ᔭᓐ ᒪᐃᓐ ᓂᕈᐊᖅᑕᐅᔪ 7ᒋᔭᐅᔪᓪᓗᓂ ᓄᓇᕗᒻᒥ ᓯᕗᓕᐅᖅᑎᖑᖅᑐᖅ

Published 10:00 am Wednesday, November 26, 2025 7-ᒋᔭᐅᓪᓗᓂ ᓄᓇᕗᑦ ᑲᑎᒪᕕᐊᓂ ᓂᕈᐊᓚᐅᖅᑐᑦ ᐊᕐᕕᐊᑦ−ᑎᑭᕋᕐᔪᐊᑦ MLA-ᖓ ᔭᓐ ᒪᐃᓐ ᓯᕗᓕᐅᖅᑎᖑᖅᖢᓂ ᓄᕕᐱᕆ 18. ᓵᓚᖃᓚᐅᖅᑐᖅ ᑕᐃᕕᑎ ᐊᕿᐊᕈᑉᒥ, MLA ᐃᖃᓗᐃᑦ−ᓂᐊᖁᖒ, ᐊᒻᒪᓗ ᑭᒡᒐᖅᑐᐃᓯᒪᓵᖅᖢᓂ ᖁᑦᑎᒃᑐᕐᒥᐅᓄ. ᑭᖑᓪᓕᕐᒥ ᒐᕙᒪᒃᑯᓐᓂ, ᑲᒪᓚᐅᖅᑐᖅ ᒥᓂᔅᑕ ᐋᓪᓂᐊᕐᕕᓕᕆᔩ, ᒥᓕᔅᑕ ᐱᓕᕆᐊᒃᓴᓕ ᖁᓪᓕᖅ ᐃᑯᒻᒪᖅᑯᑎᓕᕆᔨᒃᑯ ᐊᒻᒪᓗ ᒥᓂᔅᑕ ᐱᓕᕆᐊᒃᓴᓕ ᐃᖕᒥᓃᖅᑕᐃᓕᒪᑎᑦᑎᓂᖅ. ᒪᐃᓐ ᐅᖃᖅᖢᓂ ᐅᖅᓱᐊᓗᒃᓴᓕᕆᓂᖅ ᐊᑐᖅᑕᐅᓪᓗᐊᖅᑐᖅ ᑮᓇᐅᔭᒥ ᓴᒡᕙᐃᔾᔪᑕᐅᓗᓂ ᒐᕙᒪᒃᑯᓐᓄ ᐱᔨᑦᑎᕐᓗᓂ MLA−ᓄ ᐱᒋᐊᓚᐅᕐᓂᖓᓄ ᓯᕗᓕᐅᖅᑎᖑᕐᓗᓂ. “ᐱᑕᖃᖅᑐᖅ ᖃᐅᔨᒪᔭᐅᔪᑦ ᐅᖅᓱᐊᓗᒃᑖᕐᕕᐅᔪᓐᓇᖅᑐᓂ ᓄᓇᕗᒻᒥ,” ᒪᐃᓐ ᐅᖃᖅᐳᖅ, ᐅᖃᐅᓯᖃᖅᖢᓂ ᖁᑦᑎᖕᓂᖅᐹᒥ ᐅᑭᐅᖅᑕᖅᑐᒥ. “ᐱᑖᕆᐊᖃᖅᑐᒻᒪᕆᐅᒐᑦᑕ ᐃᒡᓗᕐᔪᐊᒃᓴᓂ ᐊᒻᒪᓗ ᐱᓕᕆᐊᒃᓴᓂ, ᐃᑲᔪᖅᑕᐅᔾᔪᑎᓂᓪᓗ. ᑮᓇᐅᔭᓂ ᓴᒡᕙᐃᓯᒪᔭᕆᐊᖃᖅᑐᒍ ᑕᐃᒪᐃᑦᑐᒪᒍᑦᑕ. ᑕᒡᕙᑐᖅ ᒐᕙᒪᕗ ᐊᑐᕆᐅᕐᓂᐊᖅᐳ ᐱᓕᕆᐊᒃᓴᒥ ᐅᕝᕙᓘᓃᑦ ᐱᒋᐊᕈᑎᒥᒃ ᕿᒥᕐᕈᓗᑎᒃ ᑮᓇᐅᔭᒥ ᓴᒡᕙᐃᔾᔪᑎᒥᒃ, ᐃᓚᖃᕐᓗᓂ ᐅᖅᓱᐊᓗᒃᓴᒥ.” ᓄᓇᕗᑦ ᐱᖃᖅᑐᖅ 181.43 ᑐᐃᓕᔭᓐ ᐃᓯᖓᑦ ᐊᒡᕗᖅᑕᐅᔪᓐᓇᖅᑐᖅ ᐅᖅᓱᐊᓗᒃᓴᖅ ᐊᒻᒪᓗ 18.25 ᐱᓕᐊᓐ ᖃᑦᑕᐅᔭ ᐊᒡᕗᖅᑕᐅᓗᑎ ᑭᓂᓴᐅᑎᒃᓴ, ᐅᖃᖅᓯᒪᔪᖅ ᓄᓇᓕᕆᔩ ᑲᓇᑕᒥ. ᒪᐃᓐ ᓯᕗᓪᓕᖅᐸᐅᔪᖅ ᐃᓅᖏᖢᓂ ᓄᓇᕗᒻᒥ ᓯᕗᓕᐅᖅᑎᖑᖅᑐᖅ. “ᐱᒃᑯᒍᓱᑦᑎᐊᖅᑐᖓ ᑐᓂᔭᐅᓂᓐᓂ ᑖᒃᓱᒥᖓ ᐱᓕᕆᐊᒃᓴᒥ. ᐱᓕᕆᐊᒃᓴ ᐊᓴᒋᔭᑯᓘᖏᖢᒍ. ᖁᔭᓕᑦᑎᐊᖅᑐᖓ ᐃᖅᑲᓇᐃᔭᖃᑎᓐᓂ ᐅᕙᓐᓂᒃ ᐅᒃᐱᕈᓱᑦᑎᐊᕋᒥᒃ, ᐅᓪᓗ ᐊᓂᒍᕌᖓᑦ.” ᐅᖃᖅᐳᖅ ᒪᐃᓐ, ᐃᓅᓂᑯ ᑐᓛᑐᒥ ᐊᒻᒪᓗ ᐱᕈᖅᓴᔭᐅᓪᓗᓂ ᐊᕐᕕᐊᓂ. ᐅᖃᕈᓐᓇᖅᑐᖅ ᐃᓄᒃᑎᑐᑦ. “ᐊᑐᕐᓂᑯᒋᓪᓗᒎ ᐅᖃᕈᓐᓇᖅᓯᓂᑰᔪᖓ ᐃᓄᒃᑎᑐᑦ ᓄᑕᕋᐅᑎᓪᓗᖓ, ᐱᒃᑯᓇᑦᑎᐊᖅᑐᖅ ᐅᕙᓐᓄᑦ. ᐅᒃᑯᐃᖅᓯᐅᕋᐃᓯᒪᔪ ᐅᕙᓐᓂ ᑭᓱᑐᐃᓐᓇᕐᒥ,” ᐅᖃᖅᐳᖅ. MLA−ᖑᓵᕐᒥᔪᑦ − ᓂᕈᐊᖅᑕᐅᓯᒪᔪᐃᓐᓇᑲᓴᑦ ᐅᑐᐱᕆ 27 ᓄᓇᕗᒻᒥ ᓂᕈᐊᕐᓇᖅ − ᐊᒻᒪᓗᑦᑕᐅ ᕿᑭᖅᑖᓘᑉ ᓂᒋᐊᓂ MLA ᑕᐃᕕᑎ ᔪᐊᓇᓯ ᐅᖃᖅᑎᖑᓵᖅᖢᓂ. ᑲᒪᓂᐊᖅᑐᖅ ᐃᖏᕋᑎᓪᓗᓂᒋ ᒪᓕᒐᑦ ᑲᑎᒪᕕᐅ ᐃᓗᐊᓂ, ᒪᓕᒃᑲᓗᐊᕐᒪᖔᑦ ᐊᒻᒪᓗ ᐱᑦᑎᐊᕐᓂᖅᑕᖃᐃᓐᓇᕐᓗᓂ. ᔪᐊᓇᓯ ᐱᒃᑯᒋᔭᐅᑦᑎᐊᓚᐅᖅᑐᖅ ᓂᕈᐊᖅᑕᐅᕕᐊᓂ. ᓄᑖ GN−ᑯᓐᓄ ᑲᑎᒪᔨᐅᓕᖅᑐ ᑕᐃᓯᒪᕗ: -ᐊᓂ ᑕᑦᑐᐃᓂ, MLA ᑲᖏᖅᖠᓂᖅ ᓂᒋᐊ -ᐳᕋᐃᔭᓐ ᑕᑦᑐᐃᓂ, MLA ᑐᓄᓂᖅ -ᓯᓯᓕᐊ ᓂᐅᕙᓇ ᓚᐃᔪ, MLA ᓇᑦᑎᓕᒃ -ᑯᕆᒃ ᓯᒪᐃᓛᒃ, MLA ᖃᒪᓂᑦᑐᐊᖅ -ᑕᐃᕕᑎ ᐊᕿᐊᕈᖅ, MLA ᐃᖃᓗᐃᑦ ᓂᐊᖁᙴ -ᔪᐊᔾᔨ Hᐃᒃᖦ, MLA ᐃᖃᓗᐃᑦ -ᑯᐃᓐ Hᐃᓕ ᐊᑭᐊᒍᒃ, MLA ᐃᖃᓗᐃᑦ−ᒪᓂᒐᔭᒃ -ᔭᓂᑦ ᐳᕈᔅᑐ, MLA ᐃᖃᓗᐃᑦ−ᓰᓈ ᓯᕗᓕᐅᖅᑎ ᔭᓐ ᒪᐃᓐ ᑐᓂᓯᓂᐊᖅᑐᖅ ᐱᓕᕆᐊᒃᓴᓂ ᐊᑐᓂ ᑲᑎᓴᔨ ᒥᓂᔅᑕᓂ. 9 MLA ᑕᐃᔭᐅᓚᐅᖅᑐᑦ ᑲᑎᒪᔨᒧ, ᐊᒻᒪᓗ ᐊᑕᐅᓯᑐᐊᖅ, ᑲᖏᖅᖠᓂᖅ ᐅᐊᖕᓈ−ᐃᒡᓗᓕᒑᕐᔪᒃ MLA ᐊᓕᒃᓵᓐᑐ ᓴᒻᒧᖅᑐᖅ, ᓂᕈᐊᖅᑕᐅᔭᖏ ᐅᓄᖏᓗᐊᓵᕐᒪᑕ ᐃᓚᐅᔭᕆᐊᒃᓴ ᑲᑎᒪᔨᓂ. ᐃᓚᖏ 14 ᑲᑎᒪᔨ ᑕᐃᑲᓂ ᑲᑎᒪᕕᖕᒥ MLA ᐃᓂᐊᑕ ᐃᓂᐊᓂ ᐱᓕᕆᐊᒃᓴᖃᕐᓂᐊᖅᑐᑦ.