ᐃᓅᔪᓐᓃᕈᔾᔨᓯᒪᔪᖓ 8ᓗᐊᓂ ᐃᖕᒥᓃᖅᑐᑦ, ᒪᒃᑯᒃᑐᓄ ᑲᑎᒪᔨ ᐅᖃᖅᑐᖅ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᓄ

Published 7:59 am Monday, August 3, 2026 ᐊᒃᑐᖅᑕᐅᕐᓗᒃᓯᒪᔪ ᐃᓱᒪᒥᒍ ᐊᑲᐅᖏᓕᐅᕈᑎᓖ ᒪᒃᑯᒃᑐᓄ ᐅᑭᐅᖅᑕᖅᑐᒥ ᑲᒪᓇᖏᓚᖅ ᑭᓇᓕᒫᒧ, ᐅᖃᖅᐳᖅ 22-ᓂ ᐅᑭᐅᓕᒃ ᑯᐃᓐ ᓇᑦᑎᖅ. ᑭᒡᒐᖅᑐᐃᔪᖅ ᑲᓇᑕᒥ ᒪᒃᑯᒃᑐᓄ ᑲᑎᒪᔨ ᑕᐃᑲᓂ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᓄ ᐅᐸᒃᑐᖅ ᑲᑎᒪᔪᓄ ᐃᖃᓗᖕᓂ, ᓇᑦᑎᖅ ᐅᖃᐅᓯᖃᓚᐅᖅᑐᖅ ᖃᓄᖅ ᐊᒃᑐᖅᑕᐅᓯᒪᖕᒪᖔᑦ ᓄᓇᕗᒻᒥ ᖁᑦᑎᒃᓯᓯᒪᔪ ᐃᖕᒥᓃᖅᑐᓄ. “ᐊᓂᒍᖅᑐᒥ ᐊᕐᕌᒍ 5, ᐃᓅᔪᓐᖥᕈᔾᔨᓯᒪᔪᖓ 8-ᓂ ᐃᖕᒥᓃᖅᑐᓄ.” ᐅᖃᖅᐳ. ᐱᑕᖃᖅᑐᖅ 25-30 ᐃᖕᒥᓃᖅᑐᑦ ᓄᓇᕗᒻᒥ ᐊᕐᕌᒍᑕᒫᖅ, ᓴᖅᑭᑦᑎᓪᓗᓂ ᓄᓇᕗᒻᒥ ᐃᓄᓕ 40,000−ᓂ ᖁᑦᑎᖕᓂᖅᐹᖑᓯᒪᔪᖅ ᐃᖕᒥᓃᖅᐸᒃᑐᑦ, ᓇᐃᓴᖅᑕᐅᓯᒪᔪ ᑕᐃᑲᙵ ᓄᓇᕗᒻᒥ ᐃᓅᔪᓐᓃᖅᑐᓕᕆᔩ ᑎᑎᕋᕐ(ᐊᓂ ᓴᖅᑭᑕᐅᔪᖅ. “ᑕᒪᓐᓇ ᐊᑐᖅᑕᐅᔪᖅ ᐃᓅᔪᓐᓃᕈᔾᔨᔪᓄ ᐊᑐᖅᑕᐅᖏᓚ ᓄᓇᖃᖅᑐᓄ ᖃᓪᓗᓈᓂ ᐆᒃᑐᖅᖢᒍ ᑲᓇᑕᒥ ᐊᑐᖅᑕᐅᔪ. ᑭᐊᓂᓕ, ᐅᓄᖅᑐᓄ ᒪᒃᑯᒃᑐ ᐃᓄᐃᑦ, ᐊᑐᖅᑕᐅᓯᒪᕗᖅ ᐆᒪᑎᒧᑦ ᐋᓐᓂᐊᕐᓇᖅᖢᓂ,” ᓇᑦᑎᖅ ᐅᖃᖅᐳᖅ. ᐅᖓᑖᓄ ᓇᑉᐸᓪᓗᐊᖓ ᐃᖕᒥᓃᖅᑐᑦ ᓄᓇᕗᒻᒥ ᒪᒃᑯᒃᑐᓂᙶᖅᑐᖅ ᐅᑭᐅᖃᖅᑐ 29 ᐅᓄᖓ, ᐅᓄᕐᓂᖏ ᓄᑲᑉᐱᐊᓂᖔᖅᑐᑦ ᐊᒻᒪᓗ ᐊᖑᑎᓂ. ᒪᒃᑯᒃᑐ ᑲᑎᒪᔨ ᑭᒑᖅᑐᐃᔪ Chukotka (ᐅᓛᓯᐊ), ᐊᓛᔅᑲ, ᑲᓛᓖᑦ, ᐊᒻᒪᓗ ᑲᓇᑕᒥ ᑐᓴᖅᑎᑦᑎᔨᐅᓚᐅᖅᑐ ᓄᓇᓕᖕᒥᓄ, ᐊᖏᓂᖅᐹᖅ ᐊᑲᐅᖏᓕᐅᕈᑎ ᐅᖃᐅᓯᐅᓚᐅᖅᑐᖅ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔪᓂ ᔪᓚᐃ 24 ᑕᐃᑲᓂ ᐊᖅᓴᕐᓃ ᑐᔪᕐᒥᕕᐊᓂ. ᓇᑦᑎᖅ, ᐃᖃᓗᖕᓂᕐᒥᐅᑕᖅ, ᐅᖃᖅᖢᓂ ᐱᓕᒻᒪᒃᓴᐃᓂᖅ ᒪᒃᑯᒃᑐᓂ ᖃᓄ ᐃᑲᔪᖅᑎᒌᒍᓐᓇᕐᒪᖔᑦ ᐱᖁᔭᐅᓯᒪᕗᖅ ᑕᐃᒃᑯᓇᙵ ᑭᒡᒐᖅᑐᐃᔨᓂ ᓴᓇᖃᑎᒋᓐᓂ. “ᓲᕐᓗ, ᓇᓗᒧᒌᒃᑐ ᐃᑲᔪᖅᑎᒌᒃ ᐱᓕᒻᒪᒃᓴᓗᑎᒃ ᒥᑭᓐᓂᖅᓴᓂ ᓄᓇᓕᖕᓂ, ᐅᓄᖅᑐᑦ ᒪᒃᑯᒃᑐ ᐅᖃᖃᑎᒌᒍᒪᖏᒻᒪᑕ ᑭᓇᒥᐅᒧ ᖃᐅᔨᒪᖏᑖᓄ. ᐱᓕᒻᒪᒃᓴᕐᓗᒋ ᒪᒃᑯᒃᑐ ᖃᓄᖅ ᐃᑲᔪᖅᙱᑎᒌᒍᓐᓇᕐᒪᖔᑕ ᐊᒻᒪᓗ ᐃᑲᔪᖅᑎᒌᒡᓗᑎᒃ ᐃᑲᔫᑕᐅᑦᑎᐊᕈᓐᓇᖅᑐᖅ,” ᓇᑦᑎᖅ ᐅᖃᖅᐳᖅ. ᐋᕿᑦᑎᐊᖅᓯᒪᔪᑦ ᐋᓐᓂᐊᕐᕕᓕᐊᕈᓐᓇᐅᑎᑦ ᐱᔨᑦᑎᕋᖅᑕᐅᔾᔪᑎᖏᑦ ᐅᖓᓯᒃᑑᕙᖕᒪᑕ ᑕᐅᓯᓐ ᑭᓚᒦᑕᓂ ᐃᓄᐃᑦ ᒪᒃᑯᑦᑐᓄ ᐅᐸᒋᐊᓕᖕᓄ, ᐅᖃᐅᔾᔨᕗᖅ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᓄ. ᓇᑦᑎᖅ ᐅᖃᖅᖢᓂ ᒪᒃᑯᒃᑐᑦ ᐃᓱᒪᒥᒍ ᐊᒃᓱᕈᖅᑐᓄ ᖃᐅᔨᒪᖁᔨᓪᓗᓂ ᐃᑲᔪᕐᕕᒃᑕᓕᒃ. “ᐅᖃᕈᒪᑐᐃᓐᓇᖅᑐᖓ, ᑎᒍᒻᒦᓐᓇᕐᓗᑎ. ᖃᐅᔨᒪᔪᖓ ᐊᔪᕐᓇᖅᑐᒻᒪᕆᐊᓗᒃ − ᐊᒻᒪᓗ ᐊᔪᕐᓇᖅᖢᓂ ᐊᔭᐅᖏᓐᓇᕐᓗᑎ. ᑭᓯᐊᓂᓕ ᐱᑕᖃᖅᑐᖅ ᐃᓕᖕᓂ ᐃᑲᔪᖅᑐᐃᔪᓂ, ᐃᓕᖕᓄ ᐃᑲᔪᖅᑐᐃᔪ. ᓄᓇᕗᑦ ᐃᑲᔪᖅᑐᐃᔪᒻᒪᕆᐅᔪᖅ,” ᐅᖃᖅᐳᖅ. ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏ ᐅᐸᒍᓐᓇᖅᑕᑎ ᑕᐃᑲᓂ ᐃᓄᐃᑦ ᑲᑎᑉᐸᒃᑐᑦ, ᐅᖃᖅᑕᖓᒍ ᓇᑦᑎᐅᑉ. ᑕᑯᔪᒪᔪᖅ ᐅᓄᕐᓂᖅᓴᑦ ᒪᒃᑯᒃᑐ ᐃᓚᒋᔭᐅᓕᕐᓗᑎᒃ. “ᓯᕗᓂᖅᓴᒋᒐᑦᑎᒍ. ᑕᒪᓐᓇ ᐃᓂᐅᔪᖅ ᐃᓚᐅᕝᕕᒋᔪᓐᓇᖅᑕᑦ ᓯᕗᓂᒃᓴᕗᑦ ᓴᐳᔾᔭᐅᓯᒪᒐᓗᐊᕐᒪᖔᑦ ᐊᒻᒪᓗ ᒪᓕᒃᖢᓂ ᖃᓄᐃᓕᖓᖁᖕᒪᖔᑦ ᐃᓄᐃᑦ ᐃᓅᓯᐊᒍᑦ,” ᓇᑦᑎᖅ ᐅᖃᖅᐳᖅ.