Hᐅᑉ ᓇᑭᒪᔭ ᑎᒃᑯᐊᖅᑕᐅᔪᖅ ᐃᓄᐃᑦ ᐅᑭᐅᖅᑕᖅᑐᒥ ᑲᓯᒪᔩ ᑲᓇᑕᒥ ᐊᖓᔪᖅᑳᖅ

Published 2:40 am Sunday, July 26, 2026 Hᐅᑉ ᓇᑭᒪᔭ, ᐸᐅᓚᑐᖕᒥᐅᑕᖅ, ᑎᒃᑯᐊᖅᑕᐅᓚᐅᖅᑐᖅ ᐊᖓᔪᖅᑳ ᐃᓂᐊᓄ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔩ ᑲᓇᑕᒥ (ICC) ᑲᓇᑕ 13-ᓂ ᑲᑎᒪᔨᓕ ᔪᓚᐃ 21 ᐃᖃᓗᖕᓂ. ᓇᑭᒪᔭ, ᑐᑭᒧᐊᖅᑎᑦᑎᔪᖅ ᑭᒡᓕᖃᖅᑐᒥ ᐊᖓᔪᖅᑳ ᑕᐃᒪᙵᓂ ᓯᑎᐱᕆ 2025, ᓂᕈᐊᖅᑕᐅᓚᐅᖅᑐᖅ 11-ᓂ ᓵᓚᖃᖅᖢᓂ ᑭᓕᕙᒃ ᑲᑉᓘᓇ, ᓂᕈᐊᖅᑕᐅᓚᐅᖅᖢᓂ ᒪᕐᕉᖕᓂ. ᓴᑭᒪᔭ ᓂᕆᐅᒋᔭᐅᔪᖅ ᑐᑭᒧᐊᖅᑎᑦᑎᓗᓂ ᐊᖓᔪᖅᑳ ᐃᓂᐊᓂ ᑎᑭᐅᑎᓗᒍ ᑭᖑᓪᓕᕐᒥ ᑎᒃᑯᐊᖅᓯᓂᐅᓂᐊᖅᑐᒥ 2030. ICC ᑲᓇᑕ ᑲᓇᑕᐅ ᑲᒪᒋᔮ ᓄᓇᕐᔪᐊᓕᒫᒥ ᑎᒥᖃᖅᑐ ᑭᒡᒐᖅᑐᐃᓪᓗᓂ ᐃᓄᖕᓂ, ᐃᓚᖃᖅᑐᖅ ᐅᓛᓯᐊᒥᐅᓂ (ᓱᑯᑕ), ᐊᓛᔅᑲ, ᓄᓇᑦᑎᐊᖅ (ᐃᓄᕕᐊᓗᐃᑦ), ᓄᓇᕗᑦ, ᐅᑭᐅᖅᑕᖅᑐᒥᐅ ᑯᐸᐃᖕᒥ (ᓄᓇᕕᒃ), ᓚᐸᑐᕆᒥ (ᓄᓇᑦᑎᐊᕗᑦ) ᐊᒻᒪᓗ ᑲᓛᓖ. ᓇᑭᒪᔭ ᐅᖃᖅᖢᓂ ᓵᓚᒃᓴᓚᐅᖅᑐᖅ ᑎᒃᑯᐊᖅᑐᓂ ᑐᑭᒧᐊᖅᑎᑦᑎᓚᐅᕐᓂᖓᓄ ᑎᒥᐅᔪᒥ ᐊᔪᕐᓇᖅᑐᖅᓯᐅᖅᑎᓪᓗᒋ ᐅᑭᐅᖅᑕᖅᑐᖅ ᑕᐅᑐᒃᑕᐅᓗᐊᓕᖅᑎᓪᓗᒍ ᓄᓇᕐᔪᐊᓕᒫᒥ. “ᐋᕿᒃᓯᒪᔭᖓ ᓄᓇᐅᑉ ᓄᓇᕐᔪᐊᕐᒥ, ICC, ᐊᓂᒍᐃᑦᑎᐊᖅᓯᒪᕗᒍ ᑲᒪᒋᔭᐅᑦᑎᐊᕐᓗᒍ ᐊᓯᔾᔩᓂᖅ ᐊᑐᕈᒪᔮᓂ, ᓄᓇᐅᑉ ᐋᖅᑭᒃᓯᒪᓂᖓ, ᐊᒻᒪᓗ ᑲᔪᓯᓗᑕ ᐱᓕᕆᖃᑎᖃᕐᓗᑕ ICC-ᑯ ᑐᑭᒧᐊᖅᑎᑦᑎᔨᖏᓐᓂ ᑐᓴᖅᑕᐅᔾᔪᑎ ᓴᖅᑭᑕᐅᒐᓗᐊᕐᒪᖔᑕ ᓄᓇᕐᔪᐊᓕᒫᒧ ᓇᑭᖔᒻᒪᕆᖕᒪᖔᑦ, ᑕᒫᖔᖅᖢᓂ ᐊᖏᕐᕋᑦᑎᓐᓂ.” ᑲᒪᒋᓗᒍ ᐅᓗᕆᐊᓇᖅᑐᒃᑯ ᑕᕆᐅᖓ U.S. ᐱᔪᒪᔮ ᑲᓛᓖ. ᐅᓛᓯᐊ ᐅᓇᑕᕕᒡᔪᐊᖅᑖ ᑕᐃᑲᓂ ᔪᑯᐃᓐᒥ, ᐊᒻᒪᓗ ᓴᐃᓂᓯᒃᑯ ᓯᑯᓯᐅᑎᖏ ᐅᑭᐅᖅᑕᖅᑐᒥ ᑕᕆᐅᖅ ᐊᒃᓱᕉᑕᐅᓯᒪᖕᒪ ᑖᒃᑯᓄᖓ ICC−ᑯᓐᓄ ᓇᖏᕐᓗᑎᒃ ᐃᓄᐃᑦ ᓇᖕᒥᓂᖅᓱᕐᓂᖓ − ᓇᐅᒃᑯᓕᒫ ᑲᑎᒪᔨ ᐅᖃᐅᓯᒃᓴᖏ ᐱᔾᔪᑎᓕᖕᒧ ᐊᖓᔪᖅᑳᒧ ᓂᕈᐊᖅᑕᐅᔪᖅ. ᐅᑭᐅᖅᑕᖅᑐᖅ ᑲᔪᓯᓪᓗᐊᖅᑐᖅ ᐃᓂᖓ ᐅᓇᑕᖅᑐᖃᖏᓪᓗᓂ ᐊᒻᒪᓗ ICC ᐊᒃᑐᐃᔪᓐᓇᖏᒻᒪ ᐊᑲᐅᖏᓕᐅᕈᑎᓂ ᑖᒃᑯᑎᒎᓇ ᑭᒡᓕᐅᔪᒃᑯᑦ, ᓇᑭᒪᔭ ᐅᖃᖅᐳᖅ. ICC ᑲᓇᑕ ᓂᕈᐊᕋᓱᐃᓐᓇᖅᑐᖅ ᑕᕆᐅᑉ ᐊᑭᐊᓂᕐᒥᐅᑕᓂ EU−ᑯᑦ ᒪᓕᒐᖓ ᓄᖃᖅᑎᑦᑎᓂᖅ ᓂᐅᕈᑎᖃᕐᓂᖅ ᓇᑦᑎᐅᑉ ᕿᓯᐊᓂ ᐊᒻᒪᓗᑦᑕᐅᖅ ᒪᓐᓇᓵᖅ ᐊᑐᖅᑕᐅᔪᒪᓕᖅᑐᖅ ᖃᕋᓴᐅᔭᒃᑯᑦ ᓂᐅᕈᑎᖃᕐᓂᖅ Etsy−ᑯᑎᒍ ᓄᖃᖅᑎᑕᐅᓗᓂ ᓂᐅᕈᑎᖃᕐᓂ ᕿᓯᓂ. ᓇᑭᒪᔭ ᐊᑐᕐᓂᐊᕐᓂᕋᖅᐳᖅ. “ᓇᐃᓴᖅᑕᐅᓯᒪᔪ ᐱᓯᒪᔭᕗ ᑕᐃᒃᑯᓄᖓ ᓴᑦᑎᔭᓂ ᐊᑐᖅᑕᐅᔪᖅ ᑕᑯᑎᓪᓗᒋ EU−ᑯ ᐊᒻᒪᓗ ᐊᓯᖏ ᓄᓇᕐᔪᐊᓕᒫᒥ ᑕᑯᓗᑎᒃ ᓇᑦᑎᑦ ᖃᓄᐃᖏᑦᑐᑦ ᒫᓐᓇᐅᔪᖅ,” ᐅᖃᖅᐳᖅ. ᐅᖃᕆᓪᓗᓂ ᐱᓕᕆᐊᒃᓴᖃᕈᓘᔭᓚᐅᕋᒥ ᑐᑭᒧᐊᖅᑎᑦᑎᓪᓗᓂ ICC−ᑯ ᑲᓇᑕᒥ ᑭᒡᓕᖃᖅᑐᒥ ᐊᖓᔪᖅᑳᖑᓪᓗᓂ ᒪᓂᓴᕆᐊᒃᓴᖅ ᑎᒃᑯᐊᖅᑕᐅᓐᓇᖏᑎᓪᓗᒍ. ᑎᒥᐅᔪᖅ ᐊᓯᐊᓂᒃ ᐃᓂᖃᓕᖅᑐᖅ ᐊᓯᐊᒍᖔ ᐊᕐᕌᒍᒥ ᑕᑯᓪᓗᒍ, ᐅᖃᖅᑐᖅ ᓇᑭᒪᔭ. “ᑐᐊᕕᕐᓇᕈᓘᔭᓵᖅᑐᖅ ᑭᒡᒐᖅᑐᖅᖢᒍ ᐋᕿᐅᒪᓂᖓᑕ ᐃᓂᖓ ICC ᒫᓐᓇᐅᔪᕐᓗ ᑕᑯᓪᓗᒍ ᑕᐃᓱᒪᓂᓂ ᑕᐃᖕᓇ ᓇᐃᑕᓐ ᐅᐱᑦ ᑲᒪᔭᕆᐊᖃᓕᖅᑎᓪᓗᒍ ᐃᓇᙲᓪᓗᓂ, ᐊᒻᒪᓗ ᓯᑎᐱᕆ, ᑎᒃᑯᐊᖅᑕᐅᑎᓪᓗᖓ ᑭᒡᓕᖃᕐᓗᒍ ᐃᓂᖃᓚᐅᑲᒃᑕᕋ ᐃᒃᓯᕙᐅᑕᐅ ᐃᓂᐊᓂ. ᐃᓱᒪᓚᐅᖅᑐᖓ ᐱᑕᖃᕈᓐᓃᕐᓂᐊᓕᕐᓂᖓᓂ ICC, ᐳᕙᒍᑦ,” ᓇᑭᒪᔭ ᐅᖃᖅᐳᖅ ᐅᖃᓪᓚᒃᑎᓪᓗᒍ ᐱᓂᐊᕐᓂᕋᖅᖢᓂ ᐃᓂᒥᒃ. ᐳᐃᑦ, ᐊᖓᔪᖅᖄᖅ ᑲᓇᑕᒥ ᑲᑐᔾᔨᖃᑎᒌᒃ ᐃᓄᐃᑦ ᑕᐱᕇ ᑲᓇᑕᒥ ᐊᒻᒪᓗ ᐃᓚᖓ 13-ᖑᔪᑦ ᓂᕈᐊᖅᑎᐅᖃᑕᐅᓵᖅᑐᖅ, ᐃᓂᑖᓚᐅᖅᓯᒪᔪᖅ ICC−ᑯᓐᓂ ᑲᓇᑕᒥ ᑕᖅᑭᓄ 8-ᓄ ᓇᑭᒪᔭ ᑎᒃᑯᐊᖅᑕᐅᓕᓚᐅᖅᑐᖅ ᑭᒡᓕᖃᖅᖢᓂ ᐊᖓᔪᖅᑳ ᐃᓂᐊᓂ. ᓇᑭᒪᔭ ᐃᓂᖃᓚᐅᖅᑐᖅ MLA ᐃᓂᐊᓂ ᐊᖏᕐᕋᒥᓂ ᓄᓇᒃᐳ ᑕᐃᑲᙵ 2015-ᒥ 2019-ᒧ ᑕᐃᑲᓂ NWT ᑲᑎᒪᕕᐊᓂ. ᓂᕈᐊᖅᑕᐅᓯᒪᓵᖅᑐᖅ ICC ᑲᓇᑕᒥ ᑐᒡᓕᐊᑕ−ᐊᖓᔪᖅᖄ ᐃᓂᐊᓂ, ᓄᓇᕐᔪᐊᓕᒫᒥ ᑲᑎᒪᔨᓂ ᐊᕐᕌᒍᓄ ᒪᕐᕉᖕᓄ, ᑕᐃᑲᓂ 2014-ᒥ 2018-ᒧ ᐊᒻᒪᓗ ᑕᐃᑲᓂ 2022-ᒥ ᓯᑎᐱᕆ 2025-ᒧ. ᑲᑉᓘᓇ ᓵᓚᒃᓴᕋᓱᖃᑕᐅᔪᖅ, ᐃᓂᖃᓵᓴᖅᑐᖅ CEO ᓄᓇᕗᑦ ᑐᙵᕕᒃᑯᓐᓂ (NTI) ᑕᐃᑲᙵ ᑎᓯᐱᕆ 2018-ᒥ ᔫᓂ 2026. ᑭᓯᐊᓂᓕ ᑲᑉᓘᓇ ᓄᖅᑲᓕᓚᐅᖅᑐᖅ ᐃᓂᒥᓂ ᑕᐃᖕᓇ ᑯᓗᕆᔭ ᐅᓗᖅᓯ ᓂᕈᐊᖅᑕᐅᓂᐊᓕᖅᑎᓪᓗᒍ ᐊᖓᔪᖅᑳ ᐃᓂᐊᓂ NTI−ᑯᓐᓂ. ᐅᓗᖅᓯ, ᐃᓚᒋᔭᐅᓵᕐᒥᔪᖅ 13 ᑎᒃᑯᐊᖅᓯᔪ ᑲᑎᒪᔨᓂ ᑕᐃᑲᓂ ICC ᑲᓇᑕᒥᒃᑯᓐᓂ ᑎᒃᑯᐊᖅᓯᔪᓂ, ᐅᖃᕈᒪᖏᖢᓂ ᖃᓄᐃᒻᒪ ᑲᑉᓘᓇ CEO−ᖑᔪᓐᓃᓵᕐᒪᖔᑦ ᔫᓂᐅᑎᓪᓗᒍ. ᓇᑭᒪᔭ ᐊᒻᒪᓗ ᑲᑉᓘᓇ ᐱᕕᖃᖅᑎᑕᐅᓚᐅᖅᑐᑦ 10 ᒥᓂᒥ ᐅᖃᐅᓯᖃᕐᕕᖃᖅᖢᑎᒃ ᖃᓄᐃᑦᑑᖕᒪᖔᑕ ᑕᐃᒃᑯᓄᖓ 13 ᐃᓄᐃᑦ ᑐᑭᒧᐊᖅᑎᑎᔨᓄ ᐋᖅᑭᐅᒪᑎᑦᑎᔪᓗ ICC ᑲᓇᑕᒥ, ᐊᒻᒪᓗ 20 ᒥᓂᔅᒥ ᐊᐱᖅᓱᖅᑕᐅᕝᕕᖃᖅᖢᑎᒃ. ᐊᔾᔨᒌᖏᓐᓇᕐᓂ ᐊᐱᖅᓱᖅᑕᐅᓪᓗᑎᒃ ᐊᑐᓂ ᓂᕈᐊᒐᒃᓴ, ᑕᐃᑲᓂ ᐱᖁᔨᕗᖔᖅᑐᖅ ᑕᐃᒃᑯᑎᒎᓇ ᒪᑭᕕᒃᑯᑎᒍ ᐊᖓᔪᖅᑳᖅ ᐱᑕ ᐊᑕᒥ, ᑭᒡᒐᖅᑐᐃᔪᖅ ᓄᓇᕕᖕᒥᐅ ᐃᓄᖏᓐᓂ. ᑲᑉᓘᓇ ᐅᖃᓪᓚᖄᖅᖢᓂ, ᐅᖃᓕᒫᖅᑐᖅ ᑎᑎᕋᖅᑕᒥᓂ ᐊᒻᒪᓗ ᐅᑕᖅᑭᓚᐅᑲᒃᖢᓂ ᐊᐱᖅᑯᑎᒃᓴᓂ. ᑕᐅᑐᙳᐊᖅᖢᒍ, ᓴᑭᒪᔭ ᐅᖃᖅᖢᓂ ᐸᕐᓇᒃᓯᒪᖏᓐᓇᒥ ᐊᒻᒪᓗ ᐅᖃᓪᓚᓚᐅᖅᑐᖅ ᐃᓱᒪᒥᓂᖔᖅᑐᒥ, ᐅᖃᒪᔭᙳᐊᖅᖢᓂ 13-ᓄ ᓂᕈᐊᖅᑎᓄ ᖃᑯᒍᒎᖅ ᓇᓪᓕᐅᑎᓂᐊᕋᒥ. ᐊᑐᓂ ᓂᕈᐊᒐᒃᓴᑦ ᐊᐱᕆᔭᐅᓚᐅᖅᑐᑦ ᖃᓄᖅ ᑲᒪᓇᔭᕐᒪᖔᑦᑕ ICC ᑲᓇᑕᒥ ᐃᓂᐊᓂ ᐅᓇᑕᖁᔨᖏᑦᑐ ᓄᓇᕐᔪᐊᓕᒫᒥ ᐊᑲᐅᖏᓕᐅᕈᑎᑕᖃᐅᖅᑎᓪᓗᒍ ᐊᒻᒪᓗ ᑐᑭᒧᐊᖅᑎᔾᔪᑖᑕ ᐃᓕᖅᑯᓯᕆᓂᐊᕐᒪᖔᑦ. ᑐᑭᒧᐊᖅᑎᑦᑎᔩ ICC ᑲᓇᑕᒥᑯᓐᓂ ᑕᐃᒃᑯᐊ ᓂᕈᐊᓚᐅᖅᑐᑦ ᐊᖓᔪᖅᑳ ᐃᓂᐊᓄ ᐅᑯᐊᖑᓚᐅᖅᑐᑦ: −ᐅᕆᓐ ᐃᓚᐃᔭᔅ, ᐃᒃᓯᕙᐅᑕᖅ ᐃᓄᕕᐊᓗᐃᑦ ᑯᐊᐳᕇᓴ ᑎᑎᕋᕐᕕᐊᓂ −ᕈᕆᓐ ᐃᓴᐅ, ᐃᒃᓯᕙᐅᑖ ᑐᒡᓕᐊ ᐃᓄᕕᐊᓗᐃᑦ ᑯᐊᐳᕇᓴ ᑎᑎᕋᕐᕕᐊᓂ −ᑎᐅᕈ ᓇᓱᒐᓗᒃ, ᑲᑎᒪᔨ ᐃᓄᕕᐊᓗᐃᑦ ᑯᐊᐳᕇᓴ ᑎᑎᕋᕐᕕᐊᓂ −ᑯᓗᕆᔭ ᐅᓗᖅᓯ, ᐊᖓᔪᖅᑳ NTI −ᐸᐅᓕ ᐃᕐᖓᐅᑦ, ᐊᖓᔪᖅᖄ ᑐᒡᓕᐊ NTI −ᐅᓚᔪᒃ ᐊᑭᓱᒃ, ᐊᖓᔪᖅᑳ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃ −ᔪᐊᓇᓐ ᓚᑉ, ᐊᖓᔪᖅᑳᖅ ᓄᓇᑦᑎᐊᕗᑦ ᒐᕙᒪᖓᓂ −ᕋᒃᓵᓐ ᐸᐅᐳ, ᒥᓂᔅᑕ ᐋᓐᓂᐊᖃᖅᑕᐃᓕᒪᔪᓕᕆᔩ ᐊᒻᒪᓗ ᐃᓄᓕᕆᓂᕐᒧ ᐱᕙᓪᓕᐊᔪᓕᕆᔨ ᓄᓇᑦᑎᐊᖅ −ᔨᐅᕈᑦ ᐊᓯᕙᒃ, ᒥᓂᔅᑕ ᐃᓕᓐᓂᐊᖅᑐᓕᕆᓂᖅ ᐊᒻᒪᓗ ᑮᓇᐅᔭᓄ ᐱᕙᓪᓕᐊᔪᓕᕆᓂᖅ ᓄᓇᑦᑎᐊᕗᑦ ᒐᕙᒪᖓᓂ −ᐱᑕ ᐊᑕᒥ − ᐊᖓᔪᖅᑳᖅ ᒪᑭᕕᒃ ᑯᐊᐳᕆᓴ −ᐊᑕᒥ ᑎᓚᐃᔪ ᐊᓚᑯ, ᐊᖓᔪᖅᖄ ᑐᒡᓕᐊ ᐊᕙᑎᓕᕆᔨᒃᑯᓐᓂ, ᐆᒪᔪᕐᓂᐊᖅᑎᒃᑯᓐᓂ ᐊᒻᒪᓗ ᖃᐅᔨᓴᖅᑎ ᒪᑭᕕᒃ ᑯᐊᐳᕆᓴ −ᔪᐊᔾᔨ ᐳᑦ, ᑮᓇᐅᔭᓕᕆᔨ ᒪᑭᕕᒃ ᑯᐊᐳᕆᓴ −ᓇᐃᑕᓐ ᐅᐱᑦ, ᐊᖓᔪᖅᑳ ᑐᒡᓕᐊ ᑲᓇᑕᒥ ᑎᑎᕋᕐᕕ ᑕᐃᑲᓂ ICC ᑲᓇᑕᒥ