ᐅᖓᑖᓄ 400 ᓄᓇᓯᐅᑎᕐᔪᐊᑦ ᐅᓯᔪ ᓯᐅᕋᕐᒥ ᐃᑲᔪᓚᐅᖅᑐᑦ ᖃᑦᑎᖅᑎᓇᓱᒃᖢᑎ ᑲᖏᖅᖠᓂᕐᒥ ᐊᒃᑕᕐᕕᒃ ᐃᑯᐊᓚᔪᖅ ᐅᓪᓗᓄ 10ᓄ

Published 3:10 am Friday, July 24, 2026 ᖃᑦᑎᕆᔨ 14, hᐊᒻᒪᓚᒃᑯ ᐱᔨᑦᑎᖅᑎᖏ, ᓄᓇᓯᐅᑎᕐᔪᐊᓕᕆᔩ, ᐅᖓᑖᓄ 400 ᑕᑕᑕᐅᓪᓗᓂ ᐊᒃᑕᕈᑎ ᓯᐅᕋᕐᒥ ᑕᐃᑲᙵ ᐃᓄᒃᓱᒃ ᕿᔪᓕᕆᔨᒃᑯᓐᓂ, ᐊᒻᒪᓗ ᐃᑲᔪᖅᑕᐅᓪᓗᑎᒃ ᐊᓐᔨᑯ ᐃᑯᑯ ᐅᔭᕋᒃᓯᐅᖅᑎᖏᓐᓂ ᓄᖃᖅᑎᑕᐅᓇᓱᒃᖢᓂ ᑲᖏᖅᖠᓂᕐᒥ ᐊᒃᑕᕐᕕᐊ ᐃᑯᐊᓚᔪᖅ ᐃᑯᐊᓛᓚᐅᖅᑎᓪᓗᒍ ᐅᓪᓗᓄ 10-ᓄ. ᖄᖓ ᖃᑦᑎᖅᑕᐅᕌᓪᓚᓚᐅᖅᑎᓪᓗᒍ, ᖃᑦᑎᕆᔨᒻᒪᕆᒃ ᒪᒃ ᕋᐃᔭᑦ ᐅᖃᓚᐅᖅᑐᖅ ᓄᓇᓕ ᑕᑯᑐᐃᓐᓇᕆᐊᓕ ᐳᔪᕐᒥ ᐊᒻᒪᓗ ᓇᐃᓚᐅᖅᐸᒡᓗᑎ ᐱᓇᓱᐊᕈᓯᒐᓴᖕᓄ ᓲᖃᐃᒻᒪ ᐃᑯᐊᓚᔪᖅ ᐃᓗᕙᓯᖕᒪᑦ ᐊᑖᓂ ᐊᒃᑕᕐᕕᐅᑉ. “ᖃᒥᓯᒪᔪᖅ,” ᕋᐃᔭᑦ ᐅᖃᖅᐳᖅ. ᓱᓕ ᑕᑯᓂᐊᖅᑐᑎᑦ ᐳᔪᕐᒥ ᐃᓛᓐᓂᒃᑯᑦ ᓲᖃᐃᒻᒪ ᑕᐃᒪᐃᑎᓪᓗᒍ ᐊᒃᑕᕐᕕᒃ ᑕᑕᓯᒪᔪᖅ ᑭᓱᕈᓘᔭᕐᒥᒃ. ᐱᑕᖃᖏᑦᑎᐊᕐᒪ ᐱᐅᖅᓱᐊᒃᑯᕕᖕᒥ.” ᖃᑦᑎᕆᔨ ᐅᖃᖅᖢᓂ ᐊᒃᑕᕐᕕ ᐊᑐᖅᑕᐅᓕᕋᒥ ᐊᕐᕌᒍᒐᓴᓄ ᖄᓕᐅᖅᐸᓪᓕᐊᓪᓗᓂ ᐊᒃᑕᕐᓗᑯᓂ, ᐋᕿᒃᓯᓪᓗᓂ ᐃᓗᕙᓯᒃᑐᒥ ᓄᓇᒧ ᑕᐃᑲᓂᓗ ᐃᑯᐊᓚᐃᓐᓇᖅᖢᓂ ᓄᖅᑲᑦᑎᐊᖏᑦᑐᒥ. “ᖄᖓ ᐃᑯᐊᓚᔪᓐᓃᖅᑐᖅ,” ᐅᖃᖅᐳᖅ. “ᐃᑯᐊᓚᔪᖅ ᐊᑖᓂ ᓱᓕ ᐃᑯᐊᓚᕗᖅ ᑲᔪᓯᓪᓗᓂᓗ ᐊᕐᕌᒍᒐᓴᖕᓄ.” ᐅᖃᖅᖢᓂᓗ ᑕᐃᒪᐃᒐᔪᒃᑲᒥ ᑕᑯᓗᓂ ᐳᔪᕐᒥ ᑕᐃᑲᙵ ᐊᒃᑕᕐᕕᖕᒥ, ᐅᑭᐅᖓᒐᓗᐊᖅᐸᓪᓘᓐᓃ. “ᑕᑯᓂᐊᖅᑐᒍᓪᓘᓐᓂ ᐳᔪᕐᒥ ᐅᑭᐅᒃᑯᑦ ᑕᐃᑲᙵ ᐊᒃᑕᕐᕕᖕᒥ. ᐳᔪᐊᕐᔪᖕᒥ.” ᖃᑦᑎᕋᓱᒡᓗᒍ ᐃᑯᐊᓚᔪᖅ ᐱᔭᕆᐊᖃᓚᐅᖅᑐᖅ 400-ᖏᖅᓱᖅᖢᒍ ᐊᒃᑕᐅᑎ ᑕᑕᖢᒍ ᓯᐅᕋᕐᒥ, ᐊᒃᑕᖅᑕᐅᕈᓘᔭᖅᖢᓂ ᓇᐅᒃᑯᓕᒫ ᐊᒃᑕᕐᕕᒃ ᓄᖃᖅᑎᓐᓇᓱᒡᓗᒍ ᐃᑯᐊᓚᔪᖅ ᓄᖃᖅᑎᖢᒍᓗ ᐊᓂᕐᓂᖃᐅᑎ, ᕋᐃᔭᑦ ᐅᖃᖅᐳᖅ. ᖃᑦᑎᕆᔨᒃᑯᑦ ᐅᓪᓗᓄ ᑕᓪᓕᒪᓄ ᖃᑦᑎᕆᓚᐅᕐᒥᔪᑦ ᐃᒪᕐᒧ ᐅᓪᓗᓄ ᑕᓪᓕᒪᓄ, ᑭᓯᐊᓂᓕ ᐱᓇᔪᒃᑕᓂ ᐃᑲᔫᑕᐅᓚᐅᖏᓚᖅ ᑲᔪᓰᓐᓇᕈᓐᓇᖏᓐᓂᖓᓄ ᐃᒪ ᑕᐃᑲᓂ ᐊᒃᑕᕐᕕᖕᒥ. “ᐱᖃᖏᓐᓇᑦᑕ ᑯᕕᕕᒥᒃ ᖃᑦᑎᕆᔨᓄ,” ᕋᐃᔭᑦ ᐅᖃᖅᐳᖅ. “ᑎᖕᒥᑳᖅᑎᑎᑐᐃᓐᓇᕐᓇᖅᑐᖅ ᐃᒪᕐᒥ ᒪᕐᕉᒃ−ᐱᖓᓱᓪᓗ ᒥᓂᑦᒥᒃ ᐊᒻᒪᓗ ᐅᑕᕿᓐᓇᖅᖢᓂ ᐃᒥᖅᑕᐅᑎᒥᒃ ᐃᒥᖅᓯᓂᐊᕋᒥ ᖃᑦᑎᕈᑎᒥᒃ.” ᑕᐃᑲᓂᕈᔪᒃ ᐅᓪᓗ 9 ᐃᑯᐊᓚᓕᖅᑎᓪᓗᒍ, ᐊᓐᔨᑯ ᐃᑯᑯ ᐅᔭᕋᒃᓯᐅᖅᑎ ᖃᐃᑎᑕᐅᓚᐅᖅᑐ ᐃᑲᔪᕐᓂᐊᕋᒥ ᐃᒪᖃᖅᑎᑎᓗᑎᒃ ᑕᐃᑲᙵ ᑕᕆᐅᕐᒥ ᐅᖓᓯᒃᑎᒋᔪᖅ 1 ᑭᓚᒥᑕᒥ 6” ᓱᓗ ᑕᐃᑯᖓ ᐊᒃᑕᕐᕕᖕᒧ. “ᐱᔪᓐᓇᖅᓯᓕᓚᐅᖅᑐᒍ ᑲᔪᓯᔪᒥ ᐃᒪᕐᒧ ᐅᓪᓗ ᐊᒻᒪᓗ ᓇᒃᐹᓂ, ᐊᒻᒪᓗ ᖃᒥᑦᑎᔪᓐᓇᖅᓕᓚᐅᖅᐳ,” ᕋᐃᔭᑦ ᐅᖃᖅᐳᖅ. “ᑕᐃᖕᓇ, ᑲᑎᖢᒍᓗ hᐊᒻᒪᓚᒃᑯ ᓯᐅᕋᐅᔾᔨᓂᖓ, ᐊᓂᒍᐃᔪᓐᓇᖅᓯᓚᐅᖅᐳᒍ ᐱᓕᕆᐊᑦᑎᓐᓂ ᖃᒥᓪᓗᒍ ᐃᑯᐊᓚᔪᖅ. “ᐳᔪᖅᑕᖄᕐᔪᒃᐸᑦ, ᓇᐃᒪᓂᐊᖅᑕᑦ ᑕᑯᖏᒃᑲᓗᐊᕈᕕᐅ,” ᐅᖃᕆᕗᖅ. ᕋᐃᔭᑦ ᐅᒃᑐᖅᖢᓂᐅᒃ ᐊᒃᑕᕐᕕᒃ ᑕᐃᑲᓂᕈᔪ 50 ᐊᒻᒪᓗ 70 ᐃᓯᒐᓪᓗᐊ, ᖃᒧᖓᒃᑲᓐᓂᐅᑐᐃᓐᓇᕆᐊᓕᒃ ᓲᖃᐃᒻᒪ ᑲᑎᑉᐸᓪᓕᐊᔪᖅ ᐊᕐᕌᒍᒐᓴᖕᓄ ᐊᒃᑕᕐᓂᑯ. “ᐅᖃᕐᓗᖓ ᐊᒃᑕᕐᕕᒃ, ᑲᑎᑉᐸᓪᓕᐊᔪᖅ ᐊᕐᕌᒍᒐᓴᖕᓄ, ᐃᒪᓐᓇᕈᔪᖃᐃ 50-70 ᐃᓯᒐᓪᓗᐊ (15-20 ᒥᑕ) ᖃᒧᖓ,” ᐅᖃᖅᐳᖅ. “ᓇᕿᑎᓯᒪᔪᖅ, ᑭᓯᐊᓂ ᓱᓕ ᐃᑯᐊᓚᓲᖑᕗᖅ.” ᐅᖃᖅᖢᓂ ᓴᐅᕙᓪᓕᐊᓗᒍ ᐊᒃᑕᑕᕐᕕᒃ ᑕᐅᓄᖓ ᓯᐅᕋᕐᒧ ᐃᑲᔫᑕᐅᔪᓐᓇᖅᑐᖅ ᐊᓂᕐᓂᖃᕐᓇᖏᓕᖅᑎᓪᓗᒍ ᑎᑭᐅᑎᖁᓇᒍ ᐅᓄᖓ ᐅᓇᕐᓂᒧ. ᕋᐃᔭᑦ ᐱᒃᑯᒍᓱᓚᐅᖅᐳᖅ ᑭᓇᓕᒫ ᐃᑲᔪᓚᐅᖅᑐᓄ ᑲᒪᔪ ᐃᑯᐊᓚᔪᒥᒃ. “ᖁᔭᓕᓇᔭᖅᑐᖓ ᐱᓕᕆᕐᔪᐊᖅᑐᓄ ᑕᐃᒃᑯᓄᖓ ᖃᑦᑎᕆᔨᓄ ᖃᐃᓚᐅᖅᑐ ᐅᓐᓄᐊᖓᓂ,” ᐅᖃᖅᐳᖅ. “ᐱᓕᕆᕐᔪᐊᕐᓇᓵᕐᒪᑦ ᑭᓇᓕᒫᒧᑦ.” ᐃᓕᓴᕆᐅᒪᓪᓗᓂᒋᓗ ᐱᓇᔪᒃᑐᑦ hᐊᒻᒪᓗᒃᑯ ᐱᔨᖅᑎᑦᑎᖏ. “ᑕᖃᓱᐃᑦᑑᓪᓗᑎᒃ ᐱᓕᕇᓐᓇᓵᖅᑐ ᐊᒃᑕᕐᕕᖕᒥ,” ᐅᖃᖅᐳᖅ. “ᐱᓕᕆᕐᔪᐊᓵᖅᑐᑦ ᑕᒪᑐᒧᖓ, ᐊᒻᒪᓗ ᖃᒥᓯᒪᓯᔪᖅ, ᐊᒻᒪᓗ ᑕᐃᒪᑐᖅ ᖃᒥᓯᒪᑯᑖᖕᓂᐊᖅᐳᖅ. ᑭᓱ ᐃᑯᐊᓚᔾᔪᑕᐅᓚᐅᕐᖔᑦ ᓱᓕ ᖃᐅᔨᓴᖅᑕᐅᔪᖅ ᐊᒻᒪᓗ ᐃᓱᒪᖏᔭᐅᓂᐊᖅᖢᓂ ᐱᔮᖅᑯᒧᑦ ᓲᖃᐃᒻᒪ ᖃᐅᔨᓴᖅᑕᐅᔾᔪᑎᐊ ᖃᐅᔨᔭᐅᔪᓐᓇᖏᒻᒪ ᖃᓄᖅ ᐱᖏᐊᓚᐅᕐᒪᖔᑦ. ᕋᐃᔭᑦ ᐅᖃᖅᖢᓂ ᐃᑯᐊᓪᓚᒍᓐᓇᕐᒪᑦ ᖃᓄᑐᐃᓐᓇᖅ, ᐅᑯᐊᓪᓗᐊ ᓴᕕᕋᔭᒃᓴ ᐆᓇᖅᓯᓗᐊᖅᑎᓪᓗᒍ, ᓯᕿᓂᖅᑕᐅᔪᖅ ᐃᒡᒐᐅᔭᒃᑯᑦ, ᐹᑕᓖ ᐅᕝᕙᓘᓃᑦ ᐅᓇᖅᓯᓗᐊᔭᑦᑐᓄ. ᓇᓗᓇᐃᖅᓯᒋᓪᓗᓂ, ᐃᓚᖓᒍ, ᐃᑯᐊᓚᔪ ᐃᑯᐊᓪᓚᒃᑎᑕᐅᑐᐃᓐᓇᕆᐊᖃᕋᒥ ᐱᔮᖅᑯᒧ. “ᑕᐃᒪᐃᒐᔪᒃᖢᓂ, ᐃᓚᖏ ᖃᓄᐃᓕᐅᒐᒃᓴᖃᖏᓗᐊᖅᑐᑦ ᐊᒻᒪᓗ ᐱᓕᕆᐊᖃᓕᖅᐸᒃᖢᑎᒃ, ᐅᖅᓱᒥᑦᑎᐊᕐᔪᓚᐅᖅᑕ ᐊᒻᒪᓗ ᐃᑯᐊᓪᓚᒃᑎᑦᑎᓗᑕ,” ᐅᖃᖅᐳᖅ. ᐅᖃᕆᓪᓗᓂ ᑲᖏᖅᖠᓂᖅ ᐊᑐᖅᓯᒪᒐᒥ ᐊᒃᑕᕐᕕᒃ ᐃᑯᐊᓚᔪᖅ ᐊᕐᕌᒍᑕᒫᖅ ᐊᑐᖅᑐᒥ 11 ᐊᕐᕌᒍ ᓄᓇᓕᖕᒥ. ᕋᐃᔭᑦ ᐅᖃᖅᖢᓂ ᖃᑦᑎᕆᔨᒃᑯ ᓴᖏᒃᑎᒋᐊᖅᓯᒪᔪ ᐱᖃᑎᖃᓕᖅᖢᑎᒃ ᐊᓐᔨᑯ ᐃᑯᑯ ᐅᔭᕋᒃᓯᐅᖅᑎᖏᓐᓂ, ᑕᐃᒪᓐᓇ ᐱᔪᓐᓇᖅᑎᑎᓇᔭᖅᑐᖅ ᖃᑦᑎᕆᔨᓂ ᑲᒪᑲᐅᑦᑐᕈᓐᓇᕐᓗᑎᒃ ᐃᑯᐊᓚᕐᔪᐊᖅᑐᖃᕋᔭᖅᐸ ᐊᒃᑕᕐᕕᖕᒥ. “ᑭᓯᐊᓂᓕ ᓇᓪᓕᐅᒃᑯᒫᖅᑐᖃᖏᑉᐸ, ᐊᒻᒪᓗ ᐅᓄᖅᑐ ᑕᐃᑯᖔᖅᐸᖕᒪᑕ ᐊᒃᑕᕐᕕᖕᒧ ᐃᑯᐊᓚᓲ, ᖃᓅᕝᕕᒃᑕᖃᓗᐊᖏᑉᐳᖅ,” ᐅᖃᖅᐳᖅ.