ᑯᒡᓗᒃᑐᒃ ᐊᖑᓇᓱᒃᑐᓕᕆᔩᑦ ᑲᑎᒪᔨᖏ ᐊᖏᖏᓚᑦ ᑯᕆᔅ ᐸᐃ ᐊᖅᑯᑖᓂ

ᑯᒡᓗᒃᑐᒃ ᐊᖑᓇᓱᒃᑐᓕᕆᔩᑦ ᑲᑎᒪᔨᖏ ᐊᖏᖏᓚᑦ ᑯᕆᔅ ᐸᐃ ᐊᖅᑯᑖᓂ Published 3:10 am Tuesday, July 21, 2026 ᑯᒡᓗᒃᑐ ᐊᖑᓇᓱᒃᑐᓕᕆᔩ ᐃᒃᐱᒍᓱᒃᑐᑦ ᐊᑲᐅᖏᑦᑐᒥᒃ ᑯᕋᐃᔅ ᐸᐃ ᐊᖅᑯᑖ ᐊᒻᒪᓗ ᑐᓚᒃᑕᕐᕕᒃ, ᑲᑎᒪᔨᑦ ᐊᒻᒪᓗ ᐅᓄᖅᑐ ᐃᓄᐃᑦ ᓄᓇᓖ ᑭᐅᓗᒃᑐᑦ ᐊᓐᓇᐅᒪᓇᓱᐊᖅᖢᑎᒃ ᑎᓴᒪᐃᓕᖓᔪᑦ ᑐᒃᑐ ᐊᖅᑯᓵᓲ, ᐊᒻᒪᓗᑦᑕᐅ ᐃᓄᐃᑦ ᐃᓕᖅᑯᓯᐊᓂᒃ. ᐊᔾᔨᓕᐅᒐᖅ ᑕᑯᒃᓴᐅᓚᐅᖅᑐᖅ ᐱᓇᓱᐊᕈᓯᐅᓚᐅᖅᑐᒥ, ᑕᐃᔭᐅᔪᖅ ‘ᑯᒡᓗᒃᑐ ᐊᖑᓇᓱᒃᑏ ᑕᐃᑯᖓ ᕕᐃᕋᐃᔅ ᐸᐃ ᐊᖅᑯᑖ ᐊᒻᒪᓗ ᑐᓚᒃᑕᕐᕕᒃ,’ ᑲᑎᒪᔨᑦ ᐅᖃᖅᑐᑦ ᓇᐃᓴᐅᑎ ᑲᑎᑕᐅᓚᐅᖅᑐᑦ ᐊᓂᒍᖅᑐᒥ ᐊᕐᕌᒍᒐᓴᑦ ᑕᑯᑎᑦᑎᔪᖅ ᐅᓄᕈᓐᓃᖅᐸᓪᓕᐊᓂᖓᑕ ᑐᒃᑑᑉ ᓄᓇᖓᓂ.ᐃᓱᒫᓗᑎᖃᖅᑐᑦ ᑐᒃᓯᕋᖅᑕᐅᔪᑎᒧᑦ ᐊᖅᑯᓯᐅᕐᓂᖅ, ᑕᑭᓂᖃᖅᖢᓂ 230 Km ᑕᐃᑰᓇ ᕿᑎᕐᒥᐅᒃᑯᑦ, ᐊᒃᑐᐃᒃᑲᓐᓂᐅᔭᕈᓐᓇᕐᒪᑦ ᓂᕐᔪᑎᐅᑉ ᐊᐅᓚᓂᕆᔭᖓᑕ ᐊᖅᑯᑖᒍ. ᐊᒻᒪᓗ ᐃᓚᖏ ᐃᕐᐱᒍᓱᒃᖢᑎᒃ ᑕᒪᓐᓇ ᓱᖁᑎᒋᔭᐅᖏᓐᓂᖓᓄ ᒐᕙᒪᓕᕆᔨᑐᖃᒃᑯᓐᓂ ᐊᒻᒪᓗ ᑐᓴᖅᑕᐅᕕᒃᑯᑎᒍ. ᑲᑎᒪᔨᑦ ᐅᖃᖅᑐᑦ ᑐᓴᖅᑕᐅᕝᕖ ᐊᒻᒪᓗ ᐃᑲᔪᖅᓱᐃᔩ ᑕᒪᑐᒧᖓ ᐱᓕᕆᐊᒃᓴᒧ ᐃᓱᒪᔭᖃᑐᐊᕋᒥ ᐃᓚᒋᔭᐅᔾᔪᑎᒧ ᐊᖅᑯᓯᐅᕐᓂᖅ − ᐱᓗᐊᕕᒃᑐᒥ ᐅᔭᕋᒃᓯᐅᖅᑎᑦ ᑲᒻᐸᓂ − ᑭᓯᐊᓂᓕ ᐊᑲᐅᒃᓴᖏᑦᑐᑦ ᓂᐱᖏ ᓲᕐᓗ ᑲᑎᒪᔨ ᓱᖁᑎᒋᔭᖑᖏᓐᓇᒥ. ᑕᕆᔭᒐᒃᓴᖅ, ᓴᖅᑭᑕᐅᓯᒪᔪᖅ ᑕᐃᒃᑯᓇᙵ KAA ᐊᒻᒪᓗ ᑲᓚᐅᑦ ᐱᐊᕆᒃᑯᓐᓂ ᐊᒻᒪᓗ ᓴᖅᑭᔮᖅᑎᑕᐅᓚᐅᖅᖢᓂ ᐱᓇᓱᐊᕈᓯᐅᓚᐅᖅᑐᒥ, ᐃᓚᖃᓚᐅᖅᑐᖅ ᐅᖃᐅᓯᕆᔭᐅᓪᓗᓂ ᑕᕐᕆᔭᓚᐅᖅᑐᓂ ᐊᒻᒪᓗ ᑲᑎᒪᔨᓂ. ᐃᓚᖏ ᐅᖃᖅᖢᑎᒃ ᑐᒃᑐᒡᒎᖅ ᓇᐃᓴᐅᑎᖏ ᐅᓄᕈᓐᓃᖅᐸᓕᐊᖏᓐᓇᖅᐸᑕ, ᐃᓚᖏ ᑐᒃᑐ ᐊᖅᑯᓵᖅᐸᒃᑐᑦ ᐱᑕᖃᕈᓐᓃᑐᐃᓐᓇᕆᐊᖃᕐᒪᑕ. ᕿᖓᐅᑦ ᑐᒃᑐᖏ, ᓲᕐᓗ ᐆᒃᑑᑎᒋᓗᒋ, ᓇᐃᓴᐅᑎᑐᐊᖓ 3,500 ᓂᕐᔪᑎᑦ ᑕᐅᕙᓃᑉᐸᓚᐅᕋᓗᐊᖅᖢᑎᒃ 470,000 ᑕᐅᕙᓂ 1980-ᖏᓐᓂ. ᓇᐃᓴᐅᑎ ᑲᑕᒃᐸᓪᓕᐊᓂᖓ ᑐᒃᑐᓕᒫ ᐊᖅᑯᓵᖅᐸᒃᑐᑦ ᑕᐅᕙᓂ − ᕿᖓᐅᓐᓂ, ᐳᐃᔨᕋᓂ ᓯᑯᒃᑰᖅᐸᒃᑐᑦ, ᐱᕗᓕ ᐊᒻᒪᓗ ᑐᒃᑐᑦ ᑲᓇᖕᓇᓂ − ᑐᑭᖃᖅᑐᖅ ᐃᓄᐃᒡᒎ ᐃᓅᓇᓱᐊᖅᐸᒃᑐᑦ ᐊᖅᑯᓵᖅᐸᒃᑐᓂ ᐊᑯᓂᐊᓘᓕᖅᑐᖅ ᐅᓗᕆᐊᓇᖅᑐᒦᓐᓂᐊᕋᒥ. ᑕᐃᒃᓱᒧᖓ ᑐᓚᒃᑕᕐᕕᖕᒧ ᐊᓱᐃᓛᒃ, HTO−ᑯ ᑭᐅᓘᑎᖃᖅᐳᑦ, ᐅᓗᕆᐊᓇᖅᑐᒦᑎᑦᑎᒐᒥ ᐃᓄᐃᑦ ᐱᔪᓐᓇᐅᑖᓂ ᑎᑎᖃᒃᑯᑦ ᒪᓕᒋᐊᓕ. “ᐱᑕᖃᕋᓗᐊᖅᑎᓪᓗᒍ ᑐᓴᖅᑕᐅᔾᔪᑎᓂ ᑕᐃᒃᑯᐊ ᑲᒪᔪ (ᒐᕙᒪᓕᕆᔨᑐᖃᒃᑯᑦ) ᐱᓕᕆᐊᖓ, HTO−ᑯᓪᓗ ᑭᐅᓘᑎᖃᖅᓯᒪᔪ ᐃᓚᒋᔭᐅᓗᑎᒃ,” ᐅᖃᖅᐳᖅ ᐊᓐᑐᕆᔭ Hᐊᒃ, PhD−ᒥ ᐃᓕᓐᓂᐊᕌᓂᒃᓯᒪᔪᖅ ᐊᒻᒪᓗ ᖃᐅᔨᓴᖅᑎ ᐱᓕᕆᖃᑎᖃᖅᓯᒪᔪᖅ ᐃᑲᔪᖅᖢᓂ ᐊᖑᓇᓱᒃᑐᓕᕆᔨᓂ, ᖃᐅᔨᒪᔭᐅᖕᒥᔪᖅ ᑕᐃᔭᐅᓪᓗᓂ ᑯᒡᓗᒃᑐ ᐊᖑᓐᓇᐃᑦᑎᑦ ᑲᑐᔾᔨᖃᑎᒌᒃ, ᑐᓴᖅᑕᐅᓗᑎᒃ ᐃᓱᒫᓘᑎᖏᑦ. ᖃᐅᔨᓴᖅᓯᒪᐃᓐᓇᕐᒥᔪᖅ ᑐᒃᑐᑦ ᐊᖅᑯᓵᖅᐸᒃᑐᓂ ᓄᓇᒥ ᑎᑭᐅᑎᑲᓴᒃᖢᒍ 10 ᐊᕐᕌᒍᒥ. ᑕᒡᕙᑐᖅ ᑕᐃᖕᓇ ᑕᕐᕆᔮᒐᖅ, ᒪᓂᒪᔪᖅ YouTube−ᑯ, ᐊᑐᖅᑕᐅᓂᐊᖅᑐᖅ ᐃᓚᒋᔭᐅᓗᓂ HTO−ᑯ ᖃᐅᓴᖅᑕᐅᔾᔪᑎᐅᓗᓂ ᑕᐃᒃᑯᓄᖓ ᓄᓇᕗᒻᒥ ᐊᒃᑐᖅᑕᐅᔪᓄ ᕿᒥᕐᕈᔩ ᑲᑎᒪᔨᖏᑎᒍ, ᓱᓕ ᐅᓪᓗᐊ ᓇᓗᓇᕋᓗᐊᖅᑎᓪᓗᒍ ᖃᖓᐅᓂᐊᕐᒪᖔᑦ. HTO ᑭᒡᒐᖅᑐᐃᔨᖏ ᐱᔪᒪᒐᓗᐊᖅᖢᑎᒃ ᑕᑯᒃᓴᐅᑎᑦᑎᓗᑎᒃ ᓇᐃᑦᑐᑯᓗ ᑕᑭᓂᖓ 15-ᒥᓂᔅᒥ ᑕᕐᕆᔮᒐᖅ ᑕᐃᑲᓂ ᑕᕆᔭᖅᑎᑎᑎᓪᓗᒋ. “1997-ᒥ, ᕿᖓᐅᓂ, ᐳᐃᔨᕋᓂ ᐊᖅᑯᓵᖅᐸᒃᑐᑦ 34,558−ᖑᓚᐅᖅᓯᒪᔪ ᓯᕗᓪᓕᕐᒥ ᓇᐃᓴᖅᑕᐅᑎᓪᓗᒋ. ᐅᕙᒃᑯ ᖃᐅᔨᓴᖅᑕᒃᑯ, ᐅᓄᕐᓂᖏ ᑲᑕᒃᓯᒪᓚᐅᖅᓯᒪᔪ ᓄᙳᐊᑕ 1990 ᐊᒻᒪᓗ ᐱᒋᐊᓵᖅᑐᒥ 2000. 2007-ᒥ, 21,753-ᖑᓚᐅᖅᓯᒪᔪ, 2015-ᒥ, ᑲᑕᒋᐊᖅᖢᓂ 18,413, 2018-ᒥ ᓇᐃᓴᐅᑖ 4,105 ᐊᒻᒪᓗ 202-ᒥ, ᓇᐃᓴᐅᑖ 3,815−ᑐᐃᓐᓇᐅᓪᓗᓂ ᑕᐃᑲᓂ ᐊᑐᓂ ᕕᒃᑐᕆᔭᒥ ᐊᒻᒪᓗ ᓄᓇᑐᖃᕐᒥ,” ᐅᖃᖅᐳᖅ Hᐊᒃ. 2023-ᒥ, ᓇᐃᓴᐅᑖ 5,229−ᖑᓪᓗᓂ. “ᐃᒪᐃᑦᑑᖂᕋᓗᐊᖅᑎᓪᓗᒍ ᑐᒃᑐᑦ ᓇᐃᓴᐅᑎᖏ ᓄᖅᖃᖔᖅᑐᑦ ᑭᓯᐊᓂᓕ ᑕᒪᓐᓇ ‘ᐊᑲᐅᓂᖅᖃᖅᑰᖅᑐᖅ ᑕᑯᓪᓗᒍ,” ᐅᖃᖅᐳᖅ Hᐊᒃ. ᐅᖃᕆᓪᓗᓂ ᒐᕙᒪᒃᑯ ᓄᓇᕗᒻᒥ ᑐᒃᑐᑎᑦᑎᔪᓇᐃᓪᓕᓚᐅᖅᓯᒪᔪ, ᓇᐃᓴᐅᑎᓂ ᐊᔾᔨᖃᖅᑎᑦᑎᑐᐃᓐᓇᖅᖢᑎᒃ, ᑭᓯᐊᓂᓕ ᐊᓯᔾᔨᖅᑐ ᑯᑭᓖᑦ ᐃᖏᕐᕋᓂᖅᑐᔫᕝᕖ ᐅᕝᕙᓘᓐᓃᑦ ᐃᕐᓂᐅᕐᕖ ᐊᒃᑐᖅᑕᐅᑐᐃᓐᓇᕆᐊᓕ ᐅᓄᕈᓐᓃᕐᓗᑎᒃ ᐅᕝᕙᓘᓃᑦ ᐱᑕᖃᕈᓐᓃᑦᑎᐊᒻᒪᕆᒡᓗᑎᒃ. ᑕᐅᕗᖓᒃᑲᓐᓂᖅ, ᕿᖓᐅᓂ ᐊᒻᒪᓗ ᐳᐃᔨᕋᓂ ᐊᖅᑯᓵᖅᐸᒃᑐᑦ ᑕᐃᔭᐅᓯᒪᖕᒪᑕ ᐆᒪᔪᑦ ᐅᓗᕆᐊᓇᖅᑐᒦᓂᖏᓐᓂ ᑕᐃᒃᑯᑎᒎᓇ GNWT, ᓄᓇᕗᑦ ᒐᕙᒪ ᑕᐃᓯᐅᕋᐃᕙᖏᒻᒪ ᐃᒪᓐᓇᐅᓂᕋᐃᓪᓗᑎᒃ ᐆᒪᔪᓂ, ᐊᒻᒪᓗ ᒐᕙᒪᓕᕆᔨᑐᖃᒃᑯᑦ ᑕᐅᑐᒃᑕᖃᓚᐅᖅᑐᑦ ᑕᐃᓯᔪᒪᓪᓗᑎᒃ ᕿᖓᐅᓂ ᐊᒻᒪᓗ ᐳᐃᔨᕋᓂ ᐊᓯᐅᕙᓪᓕᐊᔪᑦ. ᐃᖒᓚᐅᖅᓯᒪᔫᖅ, ᑕᐃᖕᓇ ᓄᖃᖏᑎᓪᓗᒍ ᓯᑎᕙᓐ ᑲᓕᐳᒃ ᐊᕙᑎᓕᕆᔨᒃᑯ ᒥᓂᔅᑕ ᐃᓂᐊᓂ. ᐊᑲᐅᒃᓴᓚᐅᖏᑦᑐᖅ ᑲᓂᐅᑉ ᒐᕙᒪᖓᓂ ᑲᒪᑦᑎᐊᖏᓐᓂᖏᓐᓂ ᑲᒪᒋᓗᒍ ᓯᓚ ᐊᓯᔾᔨᖅᐸᓪᓕᐊᓂᖓ. ᐃᓇᖐᔭᐅᓚᐅᖅᑎᓪᓗᒍ, ᔪᓕ ᐊᕕᕙ ᑕᐳᓴᓐ, ᑎᑎᕋᕐᕕᑖᓚᐅᖅᑐᑦ, ᑕᒪᑐᒧᖓ ᒥᒃᓵᓄ ᑐᒃᑑᑉ ᓂᐱᖃᕈᓐᓃᑐᐃᓐᓇᖅᑐᖅ. ᑐᑭᖃᓕᖅᖢᓂ ᑯᐃᔅ ᐸᐃ ᐊᖅᑯᑖ ᐊᒻᒪᓗ ᑐᓚᒃᑕᕐᕕᒃ, ᑕᒪᓐᓇ ᐊᓯᐅᕙᓪᓕᐊᓂᕋᖅᑕᐅᔪᖅ, ᑕᐃᔭᐅᔪᓐᓇᖏᓚᖅ ᐃᓱᒪᒋᔭᐅᓂᖓ ᓄᓇᐅᑉ ᐅᕝᕙᓘᓃᑦ ᓴᐳᑎᓗᒍ ᑕᒪᓐᓇ ᐊᑐᖏᒃᑲᓗᐊᖅᑎᓪᓗᒍ ᐊᖁᑎ. ᒐᕙᒪᓕᕆᔨᑐᖃᒃᑯᑦ ᐊᑐᕆᐊᓕ ᒪᓕᒐᒃᑯᑦ ᓴᒡᕙᐃᓗᑎᒃ ᐃᓂᐅᔪᓂ ᐆᒪᔪᓄ ᑕᐃᒃᑯᐊ ᐊᓯᐅᕙᓪᓕᐊᔪᓄ, ᓱᓕᓪᓗᓂᓗ ᐃᓚᖏ ᑐᒃᑐ ᐊᓯᐅᕙᓪᓕᐊᔪᑦ. ᖃᑐᖅᖅᑐᒥ, ᐃᓚᖏ ᐃᓄᐃᑦ ᓄᓇᖃᖅᑐᑦ ᑕᐃᑲᓂ ᑕᐃᒃᑯᐊ ᖃᐅᔨᓴᖅᑐᑦ ᓇᐃᓴᐅᑎᓂ ᑐᒃᑐᓂ ᐅᖃᖅᑐᑦ ᓴᐳᔾᔭᐅᔪᑎ ᓴᖅᑭᑕᐅᖏᑉᐸᑕ ᑖᒃᑯᓄᖓ ᑐᒃᑐᓄ, ᓇᐃᓴᐅᑎᖏ ᖃᓄᐃᓗᐊᔾᔮᖏᑦᑐᑦ. ᑐᖁᒃᐸᑕ, ᐃᓕᖅᑯᓯᕗᑦᑕᐅ ᐊᒻᒪᓗ ᐊᖑᓇᓱᒃᐸᒃᑐᑦ ᐊᒃᑐᖅᑕᐅᖕᒥᓗᑎᒃ. “ᑖᒃᑯᐊ ᓂᕿᒋᔭᕗ. ᖃᓄᐃᒻᒪ ᑐᓴᖅᑕᐅᓚᐅᖅᓯᒪᖏᓚᒍ? ᐃᓐᓇᑐᖃᑦ ᐅᖃᖅᐸᒃᑐ ᐅᖃᐅᓯᒃᓴᕗ ᐊᓂᑦᑕᕆᐊᖃᖅᑕᕗ. ᑐᓴᖅᑕᐅᔭᕆᐊᖃᖅᑐᒍ,” ᐅᖃᖅᐳᖅ ᐊᓕᓐ ᓂᐸᓇᑎᐊᖅ, HTO ᑲᑎᒪᔨᖏᓐᓄ ᐃᒃᓯᕙᐅᑕᖅ ᐅᖃᖅᓯᒪᔪᖅ ᐃᑲᔪᖅᑐᐃᔾᔮᖏᓐᓇᒥ ᐊᖅᑯᓯᐅᕐᓂᖅ. “(ᒐᕙᒪᓕᕆᔨᑐᖃᒃᑯᑦ) ᖃᐃᔭᕆᐊᓕᑦ ᐊᒻᒪᓗ ᐅᕙᑦᑎᓐᓄ ᐅᖃᓪᓚᒡᓗᑎᒃ ᑭᓯᐊᓂᓕ ᐃᒃᐱᒋᔭᒃᑯᓪᓕ ᑐᓴᖅᑕᐅᓚᐅᖅᓯᒪᖏᓐᓇᑦᑕ. ᑐᓴᖅᑕᐅᔭᕆᐊᓕ ᓇᒥᓕᒫᖅ. ᐊᓯᐅᔨᓂᐊᖅᐳᒍᖅᑲᐃ ᐆᒪᔪᓂ ᓂᕐᔪᑎᓂ, ᑭᓱ ᐱᔾᔪᑕᐅᓗᓂ? “ᓄᓇᕗ ᓇᖕᒥᓂ ᑲᒪᒋᓲᖅ, ᑭᓯᐊᓂᓕ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐊᒻᒪᓗ ᐅᖅᑯᓯᕙᓪᓕᐊᓂᖓ ᓄᓇᕐᔪᐊᑉ ᐊᒃᑐᐃᓯᒪᔪᖅ ᐊᖏᔪᐊᓗᖕᒥ. ᑕᒪᑐᒥᖓ ᐃᓱᒫᓗᑎᖃᖅᑐᖓ. ᐃᓕᖅᑯᓯᕗ ᐊᓯᐅᑐᐃᓐᓇᕆᐊᓕᒃ ᓲᖃᐃᒻᒪ [ᑖᒃᓱᒧᖓ ᐊᖁᑎᒧᑦ], ᑭᓯᐊᓂᓕ ᑕᐃᒪᐃᖁᔨᖏᒃᑲᓗᐊᖅᐳᖓ,” ᓂᐸᓇᑎᐊᖅ ᐅᖃᖅᐳᖅ. Hᐊᒃ ᐅᖃᖅᖢᓂ ᓇᐅᒃᑯᖔᑭᐊᖅ ᓴᖅᑭᑐᖃᕆᐊᓕᒃ ᑕᒪᓐᓇ ᐅᖃᐅᓯᐅᔫᑉ ᒐᕙᒪᓕᕆᔨᑐᖃᒃᑯᑎᒍ ᐊᒻᒪᓗ ᐅᔭᕋᒃᓯᐅᖅᑎᓂ, ᐊᖑᓇᓱᒃᑐᓕᔨᒃᑯᓪᓗ ᐊᐱᖅᓱᐃᔪ ᑭᓇᓕᒫᒥ ᑕᐅᑐᒡᓗᑎᒃ ᑕᕐᕆᔮᒃᓴᒥ, ᐅᖃᐅᓯᒃᓴᒥ ᑐᓂᓯᓗᑎᒃ ᓄᓇᕗ ᐊᒃᑐᐃᔪᓄ ᕿᒥᕐᕈᔨᒃᑯᓐᓄ, ᐊᒻᒪᓗ ᐊᑎᓕᐅᖅᑎᑎᔪᖃᕐᓗᓂ ᑲᔪᖏᖅᓱᐃᔪᖃᕐᓗᓂ ᒪᑕᑐᒧᖓ ᕿᒥᕐᕈᔭᐅᓗᓂ. ᒐᕙᒪᓕᕆᔨᑐᖃᒃᑯᑦ ᐊᔭᐅᖅᑐᐃᔪᑦ ᑐᐊᕕᖅ:ᑎᒃ ᑕᒪᒃᑯᓄᖓ ᐱᓕᕆᐊᒃᓴᕐᔪᐊᓄ, ᑐᓴᖅᑕᐅᔭᕆᐊᓕᑦ ᓇᐅᒃᑯᓕᒫᖅ ᑕᒪᒃᑯᓄᖓ ᐱᓕᕆᐊᒃᓴᓄ, ᑕᐃᒃᑯᓄᖓᓗ ᐅᓗᕆᐊᓲᑎᖃᖅᑐᓄ ᐊᕙᑎᑦᑎᓐᓂ, ᓂᕐᔪᑎᓂ ᐊᒻᒪᓗ ᑭᓇᓕᒫᒧ, ᐅᖃᖅᑐᖅ Hᐊᒃ. ᓯᕗᓂᒃᓴᑦᑎᓐᓂ ᑖᒃᑯᓄᖓᑐᐊᖑᖏᑦᑐᖅ ᑐᒃᑐᓄ ᑭᓯᐊᓂᓕ ᐃᓄᖕᓄᓪᓗ ᐊᖑᓇᓱᒃᐸᒃᑐᓄ, ᐅᖃᖅᐳᖅ.