ᓴᓂᑭᓗᐊᕐᓂ ᓄᓇᓕᖕᒧ ᐱᓕᕆᐊᒃᓴ ᐱᒋᐊᒃᑲᓐᓂᖅᐳ

ᓴᓂᑭᓗᐊᕐᓂ ᓄᓇᓕᖕᒧ ᐱᓕᕆᐊᒃᓴ ᐱᒋᐊᒃᑲᓐᓂᖅᐳ Published 5:00 am Wednesday, December 10, 2025 ᐱᓕᕆᐊᒃᓴᖅᑕᖃᖅᑐᖅ ᓴᓂᑭᓗᐊᕐᒥᐅᓄ ᐃᓚᐅᓗᑎᒃ ᒥᖅᓱᖅᑐᓂ ᑕᐃᑲᓂ hᐊᒻᒪᓚᒃᑯ ᑎᑎᕋᕐᕕᕕᓂᐊᓂ, ᑕᐃᑲᓂ ᐅᑉᓗᕆᐊᖅ ᑲᑐᔾᔨᖃᑎᒌᒃ ᐱᒋᐊᓵᖅᑐᑦ ᓄᓇᓕᖕᒧ ᐱᓕᕆᐊᒃᓴᓂ. ᑎᑭᓪᓗᒍ 10-ᓄ ᐃᓚᐅᔪᖃᕈᓐᓇᖅᑐᖅ ᐊᓂᒍᕌᖓ ᒪᕐᕉᒃ ᐱᓇᓱᐊᕈᓰᒃ. ᐃᓐᓇᑐᖃᑦ ᑐᙵᓱᒃᑐᑦ ᐊᐃᑉᐹᓂ ᕿᑎᖅᑰᓄ, ᐊᒻᒪᓗ 15−ᒥ 50−ᓄ ᐅᑭᐅᓖ ᒥᖅᓱᕐᕕᖃᖅᖢᑎᒃ ᓇᒡᒐᔾᔭ, ᐱᖓᔪᐊᑦ ᐊᒻᒪᓗ ᐅᓪᓗᑐᐃᓐᓇᖅ. ᓄᓇᓕᖕᒥᐅ ᐊᑎᓂ ᑐᓂᔪᓐᓇᖅᑕᓂ ᐃᓚᐅᔪᒪᔪᓄ ᐊᑭᖃᖏᑦᑐᖅ ᒥᖅᓱᕐᓗᑎᓗ ᐳᐊᓗᖕᓂ ᐊᒻᒪᓗ ᔭᐸᓂᒃ, ᐊᒻᒪᓗ ᑭᖑᓪᓕᕐᒥ ᐱᒋᐊᒃᑲᓐᓂᓕᖅᐸᑕ 10-ᑲᓐᓂᓂ ᐊᑎᓂ ᓂᕈᐊᒃᑲᓐᓂᓕᕐᒥᓗᑎᒃ. “ᑭᓇᓕᒫ ᑲᒪᒋᔭᐅᓂᐊᖅᑐᖅ. ᐅᑕᕿᓂᖅ ᑕᒡᕙᑐᐊᖑᕗᖅ. ᐊᒧᓯᓗᑕ, ᐊᑏ ᑎᒍᒍᒃᑯ, ᐊᓱᐃᓛᒃ Facebook−ᑯᑦ ᐅᖃᕐᓗᑕ ᐊᒻᒪᓗ ᓈᓚᐅᑎᒃᑯ ᖃᐃᖁᓗᒋ ᐊᒻᒪᓗ ᐱᒋᐊᖃᑕᐅᓗᑎᑦ ᐱᓕᕆᐊᒃᓴᒥ,” ᐅᖃᖅᐳᖅ ᐊᐃᓴᒃ ᒥᓇᔅ, ᐃᓱᒪᑕᖓ ᐅᑉᓗᕆᐊᖅ ᑲᑐᔾᔨᖃᑎᒌᖏᑦ. $120,000−ᓗᐊᐸᓗ ᒥᖅᓱᒐᒃᓴ, ᐃᓚᖃᖅᖢᓂ 20 ᒥᖅᓲᑎᑦ, ᑎᑭᓚᐅᖅᑐᑦ ᐅᒥᐊᕐᔪᐊᒃᑯᑦ ᐅᑐᐱᕆ 25 ᑭᖑᕝᕙᑰᓪᓗᓂ, ᐊᒻᒪᓗ ᐱᓕᕆᐊᒃᓴ ᐱᒋᐊᓚᐅᖅᓯᒪᓪᓗᓂ ᐱᓇᓱᐊᕈᓯᐊ ᓄᕕᐱᕆ ᐅᒃᑯᐃᓵᖅᑎᓪᓗᒍ. ᓯᕐᓗᐊᖅ ᐅᓯᔭᐅᔪᖅ ᐅᒥᐊᕐᔪᐊᒧ ᐊᖏᓗᐊᓚᐅᕐᒪᑦ ᐅᓯᔭᕆᐊᒃᓴᖅ ᓄᓇᓕᒃᑯ ᓄᓇᓯᐅᑎᖏᓐᓄ ᐊᑐᒃᓗᑎᒃ ᕿᑭᖅᑕᒦᓂᖏᓐᓄ. “ᓲᖃᐃᒻᒪ 40-ᓂ ᐊᓯᒐᒃᑐ ᑕᑭᑎᒋᔪᖅ, ᐅᓯᔪᓐᓇᓚᐅᖏᓐᓇᑦᑎᒍ ᓄᓇᓕᒃᑯ, ᐅᓰᔭᕆᐊᖃᓚᐅᖅᑕᕗ ᐊᒡᒐᒃᑯᑦ, ᓄᓇᓯᐅᑎᒨᖏᑦᑐᖅ,” ᒥᓇᔅ ᐅᖃᖅᐳᖅ. ᒥᖅᓱᕐᓂᖅ ᐱᒋᐊᕈᑕᐅᔪᖅ ᐊᑐᕈᒥᓇᕋᒥ ᐱᓕᕆᐊᒃᓴᓂ ᑲᑐᔾᔨᖃᑎᒌᒃ ᑮᓇᐅᔭᓕᐅᕋᓱᐊᖏᖢᑎᒃ ᐱᓕᕆᕙᓪᓕᐊᔭᓂ. ᒪᒃᑯᒃᑐᓄ ᑐᕌᖓᓗᓂ ᐱᓕᕆᐊᒃᓴᑦ ᑲᒪᒋᔭᐅᓪᓗᑎᒃ ᐅᑉᓗᕆᐊᖅ ᑲᑐᔾᔨᖃᑎᒌᒃᑯ ᐱᓕᕆᐊᖏᒍ, ᑭᓯᐊᓂᓕ ᐃᓂᒃᓴᖃᖏᑕᓂ ᐱᒋᐊᕈᑕᐅᖏᔾᔪᑕᐅᓚᐅᕐᒪᑦ ᐱᒋᐊᕈᑎᐊᒍ. ᐱᙳᐊᕈᑎ hᐊᑭ ᐊᒻᒪᓗ ᑐᒐᕈᑎ ᐋᕿᒃᑕᐅᓚᐅᖅᑐᑦ, ᑭᓯᐊᓂᓕ ᐊᒡᕕᐊᖅᑐ ᐃᓕᓐᓂᐊᕌᓂᒃᑐᓄ ᐅᒃᑯᐃᕐᕕᐊ ᐋᕿᐅᒪᓂᖓᑕ hᐊᒻᒪᓚᕕᓂᐅ, ᓴᓇᔭᐅᔭᕆᐊᖃᖅᑐᒻᒪᕆᑦ ᐃᒐᓛᖏᒍ ᐊᒻᒪᓗ ᓇᑎᐊᒍ. ᓂᐱᓕᐅᕐᕕᒃ ᓂᐱᓕᐅᖅᑎᓄ ᓱᓕ ᓴᓇᔭᐅᔭᕆᐊᓕᒃ ᐊᒻᒪᓗ ᐃᓕᓐᓂᐊᕈᑎᓄ ᐱᙳᐊᕈᑎᓅᖅᑐ ᐋᕿᒃᑕᐅᔭᕆᐊᖃᖅᖢᓂ ᖃᕋᓴᐅᔭᓕᕆᔨᒻᒪᕆᒥᒃ. 