ᖃᑦᑎᕆᔨᐅᕌᓪᓚᓚᐅᖅᖢᓂ ᑲᒪᔨᐅᓕᖅᑐᖅ ᐃᓐᓇᑐᖃᓂ

ᖃᑦᑎᕆᔨᐅᕌᓪᓚᓚᐅᖅᖢᓂ ᑲᒪᔨᐅᓕᖅᑐᖅ ᐃᓐᓇᑐᖃᓂ Published 8:16 am Friday, August 7, 2026 ᐳᕆᑕᓂ ᐊᒡᒐᒃ ᐃᓚᐅᓕᖅᑎᓪᓗᒍ ᑲᖏᖅᖠᓂᕐᒥ ᖃᑦᑎᕆᔨᓂ ᐅᑭᐅᖃᖅᑎᓪᓗᒍ 18-ᓂ, ᐃᓕᓐᓂᐊᓚᐅᖅᓯᒪᔪᖅ ᓱᓕ ᐊᖏᓂᖅᓴ ᐃᓕᓐᓂᐊᕐᕕᐊᓂ, ᐱᕈᖅᓴᐃᓪᓗᓂ ᐃᕐᓂᒥᓂ ᐊᒻᒪᓗ ᕿᓂᑐᐃᓐᓇᖅᖢᓂ ᐃᖅᑲᓇᐃᔭᓚᐅᑲᒡᕕᒋᓂᐊᖅᑖᓂ ᐊᐅᔭᒃᑯᑦ. ᐊᓂᒍᖅᑎᓪᓗᒍ 9 ᐊᕐᕌᒍᑦ, ᑎᑭᐅᑎᓪᓗᓂ ᖃᑦᑎᕆᔨᒻᒪᕆᐅ ᐃᓂᐊᓂ ᐊᒻᒪᓗ ᑲᒪᑲᐅᑦᑐᖅᐸᒃᖢᓂ ᑐᐊᕕᕐᓇᖅᑐᖅᑕᖃᓕᕌᖓᒥ ᐃᑯᐊᓚᔪᒧ ᓄᓇᓕᖕᒥᓂ, ᐊᒡᒐᒃ ᐅᖃᐅᓯᖃᕈᓐᓇᖅᑐᖅ ᖃᓄᐃᒻᒪ ᑭᐅᔨᐅᓚᐅᕐᒪᖔᑦ ᐅᖃᐅᓯᐊᕐᔪᒃᑯᑦ. “ᐅᕙᖓᐅᖏᑉᐸᑦ, ᑭᓇᓕ?” ᐅᖃᖅᐳᖅ. “ᑲᒪᒋᔾᔮᖏᒃᑯᒃᑯ ᑭᐊᓕ ᑲᒪᒋᓂᐊᕐᒪᒍ, ᑭᐊ ᑲᒪᒋᓂᐊᖅᐹ?” ᐅᓪᓗᒥ, ᐊᒡᒐᒃ ᑭᐅᓕᖅᑐᖅ ᐊᔾᔨᒋᖏᑖᒍ. ᑭᐳᑦᑎᓚᐅᕋᒥ ᖃᑦᑎᕆᔨᐅᓂᕐᒥ ᐊᓯᐊᓄᖔ ᑲᒪᓕᖅᖢᓂ ᐋᓐᓂᐊᕐᕕᖕᒥ, ᐃᖅᑲᓇᐃᔭᖅᖢᓂ ᑲᒪᔨᐅᓂᖅ ᐊᒻᒪᓗ ᑲᒪᓪᓗᓂ ᐃᓐᓇᑐᖃᓂ ᑕᐃᑲᓂ ᑭᕙᓪᓕᖅ ᑲᒪᒋᔭᐅᖏᓐᓇᖅᑐᒃᑯᕕᖕᒥ ᑲᖏᖅᖠᓂᕐᒥ. ᒪᕐᕉᒃ ᐱᓕᕆᐊᒃᓵ ᐊᔪᕐᓇᕈᒥᓇᖅᑑᒃ, ᑭᓯᐊᓂᓕ ᐃᑲᔪᖅᖢᓂ ᐊᓯᒥᓂ ᐅᒻᒪᑎᒥᓃᒻᒪ ᐊᑐᓂ. “ᐊᓕᐊᓇᐃᑐᐃᓐᓇᕐᒪᑦ ᖃᐅᔨᒪᓪᓗᓂ ᐃᑲᔪᓚᐅᕐᓂᓐᓂ, ᐊᒻᒪᓗ ᑲᔪᓯᓗᖓ ᐃᑲᔪᕈᓐᓇᖅᐳᖓ ᓄᓇᓕᓐᓂ,” ᐅᖃᐅᓯᖃᖅᑐᖅ ᐊᓯᔾᔨᖅᑎᓪᓗᒍ ᖃᑦᑎᕆᔨᐅᕌᓪᓚᓚᐅᖅᖢᓂ ᑲᒪᓕᖅᖢᓂᓗ ᐃᓐᓇᑐᖃᓂᒃ. ᐃᓚᖓ ᐊᒡᒐᐅᑉ ᐃᖅᑲᐅᒪᓂᖅᐹᖓ ᐊᑐᖅᑕᒥᓂ ᑕᐃᑲᓂ ᖃᑦᑎᕆᕝᕕᖕᒥ ᖃᑦᑎᕆᔨᒻᒪᕆᖑᖅᑎᑕᐅᑎᓪᓗᒍ. ᓂᕆᐅᒋᓚᐅᖅᓯᒪᖏᑖ ᑎᒃᑯᐊᖅᑕᐅᑎᓪᓗᒍ, ᑭᓯᐊᓂᓕ ᐃᒃᐱᒋᓂᖅᐹᖓ ᑐᓴᖅᑎᓪᓗᒍ ᖃᑦᑎᕆᔨᒻᒪᕆᒃ ᒪᒃ ᕋᐃᔭᑦ ᐃᖅᑲᐅᒪᑎᓪᓗᒍ ᖃᓄᑎᒋ ᐊᓯᔾᔨᖅᑐᒻᒪᕆᐅᖕᒪᖔᑦ ᑕᐃᒪᙵᓂ ᖃᑦᑎᕆᔨᖑᓚᐅᕐᒪᖔᑦ ᓂᐱᑭᑦᑑᓪᓗᓂ ᐊᒻᒪᓗ ᑐᑭᓯᐊᑦᑎᐊᖅᖢᓂ ᐃᖅᑲᓇᐃᔭᓚᐅᑲᒃᑐᖅ ᐊᐅᔭᒥ. “ᐅᖃᖅᖢᓂ ᐱᒋᐊᖅᑎᓪᓗᒍ ᖃᑦᑎᕆᔨᑐᐃᓐᓇᐅᓚᐅᖅᑐᖅ ᐊᒻᒪᓗ ᑕᒃᐸᐅᖓᕆᐊᖅᐸᓪᓕᐊᓪᓗᓂ ᐅᒃᑯᐃᒃᑲᓂᕈᑎᒋᓚᐅᖅᑕᕋ ᐊᒻᒪᓗ ᐅᓪᓗᒥᐅᔪᖅ ᐅᕙᖓᐅᔾᔪᑎᒋᕙᕋ.” ᐊᒡᒐᒃ ᐅᖃᖅᐳᖅ. ᕋᐃᔭᑦ ᕿᐊᓱᙳᓚᐅᖅᑐᖅ ᐅᖃᐅᓯᖃᓕᖅᑎᓪᓗᒍ ᐱᕙᓪᓕᐊᔭᒥᓂ, ᐊᒻᒪᓗ ᐅᖃᐅᓯᕆᔭᐅᑎᓪᓗᒍ ᐅᔾᔨᕆᓕᖅᖢᓂ ᐊᒡᒐᒃ ᐱᓕᕆᖃᑎᒋᔭᖏ ᑕᐅᑐᒃᑐᑦ ᐱᕈᖅᑐᖅ ᐊᕐᕌᒍᒐᓴᓄ. ᑲᖏᖅᖠᓂᕐᒥ ᖃᑦᑎᕆᔨ EMS ᖃᕋᓴᐅᔭᒃᑯᑦ Facebook ᑎᑎᕋᖅᑕᐅᔪᖅ, ᑕᐃᔭᐅᓪᓗᓂ “ᑐᑭᒧᐊᖅᑎᑦᑎᔨ ᖃᑦᑎᕆᔨᓂ ᐊᒻᒪᓗ ᑐᐊᕕᕐᓇᖅᑐᓕᕆᔨᓂ.” ᐊᑯᓂ ᐊᕐᕌᒍᓄ ᖃᑦᑎᕆᔨᓂ ᐱᔨᑦᑎᕋᕐᓂᖅ, ᐊᒡᒐᒃ ᐊᓯᐊᓄ ᓅᑉᐸᓪᓕᐊᓕᓚᐅᖅᑐᖅ ᓄᑖᕐᒧ ᐱᔨᑦᑎᕋᖅᑎᐅᓂᕐᒧ. ᐃᓕᓐᓂᐊᓕᓚᐅᖅᑐᖅ ᓄᓇᕗᑦ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖕᒥ 6-ᓄ ᑕᖅᑭᓄ ᐃᓕᓐᓂᐊᖅᖢᓂ ᐃᑲᔪᖅᑎᐅᓂᕐᒧ ᐱᓕᕆᐊᒃᓴ, ᐅᒃᑯᐃᖅᓯᓪᓗᓂ ᐊᓐᓂᐊᕐᕕᖕᒧ ᐊᒻᒪᓗ ᐃᓂᑖᕈᑎᒋᓪᓗᓂᐅ ᒫᓐᓇᐅᔪᖅ ᐃᓂᒥᓂ ᑕᐃᑲᓂ ᑭᕙᓪᓕᖅ ᐃᑲᔪᖅᑕᐅᖏᓐᓚᕆᐊᖃᖅᑐᒃᑯᕕᖕᒥ. ᐅᖃᒃᑲᓐᓂᕐᓗᖓ, ᐊᖓᔪᐊᑕ ᑲᔪᖏᖅᓱᓚᐅᖅᑖ ᐱᒋᐊᖁᓪᓗᓂᐅᒃ. “ᐊᓕᐊᓇᐃᒋᓂᐊᖅᑕᑦ ᐃᑲᔪᕐᓗᑎ ᐊᓯᒥ. ᐊᓕᐊᓇᐃᒋᓂᐊᖅᑕᑦ ᑲᒪᔨᐅᓂᖅ,” ᐊᒡᒐᒃ ᐃᖅᑲᐅᒪᕗᖅ ᐊᖓᔪᐊᑕ ᐱᓇᔪᖁᑎᓪᓗᓂᐅᒃ. “ᐊᔭᐅᖅᑐᐃᔪᒻᒪᐅᔪᖅ ᐅᕙᓐᓂ ᐊᑲᐅᔪᒦᓪᓗᖓ, ᐊᒻᒪᓗ ᖁᔭᒋᑦᑎᐊᖅᐸᕋ.” ᐅᖃᖅᖢᓂ ᐃᓚᓂ ᑕᑯᓯᒪᔪᖅ ᖃᓄᑎᒋ ᐊᓕᐊᓇᐃᒋᔭᖃᕐᒪᖔᑦ ᖃᑦᑎᕆᕝᕕᖕᒥ. ᑕᑯᓯᒪᖕᒥᔪ ᐋᓐᓂᐊᕈᑎᖃᖅᖢᓂ ᐃᓱᒪᒥᒍ ᐊᒻᒪᓗ ᒪᑭᒃᑲᓐᓂᖅᖢᓂ. ᐊᒡᒐᒃ ᐊᓂᒍᐃᓯᒪᔪᖅ 90 ᐃᑲᕐᕋᓄ ᐱᓕᒻᒪᒃᓴᖅᑕᐅᓂᖅ ᑕᐃᑲᓂ ᑭᕙᓪᓕ ᑲᒪᒋᔭᐅᖏᓐᓇᕆᐊᖃᖅᑐᒃᑯᕕ ᐃᓕᓐᓂᐊᖅᑎᐅᓪᓗᓂ ᑕᐃᑲᓂ ᐃᖅᑲᓇᐃᔭᓚᐅᖏᑎᓪᓗᒍ. ᓂᕈᐊᖅᑕᐅᓚᐅᖅᑐᖅ ᐃᖅᑲᓇᐃᔮᒥ ᐊᒻᒪᓗ ᐃᖅᑲᓇᐃᔭᕐᕕᒌᓐᓇᓕᖅᖢᓂᐅᒃ ᑕᐃᒪᙵᓂ ᑕᖅᑭᓄ ᐱᖓᓱᓄ. ᐃᑲᔪᖅᑎᐅᓪᓗᓂ, ᑲᒪᕙᒃᑐᖅ ᐃᓂᒃᓯᒪᔪᓂ ᐃᑲᔪᖅᑕᐅᔭᕆᐊᓕᖕᓂ. ᐃᓚᖏ ᐃᑲᔪᖅᑕᐅᓂᖅᓴᐅᔭᕆᐊᖃᖅᖢᑎᒃ ᐊᓯᒥ, ᑭᓯᐊᓂᓕ ᐊᒡᒐᕐᒧ, ᐱᓕᕆᐊᓂ ᑲᒪᓐᓇᖅᑐᖅ ᐃᒃᐱᖕᓇᖅᑐᒃᑯᑦ. “ᑲᒪᔪᓐᓇᖅᑐᖓ ᐃᓐᓇᑐᖃᓂᒃ, ᐅᕝᕙᓘᓐᓃᑦ ᐅᓂᒃᓯᒪᔪᑦ ᑕᐃᑲᓂ, ᑲᒪᒋᔭᐅᓂᑰᔪᖓ ᐃᓐᓇᕐᓄ ᐃᓚᒃᑲᓂ,” ᐅᖃᖅᐳᖅ. ᐅᖃᐅᓯᕆᓪᓗᓂᐅᒃ “ᐱᓕᕆᓐᓇᖅᑐᖅ,” ᐊᒡᒐᒃ ᑕᐃᔭᓂ ᐱᓕᕆᐊᒃᓴᓂ “ᐱᓕᕆᔪᒪᓯᒪᔭᓂ ᐃᓂᓂ.” “ᐃᖅᑲᓇᐃᔭᕆᐊᖅᐸᒃᑐᖓ ᖃᐅᑕᒫ ᖃᐅᔨᒪᓂᓐᓄ ᐱᓕᕆᐊᒃᓴᖃᕐᓂᐊᕋᒪ,” ᐅᖃᖅᐳᖅ. “ᐊᖏᕐᕋᐅᕙᒃᑐᖓ ᖃᐅᔨᒪᓪᓗᖓ ᖃᓄᐃᓕᐅᖅᑲᐅᓂᓐᓂ, ᐊᒻᒪᓗ ᐊᔾᔨᒋᕙᖏᖢᓂᐅᒃ ᖃᐅᑕᒫ.” ᕿᒪᒃᖢᒍ ᖃᑦᑎᕆᔨᒃᑯᑦ, ᑕᐃᒪᐃᖢᓂ, ᐊᔪᕐᓇᖅᑐᒥ ᐅᖃᖃᑎᖃᓚᐅᖅᑐ ᑕᐃᑲᓂ ᐱᐳᖃᑎᒋᔮᓂ ᖃᑦᑎᕆᕝᕕᖕᒥ ᐃᓂᖃᖅᑎᓪᓗᒍ − ᐃᕐᓂᓂ. ᒫᓐᓇᐅᔪᖅ 10−ᓂ ᐅᑭᐅᖃᓯᔪᖅ, ᖃᑦᑎᕆᕝᕕᖕᒦᕈᔪᐃᓐᓇᖅᖢᑕ ᐃᓅᓯᕐᒥᓂ. ᖃᐅᔨᒪᔭᖏ ᖃᑦᑎᖅᑎᐅᖃᑎᖏ, ᑕᐅᑐᒃᓯᒪᔪᖅ ᐱᓕᕆᑎᓪᓗᒍ, ᐃᒃᓯᕚᖃᑎᒋᓪᓗᓂᐅᒃ ᖃᑦᑎᕈᑎᐅᑦ ᓄᓇᓯᐅᑎᕐᔪᐊᖓᓂ, ᐃᓚᐅᓯᒪᓪᓗᓂ ᐃᖏᕐᕋᔭᒃᑐᓂ ᐊᒻᒪᓗ ᐊᓯᖏ ᖃᑦᑎᕆᔩ ᐱᓕᕆᓕᕌᖓᑕ. “ᐃᕐᓂᓂ ᖃᑦᑎᕆᔨᓂ ᐱᕈᖅᑐᖅ ᑕᐃᒪᙵᓂᓗᒃᑖᖅ,” ᐊᒡᒐᒃ ᐅᖃᖅᐳᖅ. ᖁᕕᐊᔭᓂ ᐊᓈᓇᓂ ᖃᑦᑎᕆᔨᐅᓂᖓᓄ ᐱᓯᒻᒦᓐᓇᕐᓂᐊᖅᑕᓂ ᐃᓱᒫᒍ. “ᑕᑯᔪᓐᓇᖅᑕᑦ ᖁᕕᐊᑦᑐᖅ. ᐊᖏᔪᒥ ᐊᓕᐊᓇᐃᒋᔭᓕ ᓴᒧᙵᑐᐊᕌᖓᒥ ᐃᑯᐊᓚᔪᓄ ᐅᕝᕙᓘᓃᑦ ᐃᖏᕐᕋᔭᒃᑐᓄ ᐅᕝᕙᓘᓃᑦ ᑲᑎᑦᑐᖃᕌᖓᑦ,” ᐅᖃᖅᐳᖅ. ᐊᒡᒐᒃ ᐅᖃᖅᑎᓪᓗᒍ ᐃᕐᓂᒥᓄ ᖃᑦᑎᕆᔨᐅᔾᔮᕈᓐᓃᕐᓂᖓᓂ, ᐊᑲᐅᒃᓴᓚᐅᖏᑦᑐᖅ. ᑭᓯᐊᓂᓕ ᐊᑐᓂ ᑲᒪᔭᕆᐊᒃᓴ ᐊᔪᕐᓇᖅᓯᓚᐅᕐᒪᑦ. ᐅᖃᖅᖢᓂ ᐃᖅᑲᓇᐃᔮᖅᑖᓵᓂ ᐱᒋᐊᕈᓐᓇᖅᑐᖅ ᐅᓪᓛᑯᑦ 5 a.m., ᖃᑦᑎᕆᔨᐅᓂᖅ ᐱᓕᕆᓐᓇᖅᖢᓂ 7 p.m. ᑕᐃᑯᖓ 9-10 p.m. ᑭᐅᔨᐅᓗᓂ ᑐᐊᕕᕐᓇᖅᑐᓄ ᐊᔪᕐᓇᕋᔭᕐᒥᔪᖅ ᐃᖅᑯᒻᒪᖅᓵᓕᔭᕆᐊᖃᖅᑎᓪᓗᒍ ᐃᖅᑲᓇᐃᔭᕆᐊᕐᓂᐊᕋᒥ ᖃᐅᒃᐸᑦ. ᐃᕐᓂᓂ ᑐᑭᓯᓕᓚᐅᖅᑐᖅ ᐊᑐᕐᓂᐊᖅᑕᒥᓂ, ᐅᖃᖅᐳᖅ, ᐊᒻᒪᓗ ᑕᑯᐃᓐᓇᖅᐸᒃᖢᓂ ᖃᑦᑎᕆᔨᐅᖃᑎᕕᓂᖏᓐᓂ. ᐊᑐᓂ ᐊᑐᖅᓯᒪᓕᖅᑎᓪᓗᒍ, ᐊᒡᒐᒃ ᑕᑯᔪᒪᔪᖅ ᐃᓄᐃᖕᓂ ᑐᐊᕕᖅᓇᖅᑐᓕᕆᔨᐅᔪᓂ ᐊᒻᒪᓗ ᐋᓐᓂᐊᕐᕕᓕᕆᓂᕐᒥ. “ᐱᖃᕆᐊᖃᖅᑐᒍ ᐃᓄᖕᓂ ᐊᑐᓂ,” ᐅᖃᖅᐳᖅ. “ᐊᖑᑎ ᐊᕐᓇᒻᓗ ᐱᑕᖃᕆᐊᓕ ᑕᒪᐃᓐᓄ, ᐊᒻᒪᓗ ᐱᒃᑯᓇᑦᑎᐊᖅᖢᓂ.” ᐅᖃᓪᓚᒃᖢᓂ ᐅᖃᐅᓯᒃᓴᖓᓂ ᐊᓯᒥᓄ ᐱᔪᒪᑐᐃᓐᓇᕆᐊᓕᖕᓄ ᓄᑖᕐᒥ ᐱᓕᕆᐊᒃᓴᒥ ᐊᑐᓚᐅᖅᑕᒥᑎᒍ ᐱᒋᐊᕐᓂᑰᔪᖅ ᐅᑭᐅᖃᖅᑎᓪᓗᒍ 18-ᓂ ᐃᖅᑲᓇᐃᔮᒃᓴᖅᓯᐅᖅᑐᖅ ᐊᐅᔭᐅᔪᒧ. “ᐱᓇᔪᒋᐊᕆ ᑭᓱᒥᒃᑭᐊᖅ,” ᐊᒡᒐᒃ ᐅᖃᖅᐳᖅ. “ᐊᓯᔾᔩᒋᑦ.”