ᑎᑭᕋᕐᔪᐊᓂ ᓄᓇ ᓱᕈᔪᒃᑕᐅᓯᒪᔪᖅ ᓄᓇᓕᖕᒥ ᓄᖃᖔᖅᑎᑦᑎᕗᖅ: ᒪᐃᔭ

ᑎᑭᕋᕐᔪᐊᓂ ᓄᓇ ᓱᕈᔪᒃᑕᐅᓯᒪᔪᖅ ᓄᓇᓕᖕᒥ ᓄᖃᖔᖅᑎᑦᑎᕗᖅ: ᒪᐃᔭ Published 3:47 am Thursday, December 4, 2025 ᓱᕈᔪᓚᐅᖅᓯᒪᔪᖅ ᑯᕕᕕᐅᓪᓗᓂ ᑎᑭᕋᕐᔪᐊᓂ ᓄᖃᖅᑎᑎᓚᐅᖅᑐᖅ hᐊᒻᒪᓚᒃᑯᓐᓂ ᖃᑦᑎᕆᕝᕕᓕᐅᕐᓗᑎᒃ, ᑕᓪᓕᒪᓂ ᓄᓇᓯᐅᑎᒃᑯᕕᖃᕐᓗᓂ ᐊᒻᒪᓗ ᐃᒡᓗᕐᔪᐊᖅᑕᖃᕆᐊᖃᒻᒪᕆᒃᖢᓂ ᕿᑎᐊᑕ ᓄᓇᓕᐅᑉ, ᐅᖃᖅᑐ ᒪᐃᔭ ᐊᓕᕗ ᓯᑉᑎᓐ. ᑯᕕᓚᐅᖅᓯᒪᔪᕕᓂᑐᖃᖅ ᑕᐃᖕᓇ ᐅᑭᐅᖅᑕᖅᑐᒥ ᐃᑯᒻᒪᖁᑎᓂ ᑲᒥᓯᓇ, ᒐᕙᒪᓕᕆᔨᑐᖃᒃᑯᓐᓄ ᓄᓇᓕᕆᔨ ᑯᐊᐳᕇᓴ, ᐱᓕᕆᓚᐅᖅᓯᒪᔪ ᓄᓇᓕᖕᒥ, ᓄᓇᕗᖑᕐᓂᐊᓕᓵᖅᑎᓪᓗᒍ. ᓯᑉᑎᓐ ᐅᖃᖅᖢᓂ ᒐᕙᒪᒃᑯ ᓄᓇᕗᒻᒥ ᐊᕙᑎᓄ ᒪᓕᒐ ᐱᔪᓐᓇᖅᑎᑦᑎᓚᐅᖅᓯᒪᖏᒻᒪ hᐊᒻᒪᓚᒃᑯᓐᓂ ᓴᓇᓗᑎᒃ ᐃᒡᓗᕐᔪᐊᒥᒃ ᑕᐃᑲᓂ ᓲᖃᐃᒻᒪ ᑯᕕᕝᕕᐅᓯᒪᔪᖅ ᓴᓗᒻᒪᖅᓴᖅᑕᐅᖄᕆᐊᖃᕐᒪᑦ. “ᐅᕙᑦᑎᓐᓂ ᐃᓕᓯᑎᑦᑎᖃᑦᑕᕐᒪᑕ ᐃᒡᓗᕐᔪᐊᓂ ᓄᓇᓕᖕᒥ ᐃᓂᐅᓗᐊᖏᑦᑐᓂ, ᐊᒻᒪᓗ ᓴᓇᕕᐅᔪᓐᓇᖏᖢᓂ,” ᐅᖃᖅᐳᖅ. “ᐊᒻᒪᓗ ᖃᐃᓯᒪᓚᐅᖅᓯᒪᔪ ᒥᓂᔅᑕ ᓄᓇᓕᖕᒧ, ᐊᒻᒪᓗ ᑲᒪᒋᔭᐅᑎᓇᓱᒃᖢᑎᒍ ᐊᑯᓂ ᐊᕐᕌᒍ, ᐊᒻᒪᓗ ᑐᓴᓚᐅᖅᓯᒪᖏᑲᓴᒃᖢᑕ ᐅᕝᕙᓘᓃᑦ ᐃᑲᔪᖅᑕᐅᓗᑕ ᑕᒪᑐᒧᖓ ᐊᑲᐅᖏᓕᐅᕈᑎᒧ.” ᐅᖃᕆᓪᓗᓂ ᖃᐅᔨᓴᖅᑕᐅᓂᖅᑕᖃᓚᐅᖅᓯᒪᖏᓐᓂᖓᓄ ᖃᐅᔨᓂᐊᕋᒥ ᖃᔅᓯᑐᕋᔭᕐᒪᖔᑦ ᓴᓗᒻᒪᖅᓴᖅᑕᐅᔾᔪᑎᐊ. “ᐅᖃᐅᔾᔭᐅᓚᐅᖅᓯᒪᔪᒍ ᒐᕙᒪᒃᑯ ᑲᒪᒋᓂᐊᕐᒪᒍ ᑭᓯᐊᓂᓕ ᒐᕙᒪᒃᑯ ᓱᓕ ᐱᒋᐊᓚᐅᖅᓯᒪᖏᓚᑦ,” ᐅᖃᖅᐳᖅ. ᑕᐃᕕᑎ ᐊᕿᐊᕈᖅ ᐊᒻᒪᓗ ᑕᐃᕕᑎ ᔪᐊᓇᓯ, ᐊᑐᓂ ᒥᓂᔅᑕᐅᓚᐅᖅᓯᒪᔫᒃ ᑕᐃᔅᓱᒪᓂ, ᖃᐃᓚᐅᖅᓯᒪᔫᒃ ᑎᑭᕋᕐᔪᐊᓄ ᑕᐃᒃᑯᑎᒎᓇ ᒐᕙᒪᒃᑯ ᓄᓇᕗᒻᒥ ᐅᖃᐅᓯᖃᕆᐊᖅᑎᓪᓗᒋ ᑕᒪᑐᒥᖓ ᐊᑲᐅᖏᓕᐅᕈᑎᒥᒃ, ᐅᖃᖅᐳᖅ ᒪᐃᔭ. ᑎᑭᖦᖢᒍ ᐅᓪᓗᒥᒧ, ᓯᑉᑎᓐ ᐅᖃᖅᖢᓂ ᐸᓯᔭᒃᓴᓕᐊᖑᔪᖃᓚᐅᖅᓯᒪᖏᓐᓂᖓᓄ ᑕᐃᒪᙵᓂ ᑯᕕᔪᒧ ᓴᓗᒻᒪᖅᑕᐅᔾᔪᑎᐊ ᐊᑭᓕᖅᑕᐅᔪᓐᓇᕐᓂᐊᕋᒥ, ᕿᒪᒃᑕᐅᑐᐃᓐᓇᖅᖢᓂ ᓄᓇ ᓱᕈᔪ ᕿᑎᐊᓂᑦᑎᐊᖅ ᓄᓇᓕᐅᑉ ᐊᑲᐅᖏᓕᐅᕈᑎᓪᓗ ᑲᔪᓯᑐᐃᓐᓇᖅᖢᑎᒃ. “ᑯᕕᔪᕕᓂᕐᒥ ᓴᓗᒻᒪᖅᓴᖅᑕᐅᔪᖃᓕᕌᖓᒥ, ᐊᑭᖃᕈᓐᓇᖅᑐᖅ ᒥᓕᐊᖏᓐᓂ ᑮᓇᐅᔭᒥ, ᐊᒻᒪᓗ hᐊᒻᒪᓚᒃᑯ ᑐᓂᔭᐅᕙᖏᖢᑎᒃ ᑮᓇᐅᔭᒃᑲᓐᓂᕐᒥ ᐃᑲᔫᑕᐅᓪᓗᐊᖅᑐᒥ ᐃᖏᕐᕋᔾᔪᑎᐊᓄ ᑲᒪᒋᔪᓐᓇᖁᓪᓗᒍ ᐊᑲᐅᖏᓕᐅᕈᑎᑦ. ᐱᓪᓗᒍ ᐊᖏᖃᑎᒌᒃᓂᖅᑕᖃᕆᐊᖃᖅᐳᖅ. ᖃᓅᔭᕆᐊᖃᖅᐱᑕ?” ᓯᑉᑕᓐ ᐅᖃᖅᐳᖅ. ᐅᒃᐱᕈᓱᒃᑐᖅ ᐱᔭᒃᓴᐅᑕᐅᔪ ᒐᕙᒪᓕᕆᔨᑐᖃᒃᑯ ᓲᖃᐃᒻᒪ ᐊᓯᔾᔨᕐᓂᖓᓄ ᐃᖅᑲᖅᑐᐃᕕᒃᑰᖅᑎᑕᐅᔪᓐᓇᖏᓐᓂᖓᓄ, ᓅᖢᑎᒃ ᓄᓇᑦᑎᐊᖅ ᒐᕙᒪᖓᓂ ᓄᓇᕗᑦ ᒐᕙᒪᖓᓄ ᐱᔨᑦᑎᖅᑎᓕᖅᖢᓂ ᐊᑐᕚᒥ ᐃᓚᐅᑎᑦᑎᔪ ᓴᓗᒻᒪᖅᑕᐅᔾᔪᑎᐊᓄ, ᓇᓗᓇᐃᖅᐳᖅ. ᓄᓇᖃᖅᑳᖅᓯᒪᔪᓄ ᓄᓇᓕᕆᔩ ᐊᒻᒪᓗ ᐅᑭᐅᖅᑕᖅᑐᒥ ᑎᑎᕋᕐᕕ ᑲᓇᑕᒥ ᐅᖃᖃᑎᖃᖅᓯᒪᔪ ᓯᑉᑕᓐᒥ ᐱᔾᔪᑎᖃᖅᖢᑎᒃ ᑯᕕᔪᕕᓂᒥ, ᑭᓯᐊᓂᓕ ᐱᓕᕆᐊᖓ ᒪᓕᒃᑲᒥ ᑭᓇ ᐊᑭᓖᓂᐊᕐᒪᖔᑦ ᐊᔪᕈᑕᐅᔪᑐᖃᐅᖕᒪᑦ. ᐅᑭᐅᖅᑕᖅᑐᒥ ᑲᓇᑕ ᐆᒻᒪᖅᑯᑎᓕᕆᔩ ᑲᒥᓯᓇ ᐃᖏᕐᕋᑎᑦᑎᕙᓚᐅᖅᓯᒪᔪᖅ ᐊᐅᓚᐅᑎᖃᕐᕕᒥ ᕿᑎᐊᓂ ᑎᑭᕋᕐᔪᐊᖅ 1960−ᖏᓐᓂ ᐊᒻᒪᓗ 70−ᖏᓐᓂ, ᐅᖃᖅᓯᒪᔪᖅ ᖁᓪᓕᖅ ᐃᑯᒻᒪᖁᑎᓕᕆᔨᒃᑯ (QEC) ᑎᑎᖃᓕᐊᖓ ᑕᐃᑲᙵ 2014. ᐃᕕᒃ ᓱᕈᔪᒃᓯᒪᔪ ᐅᖅᓱᐊᓗᕕᓂᕐᒥ ᑕᐃᑲᓂ ᐃᓂᐅᓚᐅᖅᓯᒪᔪᒥ ᐊᐅᓚᐅᑎᖃᕐᕕᒥ, ᐃᓂᖃᖅᖢᓂ 21,000 ᒦᑕ ᑭᒃᐹᕆᒃᑐᑎᑐ, QEC ᓇᓂᓚᐅᖅᑖ QEC ᐅᖃᖅᖢᓂ ᐅᑭᐅᖅᑕᖅᑐᒥ ᑲᓇᑕ ᖃᐅᒻᒪᖁᑎᓕᕆᔩ ᑲᒥᓯᓇᖓ ᑲᒪᓚᐅᖅᓯᒪᔪᖅ ᑕᐃᑲᓂ ᑯᕕᑎᓪᓗᒍ. ᒪᐃᔭ ᐅᖃᐅᓯᖃᓚᐅᖅᑐᖅ ᑕᒪᑐᒥᖓ ᑕᐃᑲᓂ ᓄᓇᕗᑦ ᑲᑐᔾᔨᖃᑎᒌᒃ ᐱᔨᑦᑎᕋᖅᑎᒃᑯᓐᓂ ᐊᕐᕌᒍᑕᒫᖅᓯᐅᒻᒥ ᑲᑎᒪᑎᓪᓗᒋ ᐃᖃᓗᐃᑦ ᐊᖅᓵᕐᓃᑦ ᓄᕕᐱᕆ 11. ᑲᑎᒪᔪᓃᖃᑕᐅᔪᑦ ᑐᓴᓚᐅᖅᑐ ᓯᑉᑎᓐ ᐅᖃᖅᑕᖓᓂ ᑭᓇ ᐱᔭᒃᓴᐅᑕᐅᖕᒪᖔᑦ ᐃᓚᒻᒥᖅᑕᐅᓪᓗᓂ ᒥᓯᐅ ᓕᐸᒃ− Hᐊᐅᕗᑦ−ᒧ, ᐃᓱᒪᑖ ᐊᕙᑎᓄ ᓴᐳᔾᔨᔨ ᑕᐃᑲᓂ GN−ᒥ. ᐅᖃᖅᖢᓂ ᑎᑎᕋᕐᕕᐊ ᐱᓕᕆᓇᓱᒃᑲᒥ ᑕᒪᓐᓇ ᐋᕿᒡᓗᒍ ᓇᐅᒃᑯᑐᐃᓐᓇᖅ ᐱᔭᒃᓴᐅᑎᓖ ᐅᓄᓈᖅᓯᒪᓪᓗᑎᒃ ᓱᕈᔪᒃᑕᐅᓯᒪᔪ ᓄᓇᕗᒻᒥ. ᐃᒃᓯᕚᖅᑐᓕᒫ ᐅᖃᖅᑐᐃᓐᓇᐅᖕᒪᑕ ᐱᖏᓐᓂᕋᖅᖢᑎᒃ, ᐊᓯᐊᑕ ᑲᒪᒋᔭᕆᐊᖃᖅᑖ. ᐊᒻᒪᓗ ᖃᓄᐃᓕᐅᖅᐱᑕ ᑕᒡᕙᓂ ᐊᕙᑎᓕᕆᔨᒃᑯᓐᓂ ᐅᓪᓗᒥᒨᖓᓕᖅᑎᑦᑎᓇᓱᖕᒪᑕ ᐊᕙᑎᓄ ᓴᐳᔾᔭᐅᔪᑎ ᒪᓕᒐᒥᒃ,” ᓕᐸᓚᒃ−Hᐊᐅᕗᑦ ᐅᖃᖅᐳᖅ. ᑎᑎᕋᕐᕕᐊ ᑐᓴᖅᓯᒪᔪ ᒪᓕᒐᓄ ᐊᐱᖅᑯᑎ ᐅᖃᐅᓯᓕ ᖃᓄᖅ ᐃᖅᑲᖅᑐᐃᕕᒃᑰᖅᑎᑦᑎᔪᓐᓇᕐᒪᖔᑦ ᒐᕙᒪᒃᑯ ᐃᖕᒥᓄ ᐊᒻᒪᓗ ᐊᓯᖏᓐᓄ ᑎᑎᕋᕐᕕᓄ ᐊᑐᖅᑕᐅᓂᕐᓗᓂᑯᓄ ᐊᕙᑎᒧ. ᓕᐸᓚᒃ−Hᐊᐅᕗᑦ ᐅᖃᖅᖢᓂ ᓱᕈᔪᒃᓯᒪᔪ ᐃᓂᖃᖅᑐ GN−ᑯ ᐱᖁᑎᐊᒍ, ᐱᓪᓗᒍ GN−ᑯ ᐱᓕᕆᐊᒃᓴᓕ ᓴᓗᒻᒪᖅᓴᐃᓗᑎᒃ. “ᐱᑕᖃᖅᑐᖅ ᑕᐃᔭᐅᓯᒪᔪ GN ᐱᓕᕆᐊᒃᓴᖏ ᐊᖏᔪ,” ᓕᐸᓚᒃ−Hᐊᐅᕗᑦ ᐅᖃᖅᐳᖅ. “ᖃᐅᔨᒪᔪᒍ ᓄᓇᓕᑦ ᓴᖅᑭᑎᕆᔪᒪᔪ ᐃᓂᐅᔪᓂ ᓲᖃᐃᒻᒪ ᐃᓂ ᐊᑐᕆᐊᖃᕐᒪᒍ, ᐊᒻᒪᓗ ᐅᓗᕆᐊᓇᖏᑦᑐᒃᑯ ᐊᑐᕈᒪᓪᓗᓂᔾᔪᒃ.” ᐊᕙᑎᓕᕆᔨᒃᑯ ᑐᓴᖅᑎᑦᑎᒐᔪᒃᑐ GN−ᒥᐅᓂ ᐋᓂᐊᖃᖅᑕᐃᓕᒪᑎᑦᑎᔨᒃᑯᓐᓂ ᓱᕈᔪᒃᓯᒪᔪᓂᒡᒎ ᓄᓇᕗᒻᒥ, ᐅᖃᖅᑐᖅ ᓕᐸᓚᒃ−Hᐊᐅᕗᑦ. ᓯᑉᑎᓐ ᐅᖃᖅᖢᓂ ᑎᑭᕋᕐᔪᐊᖅ − ᐊᖏᕐᕋᕆᔭᐅᔪᖅ 500−ᑲᓴᓄ − ᐊᔪᓕᖅᑎᑕᐅᓯᒪᔪ ᓱᕈᔪᖕᒧ ᑲᒪᒋᔭᐅᔭᕆᐊᖃᒻᒪᕆᒃᖢᓂᓗ. “ᑕᒪᓐᓇ ᓄᖅᑲᖓᑎᑦᑎᔪᖅ ᓴᖅᑭᑎᕆᕙᓪᓕᐊᓂ ᓄᓇᓕᖕᒥ, ᐊᒻᒪᓗ ᑲᒪᒋᔭᐅᔭᕆᐊᖃᕐᓇᖅᑑᓪᓗᓂ ᓄᓇᕗᒻᒥ ᐊᑐᖅᑐᒥ, ᓴᖅᑭᑎᕆᔪᓐᓇᕐᓂᖅ ᐊᒻᒪᓗ ᐃᖏᕐᕋᑦᑎᐊᖑᔮᕐᔪᖃᑎᖃᕐᓗᓂ ᐊᓯᖏᓐᓂ ᓄᓇᓕᖕᓂ,” ᐅᖃᖅᐳᖅ.