ᓴᕐᓕᕐᒥ ᐃᓕᓐᓂᐊᖅᑎ ᐱᔪᒪᒐᓗᐊᖅᐳᖅ ᐃᓄᐃᑦ ᓂᐱᖏ ᐃᓕᓴᕆᔭᐅᓗᑎᒃ ᐃᓕᓐᓂᐊᖅᑐᓕᕆᔨᒃᑯ ᒪᓕᒋᐊᓕᖕᓄ

ᓴᕐᓕᕐᒥ ᐃᓕᓐᓂᐊᖅᑎ ᐱᔪᒪᒐᓗᐊᖅᐳᖅ ᐃᓄᐃᑦ ᓂᐱᖏ ᐃᓕᓴᕆᔭᐅᓗᑎᒃ ᐃᓕᓐᓂᐊᖅᑐᓕᕆᔨᒃᑯ ᒪᓕᒋᐊᓕᖕᓄ Published 6:33 pm Monday, October 5, 2026 ᑲᐃᑦᓚᓐ ‘ᓴᑕᐅ’ ᒪᒃᓕᓐ ᐃᖅᑲᐅᒪᔪᖅ ᑎᑭᑎᓪᓗᒍ ᐃᓕᓐᓂᐊᕐᕕᖕᒧ ᓯᓚᑖᓂ ᓄᓇᕗᑦ ᐊᒻᒪᓗ ᖃᐅᔨᓕᖅᖢᓂ ᖃᓄᑎᒋ ᑭᖑᕝᕙᑰᖕᒪᖔᑦ ᐅᖃᓕᒫᕐᓂᒃᑯ. ᐃᓕᓐᓂᕐᕕᖃᖅᖢᓂ ᓴᓪᓕᕐᒥ ᐃᓕᓐᓂᐊᓕᓵᖅᑐᓂ ᐱᒋᐊᖅᖢᓂ ᑭᑎᐅᑎᓪᓗᒍ ᐊᔪᖏᓐᓂᖅ 3 ᑭᒥᐊᓂᓕ ᐅᖃᓕᒫᓂᐊ ᓲᕐᓗ ᐃᓕᓐᓂᐊᓕᓵᖅᑐᑎᑐ ᐃᓚᒌ ᓅᑎᓪᓗᒋ. ᐊᑐᕐᓂᑯᐊ ᐊᑕᐃᓐᓇᖅᖢᓂ. ᒫᓐᓇᐅᔪᖅ ᐊᓂᒍᐃᓇᓱᓕᖅᑐᖅ ᓯᓚᑦᑐᖅᓴᕐᕕᒡᔪᐊᓂ ᐃᓕᓐᓂᐊᕈᑎ ᒪᓕᒋᐊᓕᖕᓄ, ᒪᒃᓕᓐ ᖃᐅᔨᓴᖅᑐᖅ ᑭᒡᓕᖃᐅᑎ ᐃᓄᐃᑦ ᐃᓕᓐᓂᐊᖅᑎᓄ ᐊᑐᖅᑕᒥᓂ ᐊᒻᒪᓗ ᖃᓄᖅ ᐃᓕᓐᓂᐊᕐᑐᓕᕆᓂᖅ ᒪᓕᒋᐊᓕ ᐊᑲᐅᓯᒋᐊᕈᓐᓇᕐᒪᖔᑦ. ᐃᓚᒋᔭᐅᖃᑕᐅᔪᖅ ᐊᕐᕕᓂᓕᑦ ᐃᓚᐅᔪᑦ ᑕᐃᒃᑯᑎᒎᓇ 2026 ᐊᑦᑐᕈ ᑯᓴᐅᑦ ᑮᓇᐅᔭᓄ ᐃᑲᔫᑎ, ᑐᓂᔭᐅᔪ $9,000 ᐅᖓᑖᓄ ᐱᖓᓱᑦ ᐊᕐᕌᒍᑦ ᐊᓂᒍᖅᑐᒥ ᐊᑐᖅᑎᓪᓗᒍ. ᑐᓴᐅᑦ ᓄᓇᓕᖕᓄ ᑭᒡᒐᖅᑐᐃᔨᐅᓚᐅᖅᓯᒪᔪᖅ ᐊᒻᒪᓗ CEO−ᖑᓪᓗᓂ ᐅᑭᐅᖅᑕᖅᑐᒥ ᑯᐊᐸᓕᕆᔨᕐᔪᐊᓄ ᐃᑲᔪᕐᓂᑯ ᑐᑭᒧᐊᖅᑎᑦᑎᔨᐅᓪᓗᓂ ᑯᐊᐳᕆᔭᒃᑯ ᐃᖏᕐᕋᓯᒋᐊᕐᓂᖓᓄ ᐅᑭᐅᖅᑕᖅᑐᒥ. ᐃᓅᔪᓐᓃᕐᓂᑯ 2021-ᒥ. “ᑐᓂᔭᐅᓪᓗᓂ ᑮᓇᐅᔭᒥ ᐃᑲᔫᑎᒥ ᐅᕙᓐᓂ ᑐᓂᓯᔪᖅ ᐅᒃᑯᐃᖅᑎᑦᑎᓂᖅᓴᐅᓪᓗᓂ ᐊᑐᕈᒪᔭᓐᓂ ᐃᓕᓴᕆᔭᐅᔾᔪᑎᑖᕐᓗᖓ ᐊᒻᒪᓗ ᖃᐅᔨᓴᖅᑕᓐᓄ, ᐃᓱᒫᓘᑎᒃᓴᖃᓗᐊᖏᓐᓂᖅᓴᐅᓗᖓ ᑮᓇᐅᔭᒥᒃ ᐃᓕᓐᓂᐊᖅᑎᐅᑎᓪᓗᖓ,” ᐅᖃᖅᐳᖅ ᒪᒃᓕᓐ. “ᐃᑲᔪᖅᓱᖅᑕᐅᑎᓪᓗᖓ ᐅᕙᓐᓂ ᐱᔪᓐᓇᖅᑎᑎᓂᖅᓴᐅᔪᖅ ᑲᔪᓯᓗᖓ ᐱᕙᓪᓕᐊᓂᕐᒧ ᐊᑐᕆᐅᕐᓂᐊᖅᑕᓐᓄ ᐊᒻᒪᓗ ᐃᓱᒪᒋᔭᖃᕈᓐᓇᐅᑎᒋᓪᓗᒍ ᖃᐅᔨᓴᕈᑎᓄ ᐊᒻᒪᓗ ᑕᒡᕙᑐᖅ ᐊᑑᑎᖃᕐᓂᐊᖅᐳᖅ ᐃᓄᐃᑦ ᐃᓕᓐᓂᐊᖅᑎᓄ ᐊᒻᒪᓗ ᓄᓇᓕᖕᓄ ᓯᕗᓂᑦᑎᓐᓂ.” ᐱᕈᕐᓂᑯ ᓴᓪᓕᓂ ᓅᓚᐅᖏᑎᓪᓗᒍ ᓄᓇᑦᑎᐊᕐᒧ. ᐅᑎᖅᐸᓚᐅᖅᓯᒪᔪᖅ ᑭᕙᓪᓕᕐᒧ ᐊᐅᔭᑕᒫᖅ ᐅᐸᒋᐊᖅᑐᖅᖢᓂ ᐃᓚᒥᓂ, ᐊᒻᒪᓗ ᐊᓯᐅᔨᓚᐅᖅᓯᒪᖏᑕᓂ ᓄᓇᓂ ᓅᑉᐸᒃᑲᓗᐊᖅᑎᓪᓗᒍ. ᐊᖓᔪᖅᑳᓂ ᐅᑎᓚᐅᖅᓯᒪᔪ ᓄᓇᕗᒻᒧ ᐊᕐᕌᒍ ᒪᕐᕉᒃ ᐊᓂᒍᖅᑐᖅ, ᐊᒻᒪᓗ ᑕᐃᑯᙵᐅᓂᖅᓴᐅᖏᓐᓇᓕᖅᖢᓂ. ᓯᓚᑦᑐᖅᓴᕐᕕᒡᔪᐊᒧ ᐱᒋᐊᓚᐅᖅᓯᒪᔪᖅ ᐃᓕᓐᓂᐊᕆᐊᖅᖢᓂ ᓯᓚᑦᑐᖅᓴᕐᕕᒡᔪᐊᖅ ᐊᐅᐳᑕᒥ ᓄᓇᖃᑳᖅᑐᓄ ᐃᓕᓴᐃᔨᖑᖅᓴᓂᕐᒧ, ᓂᕆᐅᒃᖢᓂ ᐃᓕᓴᐃᔨᖑᕐᓗᓂ. ᐱᐊᓂᓕᖅᑎᓪᓗᒍ ᐊᓂᒍᕐᕕᐊᑕ ᓯᓚᑦᑐᖅᓴᕐᕕᖕᒥ ᐃᓕᓴᕆᔭᐅᔾᔪᑎᑖᕐᖢᓂ ᐃᓕᓐᓂᐊᖅᑐᓕᕆᓂᖅ, ᐅᔾᔨᕆᓕᓚᐅᖅᓯᒪᔪᖅ ᐱᔪᒪᓂᖅᓴᐅᓂᖓᓄ ᐊᐱᖅᑯᑎᖃᖅᖢᓂ ᖃᓄᖅ ᐃᓕᓐᓂᐊᖅᑐᓕᕆᓂᖅ ᐃᖏᕐᕋᖕᒪᖔᑦ ᐃᓕᓴᐃᔨᐅᖏᖔᕐᓗᓂ ᐃᓕᓐᓂᐊᕐᕕᐊᕈᓯᒥ. ᒪᒃᓕᓐ ᐊᓂᒍᐃᓚᐅᖅᑐᖅ ᐃᓕᓴᕆᔭᐅᔾᔪᑎᑖᕐᓗᓂ ᐊᒻᒪᓗ ᐃᓕᓐᓂᐊᒃᑲᓐᓂᐅᔭᓕᖅᖢᓂ, ᐃᓱᒪᒋᔭᓂ ᐊᔾᔨᒌᖏᓂᖓ ᓄᓇᕗᒻᒥ, ᐃᓄᐃᑦ ᐃᓕᓐᓂᐊᖅᑎᑦ ᐊᑐᖅᑕᖏᓐᓂ ᐊᒻᒪᓗ ᐅᒃᑯᐃᖓᔾᔪᑎ ᐃᓕᓐᓂᐊᕆᐊᒃᑲᓐᓂᕈᑎᓄ ᓯᓚᑦᑐᖅᓴᕐᕕᓄ. ᓂᕆᐅᒋᔭᓕᒃ ᐊᓂᒍᐃᓗᓂ ᓯᓚᑦᑐᖅᓴᕐᕕᒡᔪᐊᓂ ᐃᓕᓴᕆᔭᐅᔾᔪᑎᑖᕐᓗᓂ ᐊᐃᕆᓕᒥ. ᐃᓚᖓ ᐃᓕᓐᓂᐊᖅᑕᓂ ᐃᓕᓐᓂᐊᕐᕕᖕᒥ ᐊᔪᕐᓇᖅᑐᖅᓯᐅᖅᑐ ᐃᓕᓐᓂᐊᖅᑎ ᓄᓇᓕᕋᓛᖑᓂᖅᓴᐅᔪᓂ ᐊᑐᖅᐸᒃᑐ ᐱᓇᔪᓕᕌᖓᑕ ᓯᓚᑦᑐᖅᓴᕐᕕᒡᔪᐊᒧ. ᒪᒃᓕᓐ ᐅᖃᖅᖢᓂ ᐃᓕᓐᓂᐊᕐᕕᑦ, ᓲᕐᓗᓕ ᑕᐃᑲᓂ ᓴᓪᓕᓂ, ᑐᓂᓯᕙᖏᓐᓇᒥ ᐊᔾᔨᐊᓂ ᐃᓕᓐᓂᐊᕈᑎᒥ ᒪᓂᒪᖏᖢᓂ ᓇᒥᒥᐊᖅ. ᐃᓕᓐᓂᐊᖅᑎᑦ ᐅᔾᔨᕆᕙᖏᖢᑎᒃ ᐃᓕᓐᓂᐊᖅᓯᒪᓪᓗᐊᕐᓂᖏᓐᓄ ᐃᓕᓐᓂᐊᕆᐊᖃᖅᑕᒥᓂ ᐱᓇᔪᓕᖅᐸᑕ ᐃᓕᓐᓂᐊᖅᓯᒪᒃᑲᓐᓂᕐᓗᑎᒃ ᑭᓯᐊᓂᓕ ᐱᓇᔪᖕᓇᖅᓯᑎᓪᓗᒍ. ᐅᑎᕈᔾᔨᕙᒃᑐᑦ, ᐊᒻᒪᓗ ᐃᓕᓐᓂᐊᒃᑲᓐᓂᕆᐊᖃᖅᐸᒃᖢᑎᒃ ᐅᕝᕙᓘᓃᑦ ᓯᓚᑦᑐᖅᓴᕐᕕᓕᐊᕐᓗᑎᒃ ᐃᓕᑦᑎᒃᑲᓐᓂᕐᓗᑎᒃ ᓯᓚᑦᑐᖅᓴᕐᕕᒡᔪᐊᓕᐊᓚᐅᖏᑎᓪᓗᒋ,” ᐅᖃᖅᐳᖅ. ᓄᑕᕋᐅᑎᓪᓗᒍ ᐊᑐᕐᓂᑯᐊ ᐃᑲᔫᑕᐅᕙᒃᑐᖅ ᑐᑭᓯᓪᓗᓂ ᑭᓱ ᓵᓐᓂᐊᕐᒪᖔᕆᓂ, ᑭᓯᐊᓂᓕ ᒪᒃᓕᓐ ᖃᐅᔨᓴᕈᒪᔪᖅ ᖃᐅᔨᓗᓂ ᐃᓕᓐᓂᐊᖅᑎᑦ ᐊᒻᒪᓗ ᓄᓇᓕᑦ ᐅᖃᖅᑕᖓᒍ ᐱᔭᕆᐊᖃᖅᑕᓂ. ᓴᓪᓕᕐᒥ, ᐱᖃᓐᓇᕆᔭᖃᐅᖅᑐᖅ ᐱᕈᖅᐸᓪᓕᐊᑎᓪᓗᒍ. ᐅᒃᐱᕈᓱᒃᑐᖅ ᐅᒃᐱᕆᔭᐅᓂᖅ ᐱᒻᒪᕆᐅᓂᖓᓂ ᐊᐱᕆᔭᕆᐊᖃᓕᕌᖓᒥ ᐊᑐᖅᑕᐅᓂᑯᓂ. “ᓄᓇᓕᖕᓂ, ᖃᐅᔨᒪᔭᐅᔪᖓ,” ᐅᖃᖅᐳᖅ. “ᐱᖃᓐᓇᕆᔭᖄᓂᒃᑐᖓ, ᐊᒻᒪᓗ ᑲᔪᓯᓪᓗᑕ.” ᒪᒃᓕᓐ ᑕᑯᖕᒥᔪᖅ ᐊᑯᑦᑐᔪᒥᒃ ᓯᓚᑦᑐᖅᓴᕐᕕᒡᔪᐊᖅ ᐃᓕᓐᓂᐊᕐᕕᐊᕈᓯᐊᓂ ᑕᐃᑲᓂ ᐃᓕᓐᓂᐊᕐᕕᒋᔮᓂ. ᐱᓕᕆᐊᓂ ᐃᓚᖃᕋᓗᐊᖅᑎᓪᓗᒍ ᓄᓇᖃᖅᑳᖅᓯᒪᔪ ᐃᓕᓴᐃᔨᓂ ᐊᒻᒪᓗ ᑕᐅᑐᙳᐊᖅᑕᐅᔪᓂ, ᐅᖃᖅᖢᓂ ᐃᓄᐃᑦ ᓂᐱᖏ ᑕᑯᒃᓴᐅᖏᓐᓂᖅᓵᐅᔪᑦ. ᐱᔪᒪᒐᓗᐊᖅᖢᓂ ᐃᑲᔪᕐᓗᓂ ᓴᖅᑭᑦᑎᓂᖅ ᐃᓂᒥ ᐃᓄᐃᑦ ᖃᐅᔨᒪᔭᖓᒍ ᐊᒻᒪᓗ ᐊᑐᖅᓯᒪᔭᖓᒍ ᐃᓕᓐᓂᐊᕐᑐᓕᕆᔨᒃᑯᓐᓂ. ᑕᓐᓇ ᐃᓚᖃᕐᓗᓂ ᑐᓴᖅᑕᐅᓂᖅᓴᐅᓗᓂ ᐃᓄᐃᑦ ᖃᐅᔨᒪᔭᑐᖃᖏ, ᐅᕝᕙᓘᓃᑦ IQ, ᐊᒻᒪᓗ ᐃᓂᒥ ᐃᓄᐃᑦ ᐃᒃᐱᒋᔮᒍ ᖃᐅᔨᓴᕐᕕᐊᑕ ᑲᑎᕝᕕᐅᕙᒃᑐᒥ ᐃᖃᓗᖕᓂ. ᐅᔾᔨᖅᓱᖅᑐᖅ ᑭᒡᓕᖃᐅᑎᖓᓂ ᐊᑐᕐᓂᑯᖏᓐᓂ ᑭᓯᐊᓂᓕ ᑲᔪᖏᖅᓴᐃᕗᖅ ᐱᓕᕆᐊᕐᓂ ᑕᑯᓂᑯᖓᑦᑎᒍ. ᐱᖃᓐᓇᕆᔮᓗ ᐃᓅᕕᒃᒥᐅᑕᖅ ᐱᔪᓐᓇᓚᐅᖅᑐᑦ ᐊᓪᓗᕐᓗᑎᒃ ᐅᖃᐅᓯᕆᓗᓂᔾᔪᒃ ᐱᑕᖃᓗᐊᖏᓐᓂᖓᓄ ᑭᒡᒐᖅᑐᐃᓂᖅ ᐱᓕᕆᐊᒃᓴᒥᓂ. ᒪᒃᓕᓐ ᐃᓕᓐᓂᐊᕆᐊᖃᖅᑎᓪᓗᒍ ᐅᐱᕐᖔᒥ ᐊᒻᒪᓗ ᓇᓂᓯᓚᐅᖅᖢᓂ ᐊᑐᒐᒃᓴᐅᔪᓐᓇᖅᑐᓂ ᓈᒻᒪᒃᑑᔪᓂ, ᓵᖅᑭᑦᑎᓚᐅᖅᑐᑦ ᓇᖕᒥᓂ ᖃᐅᔨᓴᐃᓂᖅ ᓴᖅᑭᑎᔪ ᐃᓄᐃᑦ ᑕᐅᑐᙳᐊᖅᑕᖓᒍ ᐃᓕᓐᓂᐊᑐᓕᕆᔨᒃᑯᓐᓂ. ᐊᓂᒍᐃᓚᐅᖅᑐᑦ ᐃᓕᓐᓂᐊᕈᑎᒥᓂ ᐊᒻᒪᓗ ᓴᖅᑭᑎᖢᓂᒋ ᐃᓱᒫᓘᑎᑦ ᑭᒡᒐᖅᑐᐃᔾᔪᑎᓄ ᑕᐃᑯᓄᖓ ᑐᓂᓪᓗᓂᒋ ᓄᓇᖃᖅᑳᖅᓯᒪᔪᓄ ᐃᓕᓴᐅᔨᖑᖅᓴᓂᕐᒧ ᐱᓕᕆᐊᖅᓴᒧ. ᒪᒃᓕᓐ ᐅᖃᖅᖢᓂ ᑕᒡᕙᑐᖅ ᑐᓴᖅᑎᔾᔪᑕᐅᓂᐊᖅᐳ ᐃᓕᑦᑎᓚᐅᖅᑕᓂ ᑕᐃᑰᓇ ᐱᓕᒻᒪᒃᓴᖅᑕᐅᓂᕐᒧ ᐱᕙᓪᓕᐊᓂᒃᑯ ᐃᓕᑦᑎᔭᓂ ᐅᕝᕙᓘᓃᑦ ᐃᓕᓐᓂᐊᖅᑎᔾᔪᑕᐅᓗᑎᒃ ᐃᓕᓐᓂᐊᕈᑎ ᓴᖅᑭᓚᐅᖅᑕᓂ. ᐱᒋᐊᓚᐅᖅᑐᖅ ᐱᓇᔪᑎᒃᑯ PhD−ᑖᕋᓱᒃᖢᓂ ᐊᒻᒪᓗ ᑲᔪᓯᓗᓂ ᐃᓕᓐᓂᐊᖅᑕᒥᓂ ᑕᐃᑯᖓ ᐅᑭᐊᒃᓵᖅ 2027. ᐊᖏᖅᑕᐅᒃᐸᑦ, ᐱᔪᒃᓯᔪᒪᔪᖅ ᑲᔪᓯᓗᒍ ᐃᓄᐃᑦ−ᑕᐅᑐᒃᑖᒍ ᐊᒻᒪᓗ ᐃᓄᐃᑦ−ᑐᑭᒧᐊᖅᑕᖓᒍ ᖃᐅᔨᓴᕐᓂᖅ ᐃᓕᓐᓂᐊᕈᑎᒃᑯ ᐊᒻᒪᓗ ᐃᓕᓐᓂᐊᖅᑎ ᐊᑐᖅᑕᖓᒍ. ᐊᑯᓂ ᐊᑐᖅᑐᒥ, ᒪᒃᓂᓐ ᐱᔪᒪᒐᓗᐊᖅᖢᓂ ᐅᑎᕐᓗᓂ ᓄᓇᕗᒻᒧ, ᑕᐃᑲᓂ ᐃᓚᓂ ᓄᓇᓖ ᐊᒻᒪᓗ ᑕᐃᑲᓂ ᐃᖅᑲᓇᐃᔭᕐᕕᖃᕐᓗᓂ ᐊᒃᑐᐃᔪᒥ. ᐃᓕᓴᐃᔨᐅᔪᒪᔪᖅ ᓯᓚᑦᑐᖅᓴᕐᕕᒡᔪᐊᒥ, ᐅᒃᑯᐃᖅᑐᖃᕋᔭᖅᐸᑦ. ᐱᔪᒪᓪᓗᓂᓄ ᐱᓕᕆᖃᑕᐅᓗᓂ ᒪᓕᒋᐊᓕᕆᔪᓄ ᖃᐅᔨᓴᖅᑎ ᒐᕙᒪᒃᑯᓐᓄ ᐅᕝᕙᓘᓃᑦ ᑎᒥᐅᔪᓄ. “ᐊᑐᕈᒪᔭᕋ ᑖᓐᓇ ᖃᐅᔨᓴᐅᑎ ᐊᒻᒪᓗ ᐃᓕᑦᑎᓯᒪᔭᕋ ᐃᑲᔫᑕᐅᓗᓂ ᒪᓕᒋᐊᓕᖕᓄ ᐊᒻᒪᓗ ᐃᓄᐃᑦ ᑕᐅᑐᙳᐊᖅᑕᖏ ᐊᑐᖅᑕᐅᒐᓗᐊᕐᒪᖔᑕ ᑭᒡᒐᖅᑑᑕᐅᓗᑎᒃ ᐸᕐᓇᐃᓂᒃᑯᑦ ᐊᒃᑐᐃᔪ ᐃᓕᓐᓂᐊᖅᑎᓂ ᐊᒻᒪᓗ ᓄᓇᓕᖕᓂ.” ᑮᓇᐅᔭᖅᑖᖅᑐ ᐃᑲᔫᑎᒥᒃ ᓵᓚᒃᓴᖅᑐᑦ ᑲᖏᖅᖠᓂᕐᒥ ᐅᑯᐊ ᒪᕆ ᐸᓐᓕᑲᓐ ᐊᒻᒪᓗ ᔨᓚ ᓴᕕᐊᕐᔪᒃ. ᐸᓐᓕᑲᓐ ᐃᓕᓐᓂᐊᕆᐅᖅᑐᖅ ᐊᕐᕌᒍᓕᒫᖅ ᓯᓚᑦᑐᖅᓴᕐᕕᒡᔪᐊᖅ ᒪᓂᑐᐸᒥ ᐅᓂᐲᒃ, ᐱᒋᐊᓚᐅᖏᓐᓂᖓᓂ ᐃᓕᓴᕆᔭᐅᔾᔪᑎᑖᕐᓗᓂ ᐃᓕᓐᓂᐊᖅᑐᓕᕆᓂᕐᒧ ᑕᐃᑲᓂ. ᐱᔪᒪᒐᓗᐊᕆᓪᓗᓂ ᖃᐅᔨᒪᔭᖏ ᑐᓂᓗᓂᒋ ᓄᓇᕗᒻᒧ ᐃᓕᓐᓂᐊᕌᓂᒃᐸᑦ. “ᓴᓇᔪᒪᐃᓐᓇᐅᔭᕋᒪ ᐃᓂᒥ ᑐᓂᓯᔪᓐᓇᕐᓗᖓ ᐊᓯᔾᔩᓂᖅ ᐃᓅᓯᕐᓂ, ᐊᒻᒪᓗ ᐃᖢᐊᖅᓴᐃᔨᖑᖅᓴᓂ ᐅᕙᓐᓃᓚᐅᖅᑐᖅ ᓲᖃᐃᒻᒪ ᐱᓕᕆᓐᓇᕐᒪ ᐅᒪᔪᓐᓇᐅᑎᓕᕆᓂᖅ, ᐊᑐᕈᒪᔭᕋ ᐊᒻᒪᓗ ᑭᒡᒐᖅᑐᐃᓂᖅ.” ᐸᓕᑲᓐ ᐅᖃᖅᐳᖅ. ᓅᖢᓂ ᑲᖏᖅᖠᓂᕐᒥ ᐅᐃᓂᐱᒃᒧ ᐊᓪᓗᕆᐊᕐᔪᐊᖅᓯᒪᔪᖅ, ᐅᖃᕆᕗᖅ. ᐃᓕᓐᓂᐊᕐᕕᐊᕈᓯᐊ ᐃᓄᓕᒃ 120 ᐃᓕᓐᓂᐊᖅᑎ. “ᐊᖅᑯᑎ ᐊᑐᖅᑕ ᐊᔾᔨᒋᔭᐅᔭᕆᐊᖃᖏᓚᖅ ᑭᓇᓕᒫᒧ. ᑐᕌᖅᑕᖃᕈᕕᑦ ᐃᒃᐱᒋᔭᒃᑯᑦ, ᐱᒋᐊᓕᕆ. ᑭᖑᕙᕐᓂᖅᑕᖃᖏᓚᖅ ᐱᔪᒪᔭᕐᓂ ᐊᑐᕆᐊᕐᓗᑎᑦ ᐃᓅᓯᓐᓄ ᐃᓕᖕᓄ, ᐅᒃᑯᐃᖓᔪᓂ ᐱᑕᖃᖅᑐᖅ.” ᐸᓐᓕᑲᓐ ᓇᓗᓇᐃᖅᐳᖅ.