70, 80% ᓴᓇᔭᐅᕌᓂᒃᑐᖅ ᐱᒋᐊᒃᑲᓐᓂᓛᖅᖢᑎᓗ ᕿᑎᐊᑕ ᐅᑐᐱᕆᐅᑉ − ᐱᐊᓂᒡᕕᒃᓴᓕ ᑎᓯᐱᕆ 28, ᐅᖃᖅᑐᖅ ᒥᓇᔅ. ᑭᖑᕝᕙᑰᒐᓗᐊᖅᑎᓪᓗᒋ, ᐅᑉᓗᕆᐊᖅ ᑲᑐᔾᔨᖃᑎᒌᒃᑯ ᑐᕌᖅᑕᒥᓂ ᐱᐊᓂᒃᓯᔪᓐᓇᓚᐅᖅᑐᑦ. ᑎᓯᐱᕆ 9-ᖑᓕᖅᐸᑦ, ᒪᒃᑯᒃᑐᒃᑯᕕᖕᒥ ᓄᓇᓕᖕᒥᐅ ᐊᑭᖃᖏᑦᑐᒥ ᑕᒧᓗᕕᖃᕐᓂᐊᖅᑐ ᐊᒻᒪᓗ ᑏᑐᕐᓗᑎᒃ, ᐊᑐᖅᑕᐅᓂᐊᖅᖢᓂ ᐃᒡᓗᕈᓯᖃᕐᓗᑎᒃ ᐊᑐᓂ hᐊᒻᒪᓚᒃᑯ ᑎᑎᕋᕐᕕᕕᓂᐊᓂ ᐱᖁᑎᓪᓗ ᑎᑭᓵᖅᑐᑦ ᐅᒥᐊᕐᔪᐊᒃᑯᑦ ᐊᕐᕌᒍᑦᑎᓐᓂᓵᖅ. ᑕᒪᐃᓐᓄ ᐅᑉᓗᕆᐊᖅ ᑲᑐᔾᔨᖃᑎᒌᒃᑯᑦ ᐱᓕᕆᐊᒃᓴᑦ ᑐᓂᓯᔭᒃᓴᓕ ᑕᒧᓗᒐᒃᓴᓂ. “ᓄᓇᕗᒻᒥ, ᐃᖏᕐᕋᑎᑦᑎᔪᓐᓇᖏᓚᑎ ᑕᒧᓗᒐᒃᓴᖃᖏᒃᑯᕕ. ᑕᒧᓗᒐᒃᓴᖃᖅᑐᒍ ᐊᒻᒪᓗ ᐅᓪᓛᕈᒻᒥᑕᒃᓴᑦ, ᑳᒃᑐᖃᖅᐸᑦ,” ᒥᓇᔅ ᐅᖃᖅᐳᖅ. ᐊᕐᕌᓂ, ᐅᑉᓗᕆᐊᒃ ᑲᑐᔾᔨᖃᑎᒌᒃᑯ ᑐᓂᔭᐅᓚᐅᖅᓯᒪᔪ ᓄᓇᕗᒻᒥᐅᓄ ᒐᕙᒪᖓᓂ ᐃᑲᔫᓯᐊᕐᒥ $141,000 ᐃᖕᒥᓃᖅᑕᐃᓕᒪᑎᑦᑎᓂᕐᒧ, $21,000 ᖃᐅᔨᓴᖅᑐᓕᕆᓂᖅ, $50,000 ᐃᓕᖅᑯᓯᓕᕆᓂᖅ ᐊᒻᒪᓗ $50,000 ᐃᓐᓇᑐᖃᓄ ᐃᓕᖅᑯᓯᓕᕆᓂᖅ.