅᑐᖅ ᐊᕐᕌᒍᑕᒫᖅ ᐊᑐᖅᑕᐅᕙᒃᑐᖅ ᐃᖅᑲᓇᐃᔮᓂ ᑕᑯᒃᓴᐅᑎᑦᑎᓂᖅ ᑲᖏᖅᖠᓂᕐᒥ ᓯᕗᓪᓕᖅᐸᐅᒋᓪᓗᓂᐅᒃ. ᐃᓚᐅᓚᐅᖅᑐᖅ ᑭᕙᓪᓕᕐᒥ ᓇᖕᒥᓂᖃᖅᑐᓄ ᐱᓕᕆᐊᒃᓴᒥ, ᑐᓂᔭᐅᔪᖅ ᑲᑎᖓᑎᑦᑎᓂᖅ ᐃᖅᑲᓇᐃᔮᓂ ᑕᑯᒃᓴᐅᑎᑦᑎᔪᓂ ᐊᒻᒪᓗ ᑐᕌᖓᓪᓗᓂ ᑭᕙᓪᓕᕐᒥ ᓇᖕᒥᓂᖃᖅᑐᓄ ᐊᒻᒪᓗ ᓇᖕᒥᓂᕋᓛᖃᖅᑎᓄ. “ᐊᑲᐅᑦᑎᐊᓚᐅᖅᑐᖅ. ᐅᓄᖅᑐᓪᓗ ᑐᓴᕈᒥᓇᖅᑑᓪᓗᑎᒃ, ᐱᒃᑯᓇᖅᑐᓪᓗ ᐃᓚᐅᔪᑦ, ᐊᒻᒪᓗᕕᓗᐊᖅ, ᐃᑲᔪᕋᓱᐊᑦᑎᐊᖅᖢᑎᒃ ᓇᖕᒥᓂᓐᓂ,” ᐅᖃᖅᐳᖅ. ᑭᕙᓪᓕᕐᒥ ᐃᖅᑲᓇᐃᔮᓂ ᑕᑯᒃᓴᐅᑎᑦᑎᓂᐅ ᐊᖓᔪᖅᑳᖓ ᕋᐳᑦ ᑲᓇᓕ ᐅᖃᖅᖢᓂ ᓇᖕᒥᓂᖃᕐᑎᐅᓂᕐᒧ ᐱᓕᕆᐊᒃᓴᖅ ᑐᓂᓯᕙᒃᑐᖅ ᐱᓕᒻᒪᒃᓴᐃᓂᖅ ᐅᑯᓂᖓ ᓲᕐᓗ ᓇᖕᒥᓂᒧ ᐸᕐᓇᐃᓂᖅ, ᓇᐃᓴᐅᑎᓕᕆᓂᖅ ᓂᐅᕈᑎᒃᓴᓄ ᐊᒻᒪᓗ ᑕᐅᖅᓰᖃᑎᒌᖕᓂᕐᒧ. “2026 ᑭᕙᓪᓕᖅ ᐃᖅᑲᓇᐃᔮᓂ ᑕᑯᒃᓴᐅᑎᑦᑎᓂᖅ ᐊᓂᒍᐃᑦᑎᐊᓚᐅᖅᑐᖅ. ᐅᓄᕐᓂᐹᖑᓯᒪᓕᖅᖢᑎᒃ ᐃᓚᐅᔪᑦ, ᑕᑯᖅᑯᔾᔨᔩ ᐊᒻᒪᓗ ᓴᓇᙳᐊᖅᑎ ᐃᓚᐅᓪᓗᑎᒃ ᐊᕐᕌᒍᑦᑎᓐᓂ,” ᑲᓇᓕ ᐅᖃᖅᐳᖅ. ᐅᖓᑖᓄ 240 ᐃᓚᐅᓚᐅᖅᑐᑦ, ᐅᖃᖅᐳᖅ, ᐅᖃᕆᓪᓗᓂ ᑕᐃᓗᓂᐅᒃ “ᑐᑭᓕᐊᒃᓯᓯᒪᔪ ᐱᒃᑯᓇᖅᖢᑎᒃ” ᐅᖃᖅᑎᓂ ᐊᒻᒪᓗ ᑐᙵᓴᐃᔨᓂ. “ᐱᒃᑯᒍᓱᑦᑎᐊᖅᑐᒍ ᐊᑐᖅᑕᐅᓚᐅᖅᑐᒥ ᐱᒋᐊᕈᑎᒥ ᐊᒻᒪᓗ ᖃᓄᖅ ᑕᑯᔭᖅᑐᖅᑐᑦ ᐃᓚᐅᓂᖃᓚᐅᕐᒪᖔᑕ, ᐱᓕᕆᖃᑎᒌᒃᖢᑎᒃ ᐊᒻᒪᓗ ᑲᑎᖃᑎᖃᕈᓐᓇᖅᖢᑎᒃ,” ᑲᓇᓕ ᐅᖃᖅᐳᖅ. ᑭᕙᓪᓕᕐᒥ ᐃᖅᑲᓇᐃᔮᓂ ᑲᑐᔾᔨᖃᑎᒌᒃ ᐋᕿᒃᓱᐃᖏᓐᓇᖅᑐᑦ ᑕᒪᑐᒥᖓ ᑕᐃᒪᙵᓂ 2009-ᒥᓂ ᐊᒻᒪᓗ ᐅᖃᖅᖢᑎᒃ ᐃᓚᖓ ᑐᕌᖅᑕᓂ ᑭᒡᒐᖅᑐᐃᓂᖅ ᐊᒻᒪᓗ ᐱᕙᓪᓕᐊᔪᓕᕆᓂᕐᒧ ᓇᖕᒥᓂᓕᕆᔨᓂ ᐊᒻᒪᓗ ᑮᓇᐅᔭᓕᕆᓂᕐᒧ ᐊᑐᒐᒃᓴᓂ ᑭᕙᓪᓕᕐᒥ. ᓇᖕᒥᓂᖃᖅᑎᐅᔪᒧ ᓲᕐᓗ ᒪᓐᓂᒃ, ᐃᑲᔪᖅᑐᖅᑕᐅᓂᖓ ᐊᑐᒐᒃᓴᑦᑎᐊᕙᐅᔪᓐᓇᖅᑐᖅ ᐃᖏᕐᕋᑎᑦᑎᓂᐊᕐᓗᓂ ᓇᖕᒥᓂᕋᓛᒥ ᐱᓕᕆᐊᒃᓴᖃᕐᓗᓂ ᑕᑯᔭᒃᓴᑐᐃᓇᐅᖏᑦᑐᒥ, ᑭᓯᐊᓂᓕᑦᑕᐅᖅ ᓇᐃᓴᐅᑎᓕᕆᓂᕐᒧ, ᐸᕐᓇᐃᓂᖅ, ᑎᑭᓴᐃᓂᖅ ᐊᒻᒪᓗ ᖃᓄᖅᑑᕐᓂᕐᒧ ᓯᕗᓂᐊᓄ. ᒪᓐᓂᒃ ᐃᓱᒪᒋᔭᖄᓂᒃᑐᖅ ᑭᖑᓪᓕᖅ ᐊᓪᓗᕐᓂᐊᖅᑕᒥᓂ ᐅᑭᐅᖅᑕᖅᑐᒥ ᐱᔨᑦᑎᕋᕐᓂᕐᒧ. ᐱᔪᒪᒐᓗᐊᖅᖢᓂ ᓅᓪᓗᓂ ᐊᖏᓂᖅᓴᒧ ᐱᔨᑦᑎᕐᕕᖕᒧ ᐊᒻᒪᓗ ᓂᐅᕈᑎᒃᓴᖏ ᐅᓄᖅᓯᒋᐊᕐᓗᓂᒋ, ᐃᓚᖃᑦᑐᒥ ᓂᐅᕈᑎᖃᕐᓂᖅ ᐃᓚᒃᓴᓂ. ᑐᕌᖅᑕᓂ ᐱᔭᐅᔪᒪᒐᔪᒃᑐᑦ ᓂᐅᕈᑎᒃᓴᐅᓗᑎᒃ ᐊᕐᕕᐊᓂ, ᐅᑕᕿᕙᒃᑐᑦ ᐅᑕᕿᑎᑯᑖᓗᐊᕈᓐᓃᖅᑎᓪᓗᓂᒋ ᐃᓚᒃᓴᒥᓂ ᑎᑭᓐᓂᐊᕋᔮᖅᑎᓪᓗᒋ ᓯᓚᑖᓂᖔᖅᑐᑦ ᓄᓇᓕᖕᒥ. ᓱᒃᑲᓐᓂᖅᓴᐅᓇᔭᖅᖢᓂ ᐅᑕᖅᑭᓂᕐᒧ ᑕᐃᒃᑯᓄᖓ ᐊᑐᕕᒡᔪᐊᖅᑐᓄ ᐃᖏᕐᕋᔾᔪᑎᒥᓂᒃ. ᒪᓐᓂᐅᑉ ᐊᑐᖅᓯᒪᔭᓂ ᐃᓱᒪᒋᔭᒥᒍ ᑲᓇᑕ ᐸᕐᓇᒃᑲᒥ ᓇᓗᓇᐃᖅᓯᓗᓂ BDC ᓇᖕᒥᓂᕋᓛᖃᖅᑎᓄ ᐱᓇᓱᐊᕈᓯᐊ ᐅᑐᐱᕆ 19-25. ᐊᕐᕌᒍᑕᒫᖅ ᐊᑐᖅᑕᐅᕙᒃᑐᖅ, ᐋᕿᒃᓱᖅᑕᐅᔪ ᑕᐃᒃᑯᓇᙵ ᓇᖕᒥᓂᓄ ᐱᕙᓪᓕᐊᓂᖅ ᑮᓇᐅᔭᓕᕆᔩ ᑲᓇᑕᒥ, ᖁᕕᐊᓱᖃᑎᖃᐃᓐᓇᖅᓯᒪᔪ ᓇᖕᒥᓂᖃᖅᑎᓂ ᑕᐃᒪᙵᓂ 1979−ᒥ ᐊᒻᒪᓗ ᑲᑎᑎᑦᑎᕙᒃᖢᓂ ᓇᖕᒥᓂᖃᖅᑎᐅᔪᓂ ᐅᑐᐱᕆᑕᒫᖅ ᐃᓕᑦᑎᓂᐊᕋᒥ, ᐱᓕᕆᖃᖅᑎᓂ ᐊᒻᒪᓗ ᑐᓴᖃᑎᒌᒡᓗᑎᒃ. ᒪᓐᓂᒃ ᐅᖃᖅᖢᓂ ᐃᑲᔪᖅᑐᖅᑕᐅᔭᓂ ᐊᕐᕕᐊᕐᒥᐅᓂ ᐱᒻᒪᕆᐅᖏᓐᓇᖅᑐᖅ. “ᐅᓄᖅᑐ ᑕᒫᙵ ᐃᑲᔪᖅᑐᐃᔪ ᐅᕙᓐᓂ, ᐊᒻᒪᓗ ᐊᑲᐅᑦᑎᐊᖅᖢᓂ,” ᐅᖃᖅᐳᖅ. ᑕᐃᒃᑯᓄᖓ ᐊᓯᖏᓐᓄ ᑭᕙᓪᓕᕐᒥᐅᓄ ᑐᓂᓯᓯᒪᔪ ᐃᓱᒪᒋᔭᒥᓂ ᐅᕝᕙᓘᓃᑦ ᐊᔪᖏᑕᒥᓂ ᓇᖕᒥᓂᖑᖅᑎᑦᑎᓯᒪᔪ, ᒪᓐᓂᐅᑉ ᐅᖃᖅᑕᓂ ᐊᔪᕐᓇᖏᑦᑐᑯᓗᒃᒃ. “ᐊᑐᕈᒪᔭᖃᖅᓯᒪᒍᕕᑦ, ᐱᒋᐊᑐᐃᓐᓇᕆᑦ,” ᐅᖃᖅᐳᖅ. “ᐱᑕᖃᐅᑦᑎᐊᖅᑐᖅ ᐱᓕᕆᐊᒃᓴᓂ ᐃᑲᔪᕈᒪᔪᑦ ᐱᒋᐊᕐᓗᑎᑦ ᓇᖕᒥᓂᒥ − ᐅᓄᖅᑑᔪ ᑮᓇᐅᔭ ᐃᑲᔪᕈᓐᓇᖅᑐᖅ ᐃᓕᖕᓂ ᐱᒋᐊᕈᑎᒥ ᓇᖕᒥᓂᒧ.” ᐊᓯᐊᒍ ᑕᑯᖕᒥᔪᖅ ᒪᓐᓂᒃ ᐅᓗᕆᐊᓇᕐᓂᖓᑕ ᐊᓪᓗᕆᐊᕐᓗᓂ ᓇᖕᒥᓂᖃᖅᑎᐅᓂᕐᒧ. “ᐊᑲᐅᖏᓕᐅᕈᑎᑕᖃᖅᐸᑦ, ᐅᑎᑐᐃᓐᓇᕐᓗᑎ 9-5 ᐃᖅᑲᓇᐃᔮᒃᓴᒧ.